ເຂື່ອນອາຈມີສ່ວນ ໃຫ້ເກີດແຜ່ນດິນໄຫວ
ໂຄງການ ສ້າງ ເຂື່ອນ ໄຊຍະບຸຣີ ຂອງລາວ ອາດເພີ້ມ ຄວາມສ່ຽງ ກໍ່ໃຫ້ເກີດ ແຜ່ນດິນໄຫວ ໃນ ພູມີພາກ ນີ້ຫລາຍຂຶ້ນ ຕື່ມໄດ້ ຍ້ອນວ່າ ໃນເຂດນີ້ ມີການ ເໜັງຕີງ ຂອງ ພື້ນດິນ ຫຼາຍ ຢູ່ແລ້ວ.
RFA
ແຜນທີ່ໂຄງຮ່າງ ຂອງເຂື່ອນ ໄຊຍະບູຣີ ຊື່ງຍັງຈະດໍາເນີນຕໍ່ໄປ
ຄໍາເຕືອນ ດັ່ງກ່າວ ອອກມາ ຈາກການ ຄົ້ນຄວ້າ ຂອງ ທ່ານ Nguyen Hong Phuong ນັກວິໄຈ ຈາກສູນ ຄົ້ນຄວ້າ ແຜ່ນດິນໄຫວ ແລະ ຊຸນາມິ ຂອງ ວຽດນາມ, ທີ່ຢ້ານວ່າ ເຂື່ອນ ຂນາດໃຫຍ່ ຈະເພີ້ມ ຄວາມ ບໍ່ທຸ່ນທ່ຽງ ຂອງ ພື້ນດິນ ແລະ ກະທົບ ກະເທືອນ ຕໍ່ລະບົບ ນິເວຊວິທຍາ ໃນ ແມ່ນໍ້າຂອງ ແລະ ຊີວິດ ການເປັນຢູ່ ຂອງ ຜູ້ຄົນທີ່ອາສັຍຢູ່ຕາມແຄມຝັ່ງແມ່ນໍ້າຂອງ ຫລາຍລ້ານຄົນ ໃນລາວ, ກໍາພູຊາ ແລະວຽດນາມ.
ນັກຄົ້ນຄວ້າ ຊາວວຽດນາມ ກ່າວວ່າ ໂຄງການ ສ້າງເຂື່ອນ ທີ່ຈະຜລິດ ກະແສ ໄຟຟ້າໄດ້ 1,260 ເມັກກະວັດ ຈະຕັ້ງຢູ່ ປະມານ 100 ກິໂລແມັດ ທາງໃຕ້ ຂອງ ພື້ນທີ່ Lai Chau-Dien Bien ຊຶ່ງເປັນ ພື້ນທີ່ ທີ່ມີ ຄວາມສ່ຽງສູງ ຕໍ່ເຫດ ແຜ່ນດິນໄຫວ.
ທ່ານ ອຸປທູຕ ການຄ້າ ວຽດນາມ ປະຈໍາ ນະຄອນຫລວງ ພະນົມເປັນ ທ່ານ Tran Tu ກ່າວວ່າ “ຫລັງຈາກ ເຫດ ຊຸນາມິ ໃນຍີ່ປຸ່ນ ທ່ານເຫັນວ່າ ຄໍາເຕືອນ ໃນລາຍງານ ນັ້ນ ມີຄວາມ ສໍາຄັນ ທີ່ສຸດ ແລະ ຕ້ອງມີ ການສຶກສາ ເພີ້ມເຕື່ອມ ຄັກແນ່ ກ່ອນການ ປະກາດ ກໍ່ສ້າງ ເຂື່ອນ ໃນເຂດດັ່ງກ່າວ.
ໃນການ ໃຫ້ສໍາພາດ ຢູ່ ນະຄອນຫລວງ ຮາໂນຍ ຂອງທ່ານ ວິຣະພົນ ວິຮະວົງ ເອກອະທິບໍດີ ກະຊວງ ພລັງງານ ແລະ ບໍ່ແຮ່ ຂອງລາວ ເວົ້າວ່າ ໂຄງການ ກໍ່ສ້າງ ຈະເລີ້ມ ພາຍໃນ ທ້າຍປີ 2011 ນີ້, ຕາມ ລາຍງານ ຂອງ ບໍຣິສັດ ການເງິນ Bloomberg.
ອີງຕາມ ອົງການ ເຄື່ອນໄຫວ ເພື່ອ ສິດທິມະນຸດ ການກໍ່ສ້າງ ເຂື່ອນ ຂນາດໃຫຍ່ ໄດ້ເລີ້ມມາ ຕັ້ງແຕ່ ທ້າຍປີ 2010 ເຖິງວ່າ ຣັຖບານ ສປປລາວ ໄດ້ ຢືນຢັນ ວ່າ: ຈະຕ້ອງ ສຶກສາ ຜົນກະທົບ ຕໍ່ສິ່ງແວດລ້ອມ ກ່ອນກໍຕາມ.
