ກຸ່ມ ບໍຣິສັດ ກໍ່ສ້າງ ຈີນ ມີໂຄງການ ຈະ ສ້າງເຂື່ອນ ໄຟຟ້າ ໃສ່ ແມ່ນໍ້າຂອງ ໃນລາວ.
internationalrivers.org (Marcus Rhinelander)
ການກໍ່ສ້າງເຂື່ອນ ກໍາໄຊ ໃນກໍາພູຊາ ປີ 2008 ຂອງກຸ່ມ ບໍຣິສັດ Sinohydro ຂອງຈີນ
ກຸ່ມ ບໍຣິສັດ Sinohydro ຂອງ ທາງການຈີນ ຈະເປີດຂາຍຫຸ້ນ ຂອງ ບໍຣິສັດ ໃນຕລາດ ຫລັກຊັພ ຢູ່ຊຽງຮາຍ ປະເທດຈີນ ຍ້ອນຕ້ອງການ ທຶນ 13.5 ຕື້ຢວນ ຫລືຫລາຍ ກວ່າ 16 ຕື້ໂດລາ ຮົງກົງ ເພື່ອເອົາມາ ໃຊ້ຈ່າຍ ໃນການຂຍາຍ ໂຄງການ ສ້າງ ເຂື່ອນໄຟຟ້າ ຊຶ່ງ ໃນປັດຈຸບັນ ທາງ ບໍຣິສັດ ມີໂຄງການ ສ້າງເຂື່ອນ ທີ່ກໍາລັງ ສ້າງຢູ່ ແລະ ທີ່ເສັດສິ້ນ ໄປແລ້ວ ໃນຫລາຍກວ່າ 50 ປະເທດ. ກຸ່ມບໍຣິສັດ Sinohydro ຂອງ ທາງການຈີນ ເປັນ ບໍຣິສັດ ສ້າງເຂື່ອນ ໃຫຍ່ທີ່ສຸດ ໃນໂລກ ແລະ ໄດ້ສ້າງເຂື່ອນ 2/3 ພາຍໃນ ປະເທດ ແລະ ເຄິ່ງນຶ່ງ ຂອງຈໍານວນ ເຂື່ອນ ໃນໂລກ.
ເຈົ້າໜ້າທີ່ ປະສານງານ ອົງການ ແມ່ນໍ້າສາກົນ ນາງ Grace Mang ກ່າວວ່າ ປັດຈຸບັນ ທາງກຸ່ມ ບໍຣິສັດ Sinohydro ກໍາລັງ ຈະສິ້ນສຸດ ການສຶກສາ ຄວາມ ເປັນໄປໄດ້ ຂອງ ໂຄງການ ສ້າງເຂື່ອນ ເມືອງ ປາກລາຍ ແຂວງ ໄຊຍະບຸຣີ ໃສ່ ແມ່ນໍ້າຂອງ ໃນລາວ ຊຶ່ງເປັນ ນຶ່ງໃນ 9 ເຂື່ອນ ທີ່ລາວ ມີໂຄງການ ຈະສ້າງ. ເຂື່ອນດັ່ງກ່າວ ຈະທໍາລາຍ ຊີວະນາໆພັນ ໃນ ແມ່ນໍ້າຂອງ ແລະ ຊີວິດ ການເປັນຢູ່ ທີ່ອຸດົມ ສົມບູນ ຂອງ ປະຊາຊົນ ຫລາຍລ້ານຄົນ ທີ່ ອາສັຍ ແມ່ນໍ້າຂອງ ເປັນແຫລ່ງ ອາຫານ ການກິນ, ເປັນແຫລ່ງ ສ້າງລາຍໄດ້ ແລະ ການຂົນສົ່ງ ຄົມມະນາຄົມ. ເຊັ່ນດຽວກັບ ເຂື່ອນ ໄຊຍະບຸຣີ ທີ່ຈະສ້າງ ໃສ່ ແມ່ນໍ້າຂອງ ທີ່ ບໍຣິສັດ ຊໍການຊ່າງ ຂອງໄທ ໄດ້ຮັບປະມູນ ໃນການ ກໍ່ສ້າງ.
ປັດຈຸບັນ ໄດ້ຖືກເລື່ອນ ການກໍ່ສ້າງ ໄປຍ້ອນ ບັນຫາ ຂັດແຍ່ງ ແລະ ຖືກຕໍ່ຕ້ານ ຢ່າງຮຸນແຮງ ຈາກ ປະເທດ ເພື່ອນບ້ານ ເຊັ່ນ ກໍາພູຊາ ແລະ ວຽດນາມ. ເຖິງຢ່າງໃດ ກໍຕາມ ການຕັດສິນໃຈ ເລີ້ມການ ກໍ່ສ້າງ ຄືນໃໝ່ ອາດຈະມີຂຶ້ນ ພາຍໃນ ເດືອນໜ້ານີ້.
ພາຍໃນ 2 ປີ ຜ່ານມາ ກຸ່ມບໍຣິສັດ Sinohydro ຂອງ ທາງການຈີນ ປະກາດວ່າ ໄດ້ສໍາເຣັດ ການສ້າງ ເຂື່ອນໄຟຟ້າ 2 ເຂື່ອນ ໃນຈໍານວນ 7 ໂຄງການ, ມູນຄ່າ 2 ຕື້ ໂດລາ ສະຫະຣັຖ ຊຶ່ງຮວມທັງ ເຂື່ອນນໍ້າອູ ໃນແຂວງ ຫລວງພຣະບາງ.
