ນັກຮຽນ ແລະ ຄຣູ ອາຈານ ຢູ່ ມະຫາວິທຍາ ສຸພານຸວົງ ແຂວງ ຫຼວງພຣະບາງ ຍັງ ບໍ່ທັນໄດ້ ເງິນ ເບັ້ຽລ້ຽງ ການໄປ ເດີນ ສວນ ສະໜາມ ເນື່ອງໃນ ໂອກາດ ວັນຊາດ ທີ 2 ທັນວາ ຜ່ານມາ. ດັ່ງ ນັກສຶກສາ ຄົນນຶ່ງ ຜູ້ທີ່ ບໍ່ປະສົງ ອອກຊື່ ໄດ້ກ່າວ ຕໍ່ ເອເຊັຽ ເສຣີ ວ່າ:
"ອາຈານ ແລະ ນັກຮຽນ ຢູ່ ມະຫາວິທຍາໄລ ສຸພານຸວົງ ເນາະ ໄດ້ໄປ ເດີນ ສວນສະໜາມ ເນາະ ເພິ່ນ ບອກວ່າ ຊິໃຫ້ເງິນ ມື້ 20,000 ກີບ ວ່າຊັ້ນເນາະ ແຕ່ວ່າ ຫລັງຈາກ ວັນຊາດ ຜ່ານໄປ ຫຼາຍວັນ ເງິນ ກະຍັງ ບໍ່ທັນໄດ້ ຈັກກີບ ລະ ກະການໄປ ເດີນ ສວນສະໜາມ ນີ້ ນ່າ ເອົາລົດ ຈັກ ໄປກະຍັງ ໄດ້ ເສັຽຄ່າ ຈອດລົງ ຈອດລົດ ອີກເນາະ ກະ ຮອດມື້ນີ້ ກະ ຍັງບໍ່ເຫັນ ວ່າຫຍັງ".
ນອກຈາກນີ້ ເຂົາເຈົ້າຍັງ ສົງໄສວ່າ ງົບປະມານ ດັ່ງກ່າວນີ້ ໄປຢູ່ໄສ ດັ່ງ ນັກຮຽນ ທ່ານ ນີ້ ໄດ້ກ່າວ ອີກວ່າ:
"ຮອດມື້ນີ້ ກະນັກຮຽນ ເນາະ ກະຕ້ອງໄດ້ ລໍາບາກ ດື່ນເດິກ ລຸກເຊົ້າ ກວ່າ ປົກກະຕິ ເນາະ ພາກັນໄປ ເດີນ ສວນສະໜາມ ນີ້ແຫລະ ກະບໍ່ຮູ້ວ່າ ເງິນນີ້ ຣັຖບານ ເອົາໄປໄວ້ ໃສ ຄົງ ຊິເອົາໄປ ເຮັດ ຟຸມເຟືອຍ ແນວອື່ນ ຫລື ວ່າ ເອົາໄປຕີ ກອຟ ແນວອື່ນ ເຮົາກະບໍ່ຮູ້ ອີງຕາມ ການ ສັນນິຖານ ເນາະ ອັນນີ້ ຕາມເຮົາ ສັນນິຖານ ເບິ່ງເນາະ".
ນັກຮຽນ ແລະ ຄຣູ ອາຈານ ຕ້ອງໄດ້ມີ ການຝຶກຊ້ອມ ການເດີນ ສວນສະໜາມ ເປັນ ເວລາ 5 ວັນ ຊຶ່ງ ແຕ່ລະມື້ ເຂົາເຈົ້າ ຕ້ອງໄດ້ລຸກ ແຕ່ 5 ໂມງເຊົ້າ. ອີງຕາມ ການໃຫ້ ສໍາພາດ ຂອງ ນັກຮຽນ.
ບັນຫາ ການຈ່າຍເງິນ ໃຫ້ແກ່ ຜູ້ທີ່ໄປ ເດີນ ສວນສະໜາມ ບໍ່ຄົບຕາມ ຈໍານວນ ກໍເກີດຂຶ້ນ ຢູ່ ນະຄອນຫຼວງ ວຽງຈັນ ເຊັ່ນ ດຽວກັນ. ທີ່ຜ່ານມາ ກໍມີຂ່າວ ວ່າ ນັກຮຽນ ແລະ ທະຫານ ທີ່ໄປ ຊ້ອມ ເດີນ ສວນສະໜາມ ກໍໄດ້ເງິນ ພຽງແຕ່ ມື້ລະ 15,000 ກີບ ເທົ່ານັ້ນ ໃນຂນະ ທີ່ ຂໍ້ຕົກລົງ ຈາກ ຄນະອະນຸ ກໍາມະການ ຈັດງານ ວັນຊາດ ໄດ້ ຣະບຸ ຄ່າໃຊ້ຈ່າຍ ເດີນ ສວນສະໜາມ ມື້ລະ 35,000 ກີບ ຕໍ່ ຄົນ.
ປະຊາຊົນ ລາວ ຮວມທັງ ພະນັກງານ ຣັຖກອນ ກວ່າ 2 ພັນ ຄົນ ຢູ່ ນະຄອນຫຼວງ ວຽງຈັນ ທີ່ ຖືກ ບໍຣິສັດ ແມັກຄິສ ຕົວະ ເອົາເງິນ ທັງໝົດ 15 ລ້ານ ໂດລາ ສະຫະຣັຖ ຮຽກຮ້ອງ ໃຫ້ ຕໍາຣວດ ເສຖກິດ ຂອງລາວ ເລັ່ງ ສືບສວນ ສອບສວນ ຄະດີ ບໍຣິສັດ ດັ່ງກ່າວ ແລະ ສົ່ງສໍານວນ ຟ້ອງສານ ເພື່ອ ຜູ້ເສັຽຫາຍ ຈະໄດ້ເງິນ ຄືນ ໂດຍໄວ ເນື່ອງຈາກ ຕອນນີ້ ຫຼາຍຄົນ ເດືອດຮ້ອນ ເກືອບບໍ່ມີ ເງິນ ໃຊ້ຈ່າຍແລ້ວ. ຕາມຄໍາເວົ້າ ຂອງ ຜູ້ທີ່ຕົກ ເປັນເຫຍື່ອ ນາງນຶ່ງ ໃນ ວັນທີ 10 ທັນວາ 2015 ນີ້:
"ຮຽກຮ້ອງ ຂໍທົດແທນ ເງິນ ຄືນຫັ້ນແຫຼະ ເອົາແຕ່ທຶນ ຄືນສົ່ງ ກະພໍ ເພິ່ນຍັງ ດໍາເນີນ ຄະດີຢູ່ ໄປຖາມ ຢູ່ຕໍາຣວດ ເສຖກິດ ຫັ້ນ ຍາມໃດ ເພິ່ນກະວ່າ ຍັງດໍາເນີນ ດໍາເນີນຢູ່".
ນາງ ເວົ້າຕື່ມວ່າ ປັຈຈຸບັນ ຄະດີນີ້ ມາຮອດ 2 ເດືອນ ແລ້ວ ແຕ່ການ ດໍາເນີນຄະດີ ຍັງບໍ່ທັນ ຄືບໜ້າ ແຕ່ຢ່າງໃດ. ກ່ອນໜ້າ ນັ້ນ ເຈົ້າໜ້າທີ່ ບອກວ່າ ໄດ້ຈັບ ເຈົ້າຂອງ ແລະ ພະນັກງານ ບໍຣິສັດ ນັ້ນ ໄດ້ທຸກຄົນ ແລ້ວ ແຕ່ຜູ້ ເສັຽຫາຍ ຫຼາຍຄົນ ຍັງສົງໄສ ຢູ່ວ່າ ປັຈຈຸບັນ ຜູ້ທີ່ຕົວະ ເອົາເງິນ ພວກຂະເຈົ້າ ນັ້ນ ຖືກຂັງ ຢູ່ຄຸກ ແທ້ບໍ່? ຫລື ຖືກປະກັນ ຕົວອອກໄປ ຊົ່ວຄາວ ເພາະບໍ່ໄດ້ ເຫັນຂ່າວ ຈາກ ສື່ມວນຊົນ ໃດໆ ເລີຍ.
ຢ່າງໃດກໍຕາມ ເອເຊັຽ ເສຣີ ກໍໄດ້ ຕິດຕໍ່ໄປຍັງ ກົມ ຕໍາຣວດ ເສຖກິດ ໃນ ນະຄອນຫຼວງ ວຽງຈັນ ໄດ້ ຄໍາຕອບ ສັ້ນໆວ່າ ປັຈຈຸບັນ ກໍາລັງເຮັດ ຄະດີ ນີ້ຢູ່ ແຕ່ບໍ່ໄດ້ ເປີດເຜີຍ ເພີ່ມ ຕື່ມວ່າ ຜູ້ຕ້ອງຫາ ທີ່ ຮ່ວມກັນ ຕົວະເອົາເງິນ ປະຊາຊົນ ນັ້ນ ຍັງຖືກ ກັກຂັງ ຫລືບໍ່.
ບໍຣິສັດ ແມັກຄິສ ໄດ້ເອົາເງິນ ຈາກ ປະຊາຊົນ ແລະ ພະນັກງານ ຣັຖກອນ ໂດຍອ້າງວ່າ ຈະນໍາໄປ ຫລີ້ນຮຸ້ນ ແລກປ່ຽນ ເງິນ ຢູ່ ຕ່າງປະເທດ ແລ້ວຈະສົ່ງ ເງິນຄືນ ທັງຕົ້ນ ທັງກໍາໄຣ ໃຫ້ຜູ້ທີ່ ຮ່ວມຮຸ້ນ ນໍາ ທັງໝົດ ເຮັດໃຫ້ ມີຜູ້ຫລົງເຊື່ອ ຈໍານວນ ຫລາຍ. ແຕ່ຕໍ່ມາ ບໍຣິສັດ ດັ່ງກ່າວ ບໍ່ໄດ້ຄືນ ເງິນໃຫ້ ປະຊາຊົນ ຕາມ ທີ່ ຕົກລົງກັນ ໄວ້. ດັ່ງນັ້ນ ຜູ້ເສັຽຫາຍ ຈຶ່ງພາກັນ ໄປ ແຈ້ງຄວາມ ອັນເປັນເຫດ ໃຫ້ ບໍຣິສັດ ແມັກຄິສ ຕ້ອງໄດ້ປິດ ກິຈການ ໄປ.
