ກາຊີໂນບໍ່ເຕັນ ກໍ່ໃຫ້ເກີດ ບັນຫາ ຄວາມຮຸນແຮງ ຂ້າ ປູ້ນ ຈີ້ ໃນເຂດ ແມ່ນໍ້າຂອງ
ກາຊີໂນ ເຂດ ສາມຫລ່ຽມຄໍາ ທີ່ ນັກລົງທຶນ ຈີນ ເປັນເຈົ້າຂອງ ໄດ້ສ້າງ ບັນຫາ ທາງ ອິດທິພົນ ລະຫວ່າງ ກຸ່ມແກ້ງ ໃນ ພູມີພາກ, ຈົນເກີດມີ ການລັດຂ້າ ລູກເຮືອ ຂົ່ນສົ່ງ ສິນຄ້າ ຂອງຈີນ 13 ຄົນ ໃນ ແມ່ນໍ້າຂອງ.ກະຊວງ ການຕ່າງ ປະເທດຈີນ ໄດ້ເປີດເຜີຍ ໃນວັນທີ 21 ຕຸລາ 2011 ວ່າ ເຈົ້າໜ້າທີ່ ທາງການ ຈີນແລະໄທ ຍັງສືບສວນ ການສັງຫານໂຫດ ເມື່ອວັນທີ 5 ຕຸລາ 2011 ນັ້ນຢູ່, ແຕ່ອົງການ ຂ່າວ ພາກໃຕ້ສຸດ ສັປດາ ລາຍງານວ່າ ຄວາມປອດພັຍ ຂອງ ຄົນງານ ຂົ່ນສົ່ງ ສິນຄ້າ ທາງເຮືອ ໃນ ແມ່ນໍ້າຂອງ ຂອງຈີນ ມີຄວາມສ່ຽງ ຫລາຍຂຶ້ນ ຫລັງຈາກທີ່ ກາຊີໂນ ຂອງກຸ່ມ ນັກທຸຣະກິີດ Kings Roman ຂອງຮົງກົງ ໄດ້ເປີດ ບໍຣິການ ມາ.
ປະທານ ບໍຣິສັດ ທ່ານ Zhao Wei ທີ່ ທາງການລາວ ໄດ້ແຕ່ງຕັ້ງ ໃຫ້ເປັນ ປະທານ ເຂດ ເສຖກິດພິເສດ ສາມຫລ່ຽມຄໍາ ໃຫ້ສໍາພາດ ຕໍ່ອົງການ ຂ່າວຈີນ ເມື່ອເດືອນ ພຶສພາ 2011 ວ່າ: ທ່ານເລີ້ມ ການລົງທຶນ ໃນເຂດ ສາມຫຼ່ຽມຄໍາ ເພື່ອຊ່ວຍເຫລືອ ປະຊາຊົນ ທ້ອງຖິ່ນ ໃຫ້ຫລຸດພົ້ນ ຈາກ ຄວາມທຸກຍາກ.
ອົງການຂ່າວ ພາກໃຕ້ ສຸດສັປດາ ຂອງຈີນ ລາຍງານວ່າ ຫລັງຈາກ ມີ ກາຊີໂນ ເກີດຂື້ນ ໃນເຂດ ໃກ້ຄຽງ ແມ່ນໍ້າຂອງ ມີຄວາມ ຫຍຸ້ງຍາກ ວຸ້ນວາຍ. ໃນລະຫວ່າງ ເດືອນ ເມສາ ຫາ ຕຸລາ 2011 ມີການປຸ້ນຈີ້ ເຮືອ ຂົນສົ່ງ ຢ່າງໜ້ອຍ 6 ເທື່ອ ແລະ ເຮືອຂົນສົ່ງ ສິນຄ້າ ກໍຖືກຂົ່ມຂູ່ ມາໄດ້ 2 ປີ ກວ່າແລ້ວ.
ມີລາຍງານວ່າ ທ່ານ Zhao ເຄີຍໄດ້ ຈ່າຍຄ່າໄຖ່ໂຕ ນັກພະນັນ ທີ່ຖືກຈີ້ ໃນເຮືອ Zheng Xin 1 ເມື່ອວັນທີ 3 ເມສາ ມາແລ້້ວ ຫລາຍກວ່າ 10 ລ້ານຢວນ ຫລື 12.1 ລ້ານ ໂດລາ ຮົງກົງ. ໃນເວລາ ດຽວກັນ ການເປີດ ກາຊີໂນ ໃນລາວ ຂອງທ່ານ Zhao ຍັງສ້າງ ຄວາມກົດດັນ ໃຫ້ຂູ່ແຂ່ງ ທຸຣະກິດ ການພະນັນ ໃນປະເທດ ພະມ້າ ນໍາອີກ
