ທີ່ຕັ້ງຂອງໂຮງຮຽນໃຜຈະແກ້ ?
ຄໍ ລໍາຂອງພວກເຮົາ ເຄີຍລົງພິມເລື່ອງທີ່ຕັ້ງຂອງໂຮງຮຽນບາງແຫ່ງທີ່ບໍ່ເໝາະສົມ ພາໃຫ້ການສັນຈອນຕິດຂັດ ໂດຍສະເພາະໃນຊົ່ວໂມງຮີບຮ້ອນ ແຕ່ບໍ່ທັນເຫັນພາກສ່ວນກ່ຽວຂ້ອງຕັ້ງເປັນບັນຫາແກ້ໄຂ...
ເພື່ອນ ຜູ້ອ່ານທ່ານໜຶ່ງທີ່ເປັນພະນັກງານສັງກັດຫ້ອງການອົງການຂອງພັກ ບໍລິເວນບ້ານໜອງບອນ ເມືອງໄຊເຊດຖາ ອັນເປັນທີ່ຕັ້ງຂອງໂຮງຮຽນພາກເອກະຊົນສອງແຫ່ງ ທີ່ຕັ້ງຢູ່ທາງຜ່ານເຂົ້າຫ້ອງການ ເພິ່ນໄດ້ສ່ອງແສງມາວ່າ: ດີໃຈ ທີ່ເຫັນຄໍລໍາລົງພິມເລື່ອງທີ່ຕັ້ງຂອງໂຮງຮຽນຢູ່ນະຄອນຫຼວງວຽງ ຈັນ ແຕ່ເຫັນວ່າພາກສ່ວນກ່ຽວຂ້ອງຊ້າໂພດ ຫຼືວ່າຫຼາຍວຽກ ຈຶ່ງບໍ່ຄ່ອຍສົນໃຈເລື່ອງນີ້ ພວກເພິ່ນລຳບາກຫຼາຍ ໂດຍສະເພາະ ໃນຊົ່ວໂມງຮີບຮ້ອນທັງຕອນເຊົ້າ ແລະ ຕອນແລງ.
ເພິ່ນ ເຫັນດີນໍາການແກ້ໄຂທີ່ວ່າ: ໃຫ້ໂຮງຮຽນທັງສອງແຫ່ງ ຫຼຸດຊັ້ນຮຽນ ແລະ ຫ້ອງຮຽນລົງ ແລ້ວຍ້າຍໄປຢູ່ສາຂາອື່ນ (ສ້າງສາຂາຕື່ມ) ເປັນທາງອອກລະຫວ່າງກາງທີ່ດີສຸດ ເພາະດຽວນີ້ ທັງສອງໂຮງຮຽນມີແຕ່ຊັ້ນປະຖົມຈົນຮອດມັດທະຍົມປາຍ (ມ7) ຢາກໃຫ້ສຶກສາເມືອງນະຄອນຫຼວງ ແລະ ກະຊວງສຶກສາທິການ ແລະ ກີລາ ແຕ່ງຕັ້ງຄະນະສະເພາະກິດ ມາລົງກວດກາເບິ່ງຄວາມເປັນຈິງ !.
ການ ແກ້ໄຂການສັນຈອນນີ້ ມັນສະແດງໃຫ້ເຫັນເຖິງບົດບາດຂອງການປົກຄອງ ໃນຖານະຜູ້ມີອະພິສິດ ຍ້ອນວ່າເປັນຕົວແບບໃຫ້ແກ່ປະຊາຊົນ ທັງສະແດງໃຫ້ເຫັນເຖິງບົດບາດຂອງສໍານັກງານພັກທີ່ເປັນຜູ້ນໍາ ພາ... ຫາກວ່າການແກ້ໄຂບັນຫານີ້ບໍ່ລຸລ່ວງ ປ່ອຍໃຫ້ພາກເອກະຊົນເຮັດຕາມລຳພັງໃຈແລ້ວການຈັດຕັ້ງຖອຍໜີ ຈະເປັນການສໍ່ສະແດງໃຫ້ເຫັນເຖິງຄວາມເດັດຂາດຂອງອຳນາດລັດ... ເພື່ອນຜູ້ອ່ານທີ່ສ່ອງແສງມາໃນວັນທີ 28/2/2012 ກ່າວຢ້ຳມ້ວນທ້າຍຄືແນວນັ້ນ !.
ໃນຖານະຜູ້ຮັບຜິດຊອບຄໍລໍາ ແນວລາວ ເຫັນ ວ່າມີຫຼາຍກໍລະນີໂຮງຮຽນ ມີທີ່ຕັ້ງບໍ່ເໝາະສົມ ແຕ່ມີຫຼາຍຊັ້ນຮຽນ ເຊິ່ງສົມຄວນທີ່ຈະຕ້ອງໄດ້ຮັບການກວດກາຄືນ ແລະ ແກ້ໄຂ ເພາະວ່າມັນຈະເປັນແບບຢ່າງບໍ່ດີ ແກ່ການຂະຫຍາຍໂຮງຮຽນຂອງພາກເອກະຊົນບາງແຫ່ງ ທີ່ບໍ່ຄໍານຶງເຖິງທີ່ຕັ້ງ !.
ສິ່ງແວດລ້ອມ ຂອງໂຮງຮຽນມັນສໍາຄັນຫຼາຍ ເພາະມັນກະທົບເຖິງຈິດໃຈຂອງນັກຮຽນ ໂດຍສະເພາະລູກຫຼານຮຽນຊັ້ນປະຖົມ-ມັດທະຍົມ.
ຂໍຮຽກຮ້ອງເຖິງພາກສ່ວນກ່ຽວຂ້ອງ ຊ່ວຍພິຈາລະນາດ້ວຍ
