ຊາວລາວ ໃນປະເທດ ສ່ວນໃຫ່ຽ ນອກຈາກ ບໍ່ມີສິດ ໃນການ ສົນທະນາ ຫລືວິຈານ ເຣື້ອງການເມືອງ ແລ້ວຍັງບໍ່ກ້າ ອອກຄວາມຄິດເຫັນ ສ່ວນໂຕ ໃນເຣື່ອງ ການເມືອງ ຫລື ບັນຫາ ຂັດແຍ້ງຕ່າງໆ ໃນສັງຄົມ ຢ່າງ ເປີດເຜີຽ ເພາະຢ້ານວ່າ ຈະມີ ຜົນຮ້າຍ ຕໍ່ຕົນເອງ ຕາມທີ່ ຊາວລາວ ໃນແຂວງ ອຸດົມໄຊ ໄດ້ເວົ້າເປັນ ສໍານຽງໄທ ວ່າ:
"ອັນນີ້ມັນຍາກ ມັນເປັນສ່ວນໂຕ ມັນຕ້ອງຜ່ານ ຣັຖບານ ຖ້າເຮົາໃຫ້ ສັມພາດໄປ ໂລໆເລໆ ຈັກໜ້ອຍ ມັນບໍ່ດີ ໃຫ້ເຮົາເອງ".
ລາວບອກອີກວ່າ ປະເທດລາວ ປົກຄອງ ດ້ວຍພັກ ການເມືອງດຽວ ການສະແດງ ຄວາມຄິດເຫັນ ສ່ວນໂຕ ທີ່ບໍ່ກົງກັບ ແນວທາງຂອງ ຣັຖບານ ກໍຖືກຖືວ່າ ບໍ່ເຊື່ອໝັ້ນ ນໍາການນໍາພາ ຂອງຣັຖບານ. ຖ້າຫາກວ່າ ສົນທະນາ ເຣື້ອງການເມືອງ ຫລື ການຂັດແຍ້ງ ໃນສັງຄົມ ລະຫ່ວາງຣັຖ ກັບ ປະຊາຊົນ ແບບເປີດແປນ ແລ້ວມັນ ກໍຈະບໍ່ມີ ຄວາມປອດພັຍ ຕໍ່ຕົນເອງ.
ຊາວລາວ ອີກຄົນນື່ງ ທີ່ຕ້ອງການ ອອກຄວາມເຫັນ ສ່ວນໂຕວ່າ ບໍ່ມີໃຜມີສິດ ຈະຂັດແຍ້ງ ກັບ ຣັຖບານ:
"ບໍ່ມີຄວາມ ຂັດແຍ້ງ ບໍ່ກ້າສີ່ອອກ ເພາະມັນ ບໍ່ມີເຣື້ອງຫຍັງ ຜິດຂ້ອງ ຕ້ອງຖຽງ ກັບ ປະເທດຊາດ ເຮົາກໍບໍ່ອອກ ຄວາມເຫັນໄດ້ ບໍ່ມີສິດ ຂັດແຍ້ງກັນ ໃນ ປະເທດລາວ ຢູ່ໃນຄວາມສງົບ ແລະ ບໍ່ໃຫ້ມີ ເຣື້ອງຫຍັງ ກະທົບ ກະເທືອນ".
ປະຊາຊົນ ລາວ ຫລາຍຄົນ ກໍເວົ້າ ສຽງດຽວກັນວ່າ ຖ້າເຂົາອອກ ຄວາມເຫັນ ທີ່ຂັດກັບ ຣັຖບານ ເຂົາຢ້ານ ບໍ່ມີຄວາມ ປອດພັຍ.
