ຊາວບ້ານ ຕາມເຂຕ ຊົນນະບົດ ບໍ່ມີເງິນ ພຽງພໍ ສຳລັບ ສູ້ ຄະດີຕ່າງໆ ຈຶ່ງເປັນ ຝ່າຍ ເສັຽປຽບ ມາຕລອດ.
RFA
ຊາວບ້ານ ໃນເຂດ ຊົນນະບົດ ເມືອງສີງ ແຂວງຫຼວງນໍ້າທາ
ເມື່ອມີກາຣ ຟ້ອງຮ້ອງ ຫລືມີ ຄະດີຄວາມ ຕ່າງໆ ຕາມເຂຕ ຊົນນະບົທ ໃນເມືອງລາວ ຣະຫວ່າງ ນາຍທຶນ ກັບຊາວບ້ານ ສ່ວນໃຫຍ່ ຈະກ່ຽວພັນ ກັບເຣື່ອງ ສັມປະທານ ທີ່ດິນ, ກາຣກົດຂີ່ ແຮງງານ, ກາຣ ຄ້າມະນຸສ ຫລືດ້ານ ບໍຣິກາຣ ທາງເພສ ກໍຕາມ ສ່ວນຫຼາຍ ຜູ້ມີ ອຳນາຈ ມີເງິນ ພ້ອມທີ່ ຈະສູ້ ຄະດີ ຢູ່ສເມີ ຊຶ່ງແຕກຕ່າງ ກັບ ປະຊາຊົນ ທັມມະດາ ທີ່ເປັນ ຜູ້ພ່າຍແພ້ ຕລອດ ເວລາ. ດັ່ງເຈົ້າ ໜ້າທີ່ ອົງກາຣ ສາກົລ ທີ່ ໃຫ້ການ ຊ່ວຍເຫລືອ ເຣື່ອງຄະດີ ຄວາມ ຢູ່ເມືອງລາວ ໄດ້ກ່າວວ່າ:
"ສ່ວນຫລາຍຄົນ ຢູ່ໃນ ຊົນນະບົດ ຫ່າງໄກ ບາງຄັ້ງ ກໍມີເຣື່ອງ ກາຣຄ້າມະນຸສ ຫລືວ່າ ກາຣທາຣຸນ ເນາະ ທຸກ ກໍຣະນີ ບໍ ຄວາມສາມາຕ ທີ່ວ່າ ຈະສູ້ ຄະດີ ຫລືວ່າ ບໍ່ມີ ຄວາມສາມາຕ ຈະຈ້າງ ທະນາຍ ຄວາມ ຫລືວ່າ ບໍ່ຮູ້ ເຣື່ອງ ກົດໝາຍ ຫຍັງ ຈັງຊີ້ເນາະ ເກີດຄະດີ ຂຶ້ນມາ ເຂົາຈະເຣັດ ແນວໃດ ເຂົາ ບໍ່ຮູ້ເລີຽ ຕົວຢ່າງ".
ພ້ອມດຽວ ກັນນີ້ ຍານາງກໍວ່າ ຊາວບ້ານ ສ່ວນຫລາຍ ມີອາຊີພ ປູກຝັງ ທີ່ມີ ຣາຍໄດ້ຕໍ່າ ສະເລັ່ຽ ປະມານ 40,000 ກີບ ເທົ່ານັ້ນ ຕໍ່ເດືອນ ຖືວ່າເປັນ ຈຳນວນ ທີ່ໜ້ອຍ ແລະ ບໍ່ສາມາຕ ທີ່ຈະໄປຈ້າງ ທະນາຍຄວາມ ເພື່ອສູ້ ຄະດີ ໄດ້ ແຕ່ຢ່າງໃດ, ພ້ອມທັງ ຄ່າເດີນທາງ ເຂົ້າ ນະຄອນຫລວງ ວຽງຈັນ ທີ່ ຍິ່ງເພີ້ມ ລາຍຈ່າຍ ຕື່ມອີກ ແລະ ຖ້າມີກາຣ ສູ້ຄະດີ ບາງຄັ້ງ ກໍຈຳເປັນ ຕ້ອງກູ້ ຢືມເງິນ ຈາກພີ່ນ້ອງ ຫຼືໝູ່ເພື່ອນ ທີ່ ຍິ່ງສ້າງ ບັນຫາ ເຂົ້າໄປ ຕື່ມອີກ.
ປັຈຈຸບັນ ຄະດີ ຄວາມ ສ່ວນຫລາຍ ມັກຈະເປັນ ກໍຣະນີ ຂັດແຍ່ງ ຣະຫວ່າງ ນາຍທຶນ ກັໍບ ຊາວບ້ານ ເຖິງວ່າ ຈະມີ ອົງກາຣ NGOs ໃຫ້ກາຣ ຊ່ວຍເຫລືອ ດ້ານຄ່າ ໃຊ້ຈ່າຍ ຫລືໃຫ້ ຄວາມຮູ້ ດ້ານກົດໝາຍ ກໍດີ ແຕ່ກໍຍັງ ບໍ່ພຽງພໍ.
