ຂ້ຽວທັງຄືນ-ເວັນ ປັບປຸງສະຫນາມບິນວັດໄຕ
ໂຄງການ ຍົກລະດັບສະ ຫນາມບິນສາກົນວັດໄຕ ຫນຶ່ງໃນ ໂຄງການ ເພື່ອຮອງຮັບກອງປະຊຸມອາເຊັມປະຈຸບັນຜູ້ຮັບເຫມົາເລ່ງຫນ້າວຽກ ເຮັດທັງຄືນ ແລະ ເວັນ, ດ້ານຜູ້ຮັບຜິດຊອບເຜີຍສຳເລັດແລ້ວເກືອບເຄິ່ງ.
ວານນີ້ ທ່ານ ແສງສະຫງວນ ຈັນທະວົງ ຫົວຫນ້າໂຄງການປັງປຸງຍົກລະດັບສະຫນາມບິນສາກົນວັດໄຕ ຕາງຫນ້າກົມການບິນພົນລະເຮືອນກະຊວງໂຍທາທິການ ແລະ ຂົນສົ່ງເຜີຍຕໍ່ທີມຂ່າວເສດຖະກິດວ່າ: ໂຄງການຍົກລະດັບສະຫນາມບິນສາກົນວັດໄຕ ມາຮອດປະຈຸບັນທາງໂຄງການໄດ້ຂຸ້ນຂ້ຽວຈັດຕັ້ງປະຕິບັດວຽກຕະຫລອດ 24 ຊົ່ວໂມງ (ວຽກຕິດຕັ້ງໄຟສັນຍານຍົນລົງເດີ່ນ) ສະເລ່ຍລວມທຸກຫນ້າວຽກສໍາເລັດແລ້ວ 47,44%.
ສະເພາະຫນ້າວຽກປັບປຸງລານຈອດເຮືອບິນເບີ 3 ແມ່ນໄດ້ສຳເລັດການການປູຄອນກີດ ຍັງພຽງແຕ່ການແຕ້ມເສັ້ນທີ່ຍັງສືບຕໍ່ຈັດຕັ້ງປະຕິບັດ ສ່ວນລານເບີ 2 ໄດ້ສໍາເລັດການຮອງພື້ນຊັ້ນເດັດ ຄອັດແລ້ວ ແລະ ປະຈຸບັນກຳລັງຈະເທຊັ້ນຄອນກີດ ໂດຍລານຈອດເຮືອບິນລວມມີທັງຫມົດ 3 ຊັ້ນ.
ດ້ານວຽກປັບປຸງທາງອ້ອມ ສະຫນາມແມ່ນສໍາເລັດ 40% ແລະ ຫນ້າວຽກລະບົບການລະບາຍນ້ຳສະຫນາມບິນປະຕິບັດ ໄດ້ແລ້ວ 70% ເຊັ່ນດຽວກັນຫນ້າວຽກຍ່ອຍທີ່ມີຄວາມຄືບ ຫນ້າຕາມລະດັບ.
ແນວໃດກໍ່ດີ ທ່ານ ແສງສະຫງວນ ຈັນທະວົງ ກ່າວອີກວ່າ: ການຈັດຈັດຕັ້ງປະຕິບັດ ແຕ່ລະຫນ້າວຽກຖືວ່າທຸກຢ່າງໄປຕາມແຜນທີ່ວາງໄວ້ ເຊິ່ງກໍ່ເຊື່ອວ່າຫນ້າວຽກພື້ນຖານຈະໃຫ້ສຳ ເລັດໃນເດືອນກໍລະກົດທີ່ຈະມາ ເຖິງ ແລະ ສຳເລັດສົມບູນປະ ມານເດືອນກັນຍາ 2012 ນີ້.
ໂຄງການດັ່ງກ່າວ ມີເປົ້າ ຫມາຍເພື່ອຂະຫຍາຍລານຈອດຮອງຮັບເຮືອບິນຂະຫນາດກາງ ແລະ ໃຫຍ່ໄດ້ຈໍານວນ 20 ລໍາ ໂດຍເປັນການລົງທຶນຂອງລັດຖະບານໃນມູນຄ່າ 37,6 ລ້ານໂດລາສະຫະລັດ ແລະ ບໍລິສັດໄຊນາ ຊີເອັມຊີອິນຈີເນຍຣິງ ຈຳກັດ ຈາກ ສປ ຈີນເປັນຜູ້ຮັບເຫມົາກໍ່ສ້າງໂດຍໄດ້ເລີ່ມລົງມືແຕ່ວັນ ທີ 1 ພະຈິກ 2011 ເປັນຕົ້ນມາ.
