ປະຊາຊົນ ແຂວງ ຜົ້ງສາລີ ບໍ່ເຫັນ ພ້ອມນຳ ທີ່ ທາງ ຣັຖບາລ ສປປລາວ ຈະ ອະນຸຍາຕ ໃຫ້ຈີນ ສ້າງ ໂຮງກາສີໂນ ຕື່ມອີກ.
RFA
ຕົວຢ່າງ ບ່ອນຫຼີ້ນ ການພະນັນ ກາງແຈ້ງ ໃນແຂວງບໍ່ແກ້ວ ທີ່ມີຂື້ນ ເກືອບທຸກ ໂອກາດ ເວລາມີ ງານບຸນ ຄົບງັນຕ່າງໆ
ປະຊາຊົນ ແຂວງ ຜົ້ງສາລີ ບໍ່ເຫັນພ້ອມນໍາ ທີ່ ທາງກາຣ ສປປລາວ ຈະ ອະນຸຍາຕ ໃຫ້ຈີນ ສ້າງໂຮງ ກາສີໂນ ຢູ່ເມືອງ ຍອດອູ ຕື່ມອີກ ຍ້ອນວ່າ ປັຈຈຸບັນນີ້ ກໍມີ ໂຮງກາສີໂນ ທີ່ຜິດ ກົດໝາຍ ຂອງ ຊາວຈີນ ຢູ່ແລ້ວ ຊຶ່ງ ກໍເຕັມ ໄປດ້ວຍ ອາຊຍາກັມ ແລະ ບັນຫາ ສັງຄົມ ຕ່າງໆ ຢ່າງຫຼວງຫຼາຍ ຢູ່ແລ້ວ. ດັ່ງຊາວບ້ານ ຜູ້ນື່ງເວົ້າວ່າ:
"ຢູ່ເຂຕ ເມືອງ ຍອດອູ ເຂົາເຈົ້າ ກະບໍ່ເຫັນດີ ປານໃດ ອັນນີ້ມັນ ເຣື່ອງຈິງ ຢູ່ຍອດອູ ຜ່ານມາ ມັນກະມີ ບັນຫາ ສັງຄົມ ໄດ້ຍິນ ວ່າມັນ ຈະມີ ຄົນຂີ້ລັກ ອັນສອງມາ ກະແມ່ນ ບັນຫາ ສັງຄົມ ເຣື່ອງແມ່ຈອກ ແມ່ຈ້າງ ເຣື່ອງ ນັກຫລອກ ນັກເລງຕ່າງໆ ສ່ວນຫລາຍ ກະແມ່ນ ຄົນຈີນ ມາສ້າງ ບັນຫາ".
ຊາວບ້ານ ດັ່ງກ່າວ ໄດ້ແຈ້ງ ເພີ່ມວ່າ ຜູ້ເຂົ້າ ໄປຫລິ້ນ ກາຣພະນັນ ຢູ່ໂຮງ ກາສີໂນ ທີ່ມີແລ້ວ ຢູ່ ເມືອງຍອດອູ ໃນປັຈຈຸບັນ ນີ້ນັ້ນ ກໍມີແຕ່ ຊາວ ຕ່າງປະເທສ ຊຶ່ງສ່ວນຫລາຍ ກໍເປັນ ຊາວຈີນ ແລະ ມັກຈະມີ ບັນຫາ ຕ່າງໆ ເກີດຂຶ້ນ ເລື້ອຍໆ ໂດຽທາງກາຣ ລາວ ກໍບໍ່ສາມາຕ ທີ່ຈະ ເຂົ້າໄປ ຄວບຄຸມ ໄດ້ແຕ່ ຢ່າງໃດ ເຊັ່ນບັນຫາ ລັກຊັພ ກາຣປຸ້ນຈີ້ ລັກລອບ ຄ້າຂາຍ ຢາເສພຕິດ ແລະ ກາຣຄ້າ ປະເວນີ ຕ່າງໆ ຕລອດຮອດ ບັນຫາ ຄາຕກັມ ຍ້ອນມີ ໜີ້ສິນ ໂດຽກຸ່ມ ມາເຟັຽ Mafia ຊາວຈີນ ຊຶ່ງທັ້ງໝົດ ແມ່ນເກີດຈາກ ບັນຫາ ຂອງ ກາຣຫລິ້ນ ກາຣພະນັນ ທັ້ງນັ້ນ.
ແນວໃດ ກໍຕາມ ໂຄງກາຣ ສ້າງໂຮງ ກາສີໂນ ແຫ່ງໃໝ່ ດັ່ງກ່າວ ແມ່ນຢູ່ ໃນແຜນ ດຽວກັນກັບ ໂຄງຮ່າງ ສ້າງ ເສຖກິຈ ພິເສດ ຢູ່ ເມືອງຍອດອູ ທີ່ ທາງກາຣ ສປປລາວ ວ່າຈະເຣີ່ມ ສ້າງພາຍ ໃນປີ 2015 ໂດຽແມ່ນ ກຸ່ມຜູ້ ລົງທຶນ ຊາວຈີນ ເປັນຜູ້ ໄດ້ຮັບ ສັມປະທານ ເພື່ອສ້າງຂຶ້ນ ໃຫ້ຖືກຕ້ອງ ຕາມ ກົດໝາຍ.
