ໃນວັນທີ 6 ມິຖຸນາ ນີ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ຕິດຕາມຊຸກຍູ້ ການຈັດຕັ້ງປະຕິບັດ ໂຄງການຊອກຄົ້ນ-ສຳຫລວດຂຸດຄົ້ນ-ປຸງແຕ່ງແຮ່ຄຳ ທີ່ ເຂດວັງຕັດໃຫຍ່ ເມືອງຊານໄຊ ແຂວງ ອັດຕະປື ເຊິ່ງມີຮອງເຈົ້າແຂວງໆອັດຕະປື, ພະແນກ ການທີ່ກ່ຽວຂ້ອງ ແລະ ຄະນະອຳນວຍການ ຜູ້ຮັບຜິດຊອບໂຄງການ ໃຫ້ການຕ້ອນຮັບ.ທ່ານ ພົງໄຊ ໄຊຊະນະເສນາ ອຳນວຍການກຸ່ມບໍລິສັດ ລັດພັດທະນາຊົນນະບົດໃໝ່ ໄດ້ລາຍງານໃຫ້ຊາບ ກ່ຽວກັບຄວາມຄືບໜ້າຂອງໂຄງການດັ່ງກ່າວ, ເຊິ່ງໄດ້ຮ່ວມທຸລະກິດກັບບໍລິສັດຫຸ້ນສ່ວນຫວຽດນາມ-ລາວ ແຫ່ງ ສສ ຫວຽດນາມ ນັບແຕ່ເດືອນພະຈິກ 2006 ເປັນຕົ້ນມາ ໃນເນື້ອທີ່ການຊອກຄົ້ນ ແລະ ສຳຫລວດ ເກືອບ 400 ກິໂລຕາແມັດ, ກວມເອົາເມືອງດາກຈຶງ ແຂວງເຊກອງ ແລະ ເມືອງຊານໄຊ ແຂວງ ອັດຕະປື ລວມມູນຄ່າການລົງທຶນ 50 ລ້ານໂດລາສະຫະລັດ, ໄດ້ມອບພັນທະເຂົ້າກອງທຶນພັກ ຫ້ອງວ່າການສູນກາງພັກ ລວມນ້ຳໜັກຄຳກວ່າ 600 ກິໂລ ແລະ ມອບພັນທະຄ່າເຊົ່າສຳປະທານເນື້ອທີ່ດິນ ແລະ ອາກອນເງິນເດືອນ ໃຫ້ລັດຖະບານ ແລ້ວກວ່າ 290 ພັນໂດລາສະຫະລັດ. ນອກຈາກນີ້, ບໍລິສັດ ຍັງໄດ້ເອົາໃຈໃສ່ ໃນການຄຸ້ມຄອງສິ່ງແວດລ້ອມ, ສັງຄົມ ແລະ ທຳມະຊາດ, ການຊ່ວຍເຫລືອສັງຄົມ ແລະ ການປະກອບສ່ວນ ພັດທະນາທ້ອງຖິ່ນ ເປັນຕົ້ນ ປະກອບສ່ວນທຶນຮອນມູນຄ່າ 1 ແສນໂດລາສະຫະລັດຕໍ່ປີ ເຂົ້າໃນການພັດທະນາເຂດວັງຕັດ ເມືອງຊານໄຊ, ປິ່ນປົວພະຍາດ, ແຈກຢາຍຢາ ແລະ ເຂົ້າສານໃຫ້ປະຊາຊົນຢູ່ບ້ານອ້ອມຂ້າງ ໂດຍບໍ່ເສຍຄ່າ, ປະກອບສ່ວນຊ່ວຍເຫລືອ ໃນເວລາເກີດໄພພິບັດທຳມະຊາດ, ນຳພາຕົວແທນປະຊາຊົນຢູ່ບ້ານອ້ອມຂ້າງ ໄປທັດສະນະສຶກສາ ກ່ຽວກັບການພັດທະນາບ້ານ ແລະ ບ້ານວັດທະນະທຳ ຢູ່ ສສ ຫວຽດນາມ ລວມເຖິງການສົ່ງເສີມ ການຜະລິດກະສິກຳ ເປັນຕົ້ນ ການປູກກາເຟ, ພິກໄທ ແລະ ມີການເກັບຊື້ນຳປະຊາຊົນ ເພື່ອຮັບປະກັນລາຍໄດ້ ໃຫ້ແກ່ປະຊາຊົນ.ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍ ຕໍ່ຜົນສຳເລັດ ຂອງການຈັດຕັ້ງປະຕິບັດໂຄງການ ເຊິ່ງປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ກໍຄືການພັດທະນາທ້ອງຖິ່ນ. ຢ່າງໃດກໍຕາມ ດ້ວຍເນື້ອໃນຈິດໃຈ ຂອງສູນກາງພັກ ແລະ ລັດຖະບານ ໄດ້ຫັນເອົາບັນດາໂຄງການນີ້ ທີ່ຂຶ້ນກັບກອງທຶນພັກ ແລະ ປ້ອງກັນຊາດ-ປ້ອງກັນຄວາມສະຫງົບ ໃຫ້ຢູ່ໃນການຄຸ້ມຄອງຂອງລັດຖະບານ ຕາມລະບຽບກົດໝາຍ ແລະ ສອດຄ່ອງກັບກົດໝາຍ ວ່າດ້ວຍການສົ່ງເສີມການລົງທຶນ, ໂດຍທີ່ບັນດາໂຄງການເຫລົ່ານັ້ນ ສາມາດດຳເນີນກິດຈະການຂອງຕົນ ຕໍ່ໄປຢ່າງຕໍ່ເນື່ອງ ແລະ ເປັນກຳລັງແຮງໃຫ້ແກ່ການຊ່ວຍແກ້ໄຂຄວາມທຸກຍາກ ຂອງປະຊາຊົນ. ພ້ອມດຽວກັນນັ້ນ, ໃຫ້ເອົາໃຈໃສ່ການຄຸ້ມຄອງແຮງງານ, ການໂຄສະນາອົບຮົມ ພໍ່ແມ່ປະຊາຊົນ ທີ່ນອນຢູ່ໃນໂຄງການ ໃຫ້ມີຄວາມເຂົ້າໃຈ ເຖິງລະບຽບກົດໝາຍ, ຄວາມຈຳເປັນ ແລະ ຜົນໄດ້ຮັບຈາກການພັດທະນາໂຄງການ ທັງເປັນການສ້າງວຽກເຮັດງານທຳ ແລະ ການຜະລິດສະບຽງອາຫານໃຫ້ແກ່ໂຄງການ.ທ່ານຮອງນາຍົກລັດຖະມົນຕີ ຍັງໄດ້ເນັ້ນຢ້ຳໃຫ້ບໍລິສັດ ເອົາໃຈໃສ່ວຽກງານຊົດເຊີຍຜູ້ທີ່ໄດ້ຮັບຜົນກະທົບ ຕິດພັນກັບການຈັດສັນອາຊີບຄົງທີ່, ຫັນຈາກການເຮັດໄຮ່ເລື່ອນລອຍ ໄປສູ່ການການປູກ-ການລ້ຽງ ເປັນຕົ້ນ ການປູກໄມ້ອຸດສາຫະກຳ ເພື່ອເປັນການຈັດຕັ້ງຜັນຂະຫຍາຍຄຳສັ່ງ 15/ນຍ ໃຫ້ປະກົດຜົນເປັນຈິງ, ປະກອບ ສ່ວນເຮັດໃຫ້ມີພື້ນທີ່ປ່າໄມ້ປົກຫຸ້ມ 70% ໃນປີ 2020, ທັງສົ່ງເສີມການຜະລິດເປັນສິນຄ້າເປົ້າໝາຍ ຕິດພັນກັບການເກັບຊື້ ແລະ ຕະຫລາດຈຳໜ່າຍທີ່ແນ່ນອນ.
