ປະຊາຊົນລາວປະສົບກັບບັນຫາຂັດແຍ່ງກ່ຽວກັບທີ່ດິນທໍາກິນ ແລະທີ່ຢູ່ອາໄສຫຼາຍ ຂຶ້ນຢ່າງຕໍ່ເນື່ອງ ໂດຍມີສາເຫດມາຈາກການໃຫ້ສໍາປະທານທີ່ດິນຂອງລັດຖະບານ ແລະອໍານາດປົກຄອງແຂວງຕ່າງໆ.
ເຈົ້າໜ້າທີ່ຂັ້ນສູງປະຈໍາຫ້ອງການສະພາແຫ່ງຊາດລາວໄດ້ໃຫ້ການຢືນຢັນວ່າບັນຫາທີ່ພົ້ນເດັ່ນທີ່ສຸດທີ່ປະຊາຊົນລາວໄດ້ສະແດງການຮຽກຮ້ອງຂໍຄວາມຊ່ວຍເຫຼືອຈາກສະພາແຫ່ງຊາດລາວຫຼາຍທີ່ສຸດໃນທຸກມື້ນີ້ກໍຄືບັນຫາຂັດແຍ້ງກ່ຽວກັບທີ່ດິນເຮັດການຜະລິດ ແລະທີ່ຢູ່ອາໄສ ຊຶ່ງສ່ວນໃຫຍ່ກໍເປັນບັນຫາຂັດແຍ້ງກັບລັດຖະບານ ແລະບັນດາອົງການປົກຄອງທ້ອງຖິ່ນໃນທົ່ວປະເທດລາວ ທີ່ມີສາເຫດສໍາຄັນມາຈາກການໃຫ້ສໍາປະທານ ດິນແກ່ພາກເອກະຊົນທີ່ໄປທັບ ຫຼືກວມເອົາທີ່ດິນຂອງປະຊາຊົນລາວດ້ວຍນັ້ນເອງ.
ເຈົ້າໜ້າທີ່ຂັ້ນສູງຂອງລາວ ຍັງບອກອີກວ່າການຮຽກຮ້ອງຂໍການຊ່ວຍເຫຼືອຂອງປະຊາຊົນ ລາວດັ່ງກ່າວໄດ້ເພີ່ມຂຶ້ນທຸກປີໂດຍໃນປີ 2011 ທີ່ຜ່ານມາກໍປະກົດວ່າມີຢູ່ຫຼາຍກວ່າ 400 ກໍລະນີທີ່ປະຊາຊົນລາວໄດ້ສະແດງການຮຽກຮ້ອງໂດຍກົງມາເຖິງຫ້ອງການສະພາແຫ່ງຊາດລາວ ແລະການຮຽກຮ້ອງດັ່ງກ່າວກໍຍັງໄດ້ລວມໄປເຖິງການຂໍໃຫ້ຊ່ວຍແກ້ໄຂບັນຫາ ຕ່າງໆທີ່ເກິດຂຶ້ນໃນວົງການລັດຖະ ບານລາວດ້ວຍ ໂດຍສະເພາະແມ່ນການຂໍໃຫ້ດໍາເນີນມາດຕະການປ້ອງກັນ ແລະປາບປາມການສໍ້ລາດບັງຫຼວງໃນວົງການຂອງລັດຖະບານລາວໃຫ້ມີປະສິດທິພາບ ແລະໃຫ້ມີການລົງໂທດພະນັກງານຂອງລັດຖະບານ ທີ່ໄດ້ມີ ຄວາມຜິດຢ່າງແທ້ຈິງໂດຍບໍ່ມີການຍົກເວັ້ນ.
ນອກຈາກນັ້ນ, ປະຊາຊົນທີ່ໄດ້ສະແດງການຮຽກຮ້ອງເຖິງສະພາແຫ່ງຊາດລາວເຫຼົ່ານີ້ ຍັງໄດ້ຮຽກຮ້ອງໃຫ້ຄະນະລັດຖະບານ ລາວດໍາເນີນການບໍລິຫານປະເທດຢ່າງໂປ່ງໃສ ເຊັ່ນມີການນໍາໃຊ້ງົບປະມານຢ່າງມີປະສິດທິຜົນຫຼືບໍ່ມີການຮົ່ວໄຫຼຂອງງົບປະມານມີການສຶກສາ ແລະປ້ອງກັນບັນຫາຜົນກະທົບຕໍ່ສັງຄົມ ແລະ ສິ່ງແວດລ້ອມທໍາມະຊາດຢ່າງຄັກແນ່ ກ່ອນທີ່ຈະຕັດສິນໃຈອະນຸມັດໂຄງການລົງທຶນຈາກຕ່າງປະເທດໃນລາວ ແລະຄວບຄຸມກວດກາການນໍາໃຊ້ຊັບສິນຂອງລັດຖະບານ ໃຫ້ຖືກຕ້ອງຕາມກົດໝາຍຢ່າງເຂັ້ມງວດເປັນຕົ້ນ.
ກ່ອນໜ້ານີ້ ທ່ານ ໄຊສົມພອນ ພົມວິຫານ ຮອງປະທານສະພາແຫ່ງຊາດລາວກໍໄດ້ ຖະແຫຼງຍອມຮັບວ່າປະຊາຊົນລາວໄດ້ສະແດງການຮຽກຮ້ອງດັ່ງກ່າວ ເຖິງສະພາແຫ່ງຊາດລາວເພີ່ມຫຼາຍຂຶ້ນນັບມື້ ໂດຍໃນປີທີ່ຜ່ານມາກໍປະກົດວ່າມີປະຊາຊົນລາວໄດ້ສະແດງການຮຽກຮ້ອງເຖິງສະພາແຫ່ງຊາດ ແລະ ສະພາແຫ່ງຊາດ ກໍໄດ້ສະ ເໜີຕໍ່ໄປຍັງລັດຖະບານລາວຫຼາຍກວ່າ 400 ກໍລະນີ ຫາກແຕ່ກໍໄດ້ຮັບການແກ້ໄຂ ພຽງແຕ່ 191 ກໍລະນີເທົ່ານັ້ນ.
ການຖະແຫຼງດັ່ງກ່າວນີ້ຂອງທ່ານ ໄຊສົມພອນ ກໍນັບວ່າສອດຄ່ອງກັນ ກັບການໃຫ້ທັດສະນະຂອງແກນນໍາປະຊາຊົນລາວທ່ານ ນຶ່ງທີ່ມີສ່ວນຢ່າງສໍາ ຄັນໃນການສະແດງການຮຽກຮ້ອງຕໍ່ສະພາແຫ່ງຊາດ ແລະໄດ້ຕິດຕາມຜົນການປະຕິບັດງານຂອງລັດຖະບານລາວມາຢ່າງຕໍ່ເນື່ອງ ຊຶ່ງ ທ່ານໄດ້ໃຫ້ການຢືນຢັນໃນຕອນນຶ່ງວ່າ:
“ບັນດາຂໍ້ຂັດຂ້ອງໝອງໃຈ ຫຼືຄວາມທຸກຍາກຂອງປະຊາຊົນນັ້ນກໍມີຫຼາຍບັນຫາ ເຊັ່ນວ່າບັນຫາເສັ້ນທາງ, ບັນຫານໍ້າລິນ, ບັນຫາໂຮງໝໍ, ບັນຫາໂຮງຮຽນ ຫຼືວ່າອຶ່ນໆ ແຕ່ພາຍຫຼັງຈາກທີ່ພວກເຮົາໄດ້ແຈ້ງສະເໜີໃຫ້ທາງຫ້ອງວ່າການໄດ້ຮັບຮູ້ ຕໍ່ຄໍາຮ້ອງຂອງປະຊາຊົນແລ້ວນີ້ ກໍບໍ່ທັນເຫັນວ່າໄດ້ມີການຍົກບັນຫາເຫຼົ້ານີ້ຂຶ້ນມາແຕ່ຢ່າງໃດ ແລະອີກບັນຫາໜຶ່ງກໍຄືພວກເຮົາໄດ້ນໍາເອົາຄວາມຄິດຄວາມເຫັນຕ່າງໆ ເຫຼົ່ານີ້ສະເໜີຕໍ່ພາກສ່ວນຕ່າງໆທີ່ກ່ຽວຂ້ອງ ແຕ່ໃນຄວາມເປັນຈິງແລ້ວການແກ້ໄຂ ຫຼື ການສະໜອງຕອບນັ້ນ ພັດບໍ່ມີການຕອບເກີດຂຶ້ນເລີຍເວັ້ນໄວ້ແຕ່ໂຄງການຈໍານວນນຶ່ງທີ່ເປັນຄວາມຊ່ວຍເຫຼືອຈາກພາຍນອກເທົ່ານັ້ນທີ່ພໍຈະໄດ້ຕື່ມເລັກໜ້ອຍ”
ກ່ອນໜ້ານີ້ ທ່ານ ທອງສິງ ທໍາມະວົງ ນາຍົກລັດຖະມົນຕີ ຊຶ່ງເຄີຍເປັນປະທານສະພາລາວດ້ວຍນັ້ນ ກໍໄດ້ຖະແຫຼງຍອມຮັບວ່າ ບັນຫາທີ່ປະຊາຊົນລາວໄດ້ພາກັນຮ້ອງຮຽນມາເຖິງຄະນະປະຈໍາສະພາແຫ່ງຊາດຫຼາຍທີ່ສຸດ ແລະ ກໍໄດ້ສະເໜີໃຫ້ລັດຖະບານດໍາເນີນມາດຕະການແກ້ໄຂຢ່າງຮີບດ່ວນນັ້ນ ກໍຄືບັນຫາ ແລະຂໍ້ຂັດແຍ້ງກ່ຽວກັບທີ່ດິນທໍາການຜະລິດ ເນື່ອງຈາກວ່າໃນປະຈຸບັນນີ້ຍັງມີປະຊາຊົນລາວຈໍານວນ ບໍ່ໜ້ອຍທີ່ບໍ່ມີທີ່ດິນທໍາການຜະລິດ ສ່ວນປະຊາຊົນລາວທີ່ມີທີ່ດິນທໍາການຜະລິດແລ້ວນັ້ນ ກັບຕ້ອງປະສົບບັນຫາເຂດສໍາປະທານທີ່ດິນຂອງເອກະຊົນລາວ ແລະ ຄົນຕ່າງປະເທດໄດ້ໄປກວມເອົາທີ່ດິນຂອງພວກເຂົາເຈົ້າ.
