ອົງການກວດສອບຂອງລາວ ພົບເງິນບໍ່ເຂົ້າງົບປະມານຈໍານວນຫລາ
ອົງການກອບສອບແຫ່ງລັດກວດສອບບັນຊີນອກລະບົບເຫັນວ່າຍັງມີເງິນ ລາຍຮັບວິຊາການ,ກອງທຶນ ແລະ ເງິນຂາຍໄມ້ທີ່ເກັບໄດ້ໃນສົກ 2009-2010 ແຕ່ບໍ່ມອບເຂົ້າງົບປະມານຢ່າງຄົບຖ້ວນ ພ້ອມນຳເງິນດັ່ງກ່າວຈ່າຍນອກແຜນ ແລະ ຝາກບັນຊີເງິນຝາກສະເພາະນອກລະບົບຄັງເງິນແຫ່ງຊາດ.
ທ່ານ ດຣ. ບົວສີ ລໍວັນໄຊ ປະທານອົງການກວດສອບແຫ່ງລັດລາຍງານຜົນການກວດສອບບົດສະຫລຸບຂາດຕົວ ງົບປະມານແຫ່ງລັດປະຈຳສົກປີ 2009-2010 ຕໍ່ກອງປະຊຸມສະພາສະໄຫມສາມັນເທື່ອທີ 2 ຂອງສະພາແຫ່ງຊາດຊຸດທີ VII ມື້ວານນີ້ວ່າ: ຜ່ານຈາກການກວດສອບບົດສະຫລຸບຂາດຕົວງົບປະມານແຫ່ງລັດປະຈຳສົກປີ 2009-2010 ທີ່ກະຊວງການເງິນ ໄດ້ສະຫລຸບ ແລະ ສັງລວມອົງການກວດສອບແຫ່ງລັດເຫັນວ່າລາຍຮັບ, ລາຍຈ່າຍ ແລະ ການດຸນດ່ຽງງົບປະມານຕາມການສັງລວມຂອງກະຊວງການເງິນເປັນແຕ່ລະ ຫົວຫນ່ວຍງົບປະ ມານແມ່ນຖືກຕ້ອງກັນ ໂດຍໄດ້ມີການກວດສອບບັນຊີນອກລະບົບເຫັນວ່າຍັງມີເງິນວິຊາການ, ເງິນກອງທຶນ ແລະ ເງິນຂາຍໄມ້ ທີ່ເກັບໄດ້ແລ້ວບໍ່ມອບເຂົ້າງົບປະມານຢ່າງຄົບຖ້ວນຊ້ຳບໍ່ ຫນຳ ຍັງໄປຈ່າຍນອກແຜນເອົາໄປຝາກໄວ້ບັນຊີເງິນສະເພາະທີ່ ນອກລະບົບຄັງເງິນແຫ່ງຊາດ.
ນອກຈາກນີ້ ຫນີ້ຕ້ອງຮັບ, ຫນີ້ຕ້ອງສົ່ງ, ເງິນລະດົມ, ເງິນຊ່ວຍເຫລືອດ້ານເປັນວັດຖຸ; ການປະຕິບັດໂຄງການນອກແຜນລວມທັງເງິນກູ້ຢືມນອກແຜນນຳທະນາຄານກໍ່ ບໍ່ມີການສັງລວມເຂົ້າບົດສະຫລຸບປິດບັນຊີງົບປະມານປະຈຳປີ ເຊິ່ງບໍ່ສອດຄ່ອງກັບມາດຕາ 9 ມາດຕາ 5 ຂອງກົດຫມາຍວ່າດ້ວຍການບັນຊີສະບັບປີ 2007.
ທ່ານ ດຣ. ບົວສີ ລໍວັນໄຊ ໃຫ້ ຮູ້ອີກວ່າ: ອົງການກວດສອບສາມາດກວດສອບໄດ້ 28 ຫົວຫນ່ວຍໃນນັ້ນມີ 16 ແຂວງ, ກອງ ທຶນບູລະນະທາງຫລວງມະຫາວິທະຍາໄລແຫ່ງຊາດ ແລະ 10 ກະຊວງໃນຈຳນວນເງິນລາຍຮັບວິຊາການຂອງ 28 ເປົ້າຫມາຍ ເກັບໄດ້ໃນປີ 2009-2010 ບວກຍອດທີ່ຍົກມາແຕ່ສົກກ່ອນລວມເປັນເງິນມີ 282,3 ຕື້ກວ່າກີບ ໃນນັ້ນ ມອບເຂົ້າງົບປະມານ 109,2 ຕື້ກວ່າກີບ ເອົາໄປຈ່າຍ ນອກແຜນມີ 24 ເປົ້າຫມາຍລວມເປັນເງິນ 114,9 ຕື້ກວ່າກີບຮອດເດືອນກັນຍາ 2010 ຍັງເຫລືອເປັນເງິນ 58,2 ຕື້ກວ່າກີບ ສຳລັບ 5 ໃນ 24 ເປົ້າຫມາຍທີ່ນຳເອົາເງິນໄປຈ່າຍນອກແຜນປະກອບມີນະຄອນຫລວງວຽງຈັນ, ແຂວງສະຫວັນນະເຂດ, ກະຊວງສຶກສາທິການ ແລະກີລາ, ມະຫາວິທະຍາໄລແຫ່ງຊາດ ແລະ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.
ດ້ານເງິນລາຍຮັບຈາກການຂາຍໄມ້ຂອງ 15 ເປົ້າຫມາຍເກັບໄດ້ 315,5 ຕື້ກວ່າກີບ ໃນນັ້ນ ມອບເຂົ້າງົບປະມານ 69,37 ຕື້ກີບ ເອົາໄປຈ່າຍນອກແຜນມີ 14 ເປົ້າຫມາຍລວມເປັນເງິນ 125,8 ຕື້ກີບຮອດເດືອນກັນຍາຍັງເຫລືອ 120,3 ຕື້ກວ່າກີບເຊິ່ງ 5 ໃນ 14 ເປັນຫມາຍທີ່ເອົ່າເງິນລາຍຮັບໄປຈ່າຍນອກແຜນມີ ແຂວງຈຳປາສັກ, ອັດຕາປື, ບໍລິຄຳໄຊ, ສະຫວັນ ນະເຂດ ແລະ ເຊກອງ.
ສ່ວນເງິນກອງທຶນຂອງລັດຍອດຍົກມາຈາກສົກປີກ່ອນລວມທັງເງິນທີ່ເກັບ ໄດ້ໃນສົກປີ 2009-2010 ເປັນ 67,08 ຕື້ກີບ ໃນນີ້ເອົາໄປຈ່າຍນອກແຜນ 54,9 ຕື້ກວ່າກີບຮອດເດືອນກັນຍາ 2010 ຍັງເຫລືອເປັນເງິນ 12,1 ຕື້ກວ່າກີບ ເຊິ່ງເປົ້າຫມາຍທີ່ຖືກກວດສອບມີກະຊວງໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່ ແລະ ກະຊວງສາທາລະນະສຸກ.
ແນວໃດ ກໍ່ດີທ່ານ ດຣ. ບົວສີ ລໍວັນໄຊ ກ່າວວ່າ: ສຳລັບແຜນຕົວເລກເກັບລາຍຮັບປີ 2009-2010 ລວມເປັນເງິນມີທັງຫມົດ 10,5 ພັນຕື້ກວ່າກີບ ແຕ່ 6 ເດືອນທ້າຍປີໄດ້ດັດແກ້ແຜນຂຶ້ນເປັນ 11,1 ພັນຕື້ກວ່າກີບປະຕິບັດຕົວຈິງໄດ້ 12,5 ພັນຕື້ກວ່າກີບ. ສ່ວນລາຍຈ່າຍມີທັງຫມົດ 12,4 ພັນຕື້ກວ່າກີບຖືກດັດແກ້ຂຶ້ນເປັນ 13,3 ຕື້ກວ່າກີບ ປະຕິບັດຕົວຈິງ 13,9 ພັນຕື້ກວ່າກີບ; ແຫລ່ງ ເງິນດຸ່ນດ່ຽງຕາມແຜນ 1,8 ພັນຕື້ກວ່າກີບຖືກດັດແກ້ເປັນ 2,2 ພັນຕື້ກວ່າກີບປະຕິບັດຕົວຈິງ 2,1 ຕື້ກວ່າກີບ ແລະ ຍອດເງິນເຫລືອງົບປະມານແຫ່ງລັດສົກ 2009- 2010 ເປັນເງິນທັງຫມົດ 728,5 ພັນຕື້ກວ່າກີບ.
