Tyler Chapman

ບ່ອນຈ່າຍຢາ ທີ່ໂຮງໝໍ ມະໂຫສົດ ນະຄອນຫຼວງ ວຽງຈັນ

ເຈົ້າໜ້າທີ່ ຈາກ ອົງການ ສົ່ງເສີມ ການແພດ ສາກົນ ໃນລາວ ເປີດເຜີຍວ່າ ໂຮງໝໍ ໃນຫລາຍໆ ແຂວງ ໃນລາວ ຍັງຂາດແຄນ ອຸປກອນ ການແພດ ເຮັດໃຫ້ ການປິ່ນປົວ ຄົນເຈັບ ບໍ່ມີ ປະສິດທິພາບ ໂດຍສະເພາະ ແມ່ນ ໂຮງໝໍນ້ອຍ ໂຮງໝໍເມືອງ ຍ້ອນວ່າ ງົບປະມານ ຊື້ອຸປກອນ ຕ່າງໆ ໄປບໍ່ຮອດ. ເຈົ້າໜ້າທີ່ ເວົ້າວ່າ:

"ຈະມີ ຫົວພັນ, ຊຽງຂວາງ, ຄໍາມ່ວນ, ເຊກອງ ອັດຕະປື ເຄື່ອງມື ຂະເຈົ້າ ກໍຍັງ ບໍ່ທັນມີ ຄວາມສາມາດ ບາງເທື່ອ ຮຽນມາແລ້ວ ແຕ່ວ່າ ບໍ່ໄດ້ໃຊ້ ບໍ່ມີເຄື່ອງມື ໃຫ້ນໍາໃຊ້ ບາງເທື່ອ ຂະເຈົ້າ ມີຄວາມ ສາມາດ ແຕ່ຂາດ ອຸປກອນ".

ນາງເວົ້າອີກວ່າ ໂຮງໝໍນ້ອຍໆ ໃນລາວ ສ່ວນຫລາຍ ຍັງບໍ່ໄດ້ ມາຕຖານ ຍ້ອນສາເຫດ ການຂາດ ອຸປກອນ, ຈໍາເປັນ ຕ້ອງໄດ້ ສົ່ງຄົນເຈັບ ໄປ ໂຮງໝໍແຂວງ ໂຮງໝໍໃຫຍ່ ຊຶ່ງເຮັດໃຫ້ ສ່ຽງຕໍ່ ການເສັຍ ຊີວິດ ຫລາຍຂຶ້ນ. ນາງເວົ້າວ່າ ຈາກການ ສໍາຮວດ ພົບວ່າ ໂຮງໝໍ ຂນາດນ້ອຍ ພາຍໃນ ແຂວງ ຈະໄດ້ຮັບ ງົບປະມານ ໜ້ອຍ ບໍ່ພຽງພໍ ເພື່ອຊື້ ອຸປກອນ ການແພດຕ່າງໆ ນາຍໝໍ ກໍມີໜ້ອຍ.

ຕາມສະຖິຕິ ພົລເມືອງ ລາວ ມີອາຍຸ ສເລັ່ຍ ບໍ່ເຖິງ 60 ປີ, ມີນາຍໝໍ 60 ຄົນ ຕໍ່ ປະຊາກອນ 1 ແສນຄົນ. ສ່ວນປະເທດ ໃກ້ຄຽງ ຈະມີ ນາຍໝໍ ສເລັ່ຍ ຫລາຍກວ່າ 100 ຄົນ ຕໍ່ພົລເມືອງ 1 ແສນຄົນ. ສ່ວນຢູ່ຈີນ ຈະມີ ນາຍໝໍ 151 ຄົນຕໍ່ ປະຊາກອນ 1 ແສນຄົນ.