ສະຖານທູຕ ລາວ ຍັງບໍ່ມີ ແຜນຊ່ວຍເຫລືອ ຄົນງານ ລາວ ທີ່ໄດ້ຮັບ ຜົນກະທົບ ຈາກໄພ ນໍ້າຖ້ວມ ໃນ ປະເທດໄທ.
RFA
ຄົນງານລາວ ສ່ວນນື່ງ ທີ່ ປະສົພພັຍ ນໍ້າຖ້ວມ ໃນເຂດ ອະຢຸທຢາ ຊື່ງກໍາລັງ ພັກຢູ່ສູນ ຮອງຮັບ ມະຫາວິທຍາໄລ ທັມມະສາຕ ຣັງສິດ
ຫລັງຈາກ ມີລາຍງານ ວ່າ ຄົນງານລາວ ຈໍານວນນື່ງ ຢູ່ໂຮງງານ ແຂວງ ອະຢຸທຢາ ແລະ ປະທຸມທານີ ຂອງໄທ ກໍຢູ່ໃນ ຈໍານວນ ທີ່ຖືກ ປະສົບໄພ ນໍ້າຖ້ວມ ນັກຂ່າວ ວິທຍຸ ເອເຊັຽ ເສຣີ ກໍໄດ້ສອບຖາມ ໄປຍັງ ສະຖານທູຕ ລາວ ທີ່ ບາງກອກ ເພື່ອຢາກຊາບ ວ່າ ທາງການລາວ ມີແຜນ ຈະຊ່ວຍເຫລືອ ຄົນງານລາວ ວິທີໃດ. ເຈົ້າໜ້າທີ່ ສະຖານທູຕ ໄດ້ຕອບວ່າ ໃນເບື້ອງຕົ້ນ ນີ້ ບໍ່ທັນມີ ແຜນການໃດໆ ຮູ້ແຕ່ວ່າ ມີຄົນງານ ລາວ 157 ຄົນ ພັກຢູ່ສູນ ທັມມະສາຕ ຣັງສິດ ຕາມທີ່ ທ່ານໄດ້ກ່າວ ເປັນ ພາສາໄທວ່າ:
"ທັມມະສາດ ຣັງສິດ ເນາະ ດຽວນີ້ ກໍມີຄົນລາວ ຢູ່ສູນຫັ້ນ 157 ຄົນ ເປັນຄົນງານ ຖືກຕ້ອງ ຕາມກົດໝາຍ ມາເຮັດ ວຽກຢູ່ ໂຮງງານ ທີ່ນໍ້າຖ້ວມ ຢູ່ ອະຢຸທຢາ ເຈົ້າໜ້າທີ່ ໄດ້ປະສານງານ ມາ ສະຖານທູດ ວ່າຖ້າ ນໍ້າ ຍັງບໍ່ບົກລົງ ກໍຕ້ອງພັກ ຢູ່ຫັ້ນ ເສັຽກ່ອນ ເຈົ້າໜ້າທີ່ ໂຮງງານ ປະສານມາ ແນວໃດ ທາງສະຖານທູຕ ຈະຊ່ວຍ ເຫລືອຕື່ມ".
ນອກນັ້ນ ທາງສະຖານທູຕ ລາວ ບອກວ່າ ເຈົ້າໜ້າທີ່ ສະຖານທູດ ໄດ້ໄປ ຢ້ຽມຢາມ ຄົນງານລາວ ຢູ່ສູນ ຜູ້ປະສົບໄພ ນໍ້າຖ້ວມ ມະຫາວິທຍາໄລ ທັມມະສາຕ ພ້ອມທັງໄດ້ ນໍາອາຫານ ແຫ້ງ ແລະ ນໍ້າດື່ມ ໄປໃຫ້. ສໍາລັບການ ສົ່ງກັບຄືນ ປະເທດ ຫລືວ່າການ ຊ່ວຍເຫລືອ ດ້ານອື່ນໆນັ້ນ ທາງສະຖານທູດ ຕ້ອງລໍຖ້າ ທາງການໄທ ຕິດຕໍ່ ແລະ ປະສານງານ ກັນ ຕື່ມອີກ.
