* (ຂປລ): ໂຄງການກໍ່ສ້າງໂຮງໄຟຟ້າພະລັງຄວາມຮ້ອນຈາກຖ່ານຫີນ ເມືອງຫົງສາ ແຂວງໄຊຍະບູລີ ໄດ້ດຳເນີນການກໍ່ສ້າງ ໄປພ້ອມໆກັບການຍົກຍ້າຍຈັດສັນທີ່ດິນ, ສ້າງເຮືອນພັກທີ່ຢູ່ອາໄສ ແລະ ຊົດເຊີຍຜົນເສຍຫາຍຕ່າງໆ ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບ ຈຳນວນ 450 ຄອບຄົວ, ສ້າງໂຮງຮຽນ, ຫ້ອງການ ບ້ານ ແລະ ສຸກສາລາ ທັງເອົາໃຈໃສ່ໃນການສະໜອງ ສະບຽງອາຫານ, ເຄື່ອງອຸປະໂພກ-ບໍລິໂພກ ແລະ ການ ສົ່ງເສີມໃຫ້ມີເນື້ອ ທີ່ການຜະລິດກະສິກຳໄລຍະສັ້ນ, ກາງ ແລະ ໄລຍະຍາວ ເພື່ອສ້າງລາຍຮັບ ແລະ ຍົກລະດັບ ຊີວິດການເປັນຢູ່ໃຫ້ດີຂຶ້ນ.
ທ່ານນາງ ສຸລານີ ພູສຸວັນ, ຜູ້ຈັດການຝ່າຍຍົກຍ້າຍຈັດສັນ ໂຄງການໄຟຟ້າຫົງສາ ໃຫ້ຮູ້ວ່າ: ປະຊາ ຊົນຜູ້ທີ່ໄດ້ຮັບຜົນກະທົບ ນອກຈາກໄດ້ຮັບເງິນຊົດເຊີຍ ຍັງໄດ້ຮັບການຈັດສັນເນື້ອທີ່ 450 ຕາແມັດ/ຄອບຄົວ ສຳລັບປຸກສ້າງເຮືອນໜຶ່ງຫລັງ ແລະ ປູກພືດສວນຄົວໄລຍະສັ້ນ ລວມທັງການປູກເຫັດ, ລ້ຽງປາດຸກພັນ, ເປັດ,ໄກ່ ແລະ ອື່ນໆ, ພ້ອມນີ້ ໄດ້ຈັດສັນເນື້ອທີ່ການຜະລິດ 1 ເຮັກຕາ ສຳລັບປູກພືດອຸດສາຫະກຳ ປູກຢາງພາລາ ແລະ ພືດລົ້ມລຸກ ເຊັ່ນ: ສາລີ, ຖົ່ວດິນ, ຖົ່ວເຫລືອງ, ໝາກເດືອຍ, ກວ້ຍ, ອ້ອຍ, ໝາກນັດ ແລະ ອື່ນໆ ເປັນການສ້າງລາຍຮັບໄລຍະກາງ ແລະ ອີກ 1 ເຮັກຕາ ສຳລັບການລ້ຽງສັດໃຫຍ່ ສ້າງລາຍຮັບໄລຍະຍາວ. ປະຈຸບັນ ການປຸກສ້າງເຮືອນດັ່ງກ່າວ ໄດ້ດຳເນີນໄປຢ່າງເຄັ່ງຮ້ອນ ແລະ ສຳເລັດກວ່າ 80% ໂດຍປະຊາຊົນທີ່ໄດ້ຮັບຜົນກະທົບ ໄດ້ຍົກຍ້າຍໄປອາໄສຢູ່ ຈຳນວນຫລາຍກວ່າເຄິ່ງໜຶ່ງຂອງຈຳນວນທັງໝົດ 450 ຄອບຄົວ ແລະ ຄາດວ່າຈະສຳເລັດໃນທ້າຍປີນີ້. ສຳລັບແຜນການຊ່ວຍເຫລືອປະຊາຊົນ ໃນໄລຍະສາມປີທຳອິດ ແມ່ນການຊ່ວຍເຫລືອເຂົ້າສານ ຈຳນວນ 25 ກິໂລ/ຄົນ/ເດືອນ ແລະ ອາຫານທີ່ຈຳເປັນ, ຮັບຈ້າງຢ່າງໜ້ອຍ 1 ແຮງງານ/ ຄອບຄົວ, ສົ່ງເສີມການປູກພືດຜັກລົ້ມລຸກ ແລະ ການລ້ຽງສັດນ້ອຍ, ການສ້າງລາຍຮັບຈາກຜະລິດຫັດຖະກຳ ແລະ ການບໍລິການ ໂດຍມີການຕິດຕາມຢ່າງໃກ້ຊິດ ແລະ ຊ່ວຍຄຸ້ມຄອງການໃຊ້ເງິນທີ່ໂຄງການຊົດເຊີຍ. ທັງນີ້ ເປັນການປະຕິບັດພັນທະສັນຍາ ທີ່ໂຄງການມີຕໍ່ປະຊາຊົນຜູ້ທີ່ໄດ້ຮັບຜົນກະທົບ ຊຶ່ງເປົ້າໝາຍຕົ້ນຕໍ ແມ່ນເຮັດໃຫ້ແຕ່ລະຄອບຄົວ ຕ້ອງໄດ້ຮັບການພັດທະນາອາຊີບໃຫ້ມີລາຍໄດ້ ເພື່ອຫລຸດພົ້ນຈາກຄວາມທຸກຍາກພາຍໃນສາມປີ ແລະ ລາຍໄດ້ຂອງແຕ່ລະຄອບຄົວ ຕ້ອງເພີ່ມຂຶ້ນ 150% ພາຍໃນ 10 ປີຕໍ່ໜ້າ.
ຢ່າງໃດກໍຕາມ ປະຊາຊົນທີ່ຍົກຍ້າຍມາຕັ້ງຖິ່ນຖານໃໝ່ຢູ່ບ້ານຈັດສັນ ຫລາຍຄອບຄົວບອກກັບນັກຂ່າວວ່າ: ຮູ້ສຶກດີໃຈທີ່ໂຄງການໄດ້ໃຫ້ການສະໜັບສະໜູນ ແກ້ໄຂບັນຫາຕ່າງໆ ໃຫ້ປະຊາຊົນຜູ້ໄດ້ຮັບຜົນກະ ທົບ ໂດຍສະເພາະວຽກງານພັດທະນາຊຸມຊົນ ແລະ ການຊ່ວຍເຫລືອໃນເບື້ອງຕົ້ນ ເຮັດໃຫ້ຊີວິດການເປັນຢູ່ດີຂຶ້ນ. ເຖິງວ່າ ຈະມີຄວາມຫຍຸ້ງຍາກບາງປະການ ກໍຍິນດີ ແລະ ພ້ອມກັນແກ້ໄຂ ເພື່ອການພັດທະນາເສດຖະ ກິດ-ສັງຄົມ ຂອງປະເທດ ກໍຄື ຂອງແຂວງໄຊຍະບູລີ. ໂຄງການນີ້ ຈະສ້າງສຳເລັດໃນປີ 2015 ດ້ວຍກຳລັງການຜະລິດ 1.878 ເມກາວັດ ໂດຍສ່ວນໃຫຍຈະສົ່ງຂາຍໄປຍັງປະເທດໄທ ແລະ ນຳໃຊ້ພາຍໃນຈຳນວນໜຶ່ງ ຊຶ່ງຈະປະກອບສ່ວນສຳຄັນໃນການພັດທະນາການສຶກສາ, ສາທາລະນະສຸກ ແລະ ລະບົບພື້ນຖານໂຄງລ່າງ ໃຫ້ປະຊາຊົນໃນຂົງເຂດນີ້ເປັນຢ່າງດີ
