ເຂດເສດຖະກິດພິເສດສາມຫລ່ຽມຄໍາ(ເຂດທີ່ຈະມີການສ້າງສະຫນາມບິນສາກົນ)
ລົງທຶນກໍ່ສ້າງສະຫນາມບິນສາກົນຂຶ້ນ ທີ່ເມືອງຕົ້ນເຜິ້ງ ເຊິ່ງຈະຊ່ວຍສ້າງແຮງດຶງດູດ ແລະ ປະສິດທິພາບໃນດ້ານການຄ້າການລົງທຶນ ແລະ ການບໍລິການໃນແຂວງບໍ່ແກ້ວ ແລະ ເຂດໃກ້ຄຽງໄດ້ດີຍິ່ງຂຶ້ນ.
ທ່ານ ຄໍາຫມັ້ນ ສູນວິເລີດ ເຈົ້າແຂວງໆບໍ່ແກ້ວ ກ່າວກັບທີມຂ່າວເສດຖະກິດ-ການຄ້າ ໃນອາທິດຜ່ານມາ ວ່າ: ການພັດທະນາເສດຖະກິດ-ສັງຄົມຂອງແຂວງບໍ່ແກ້ວໄລຍະຜ່ານມາໄດ້ຜົນສໍາເລັດຫລາຍດ້ານ. ສະເພາະສົກປີ2010-2011ຜ່ານມາເສດຖະກິດຂະຫຍາຍຕົວ9,2% ສະເລ່ຍລາຍໄດ້ຕໍ່ຫົວຄົນເທົ່າກັບ1.173ໂດລາສະຫະລັດ. ຂະນະທີ່ໃນສົກປີນີ້ ແຂວງບໍ່ແກ້ວຕັ້ງເປົ້າພັດທະນາເສດຖະກິດ-ສັງຄົມໃຫ້ຂະຫຍາຍຕົວໃນລະດັບ9,6%.
ເພື່ອຮອງຮັບແກ່ການເປີດນໍາໃຊ້ຂົວມິດຕະພາບ4 ໃນກາງປີ2013 ແລະ ສະຫນາມບິນສາກົນ ທີ່ເມືອງຕົ້ນເຜິ້ງນັ້ນ ແຂວງບໍ່ແກ້ວຈະສຸມໃສ່ພັດທະນາພຶ້ນຖານໂຄງລ່າງແຕ່ນີ້ຮອດປີ2020ໃຫ້ດີຂຶ້ນ ພ້ອມກັບກໍານົດ3ທ່າແຮງຕົ້ນຕໍຄື: ທ່າແຮງດ້ານກະສິກໍາ, ດ້ານການຄ້າ ແລະ ດ້ານການທ່ອງທ່ຽວ, ທ່ານເຈົ້າແຂວງກ່າວ.
ທ່ານເນັ້ນຕື່ມວ່າ: ປະຈຸບັນພວກເຮົາໄດ້ກະກຽມພັດທະນາບັນດາທົ່ງພຽງໃຫ້ມີຊົນລະປະທານ, ປັບປຸງເສັ້ນທາງໃຫ້ມີຄວາມສະດວກ ໂດຍສະເພາະເສັ້ນທາງແຕ່ຕົວເມືອງຫ້ວຍຊາຍໄປຫາເມືອງຜາອຸດົມອອກສູ່ປາກແບ່ງ, ເສັ້ນທາງແຄມຂອງໄປຫາເມືອງເມິງອອກສູ່ຫລວງນໍ້າທາ ເຊິ່ງສອງໂຄງການນີ້ຈະຊ່ວຍສະຫນັບສະຫນູນ ແລະ ອໍານວຍຄວາມສະດວກແກ່ການພັດທະນາເສດຖະກິດ-ສັງຄົມຂອງແຂວງຫລາຍຂຶ້ນ.
ທ່ານເຈົ້າແຂວງຢໍ້າອີກວ່າ: ຄວາມຮຽກຮ້ອງຕ້ອງການລົງທຶນພັດທະນາເສດຖະກິດ-ສັງຄົມຂອງແຂວງ ຍັງມີຫລາຍ ແຕ່ທຶນພັດທະນາຍັງມີຫນ້ອຍ. ດັ່ງນັ້ນນັກລົງທຶນໃດ,ພາກສ່ວນໃດສົນໃຈເຂົ້າມາລົງ ທຶນ ແຂວງບໍ່ແກ້ວ ກໍພ້ອມຈະອໍານວຍຄວາມສະດວກ.
ດ້ານທ່ານ ໂຈມ ໄຊສົງຄາມ ຫົວຫນ້າພະແນກແຜນການ ແລະການລົງທຶນ ກ່າວວ່າ: ໂຄງການກໍ່ສ້າງຂົວມິດຕະພາບ4 ແລະ ສະຫນາມບິນສາກົນທີ່ເມືອງຕົ້ນເຜິ້ງຈະເປັນທ່າແຮງໃຫມ່ທີ່ສໍາຄັນ ໃນການທີ່ຈະຊ່ວຍພັດທະນາແຂວງບໍ່ແກ້ວ ໃຫ້ມີໃບຫນ້າໃຫຍ່ກາຍມາເປັນເປົ້າຫມາຍປາຍທາງການລົງທຶນຂອງນັກທຸລະ ກິດທັງພາຍໃນ ແລະ ຕ່າງປະເທດ. ທີ່ສຳຄັນຂົວມິດຕະພາບ4 ຈະເຮັດໃຫ້ຂໍ້ຈໍາກັດຂອງເສັ້ນທາງ R3 ທີ່ຕ້ອງຂ້າມບັກໃນບໍລິເວນແຂວງບໍ່ແກ້ວຫມົດລົງ.
ເພື່ອ ສ້າງແຮງດຶງດູດທີ່ດີ ພະແນກແຜນການ ແລະ ການລົງທຶນ ຈະເອົາໃຈໃສ່ສົ່ງເສີມການລົງທຶນຈາກພາກເອກະຊົນພາຍໃນແລະຕ່າງປະ ເທດຫລາຍຂຶ້ນ, ສືບຕໍ່ປະບັດການບໍລິການຜ່ານປະຕູດຽວໃຫ້ມີປະສິດທິພາບ ເຊິ່ງເຊື່ອເສັ້ນທາງR3, ຂົວມິດຕະພາບ4 ແລະ ສະຫນາມບິນສາກົນທີ່ເມືອງຕົ້ນເຜິ້ງຈະເປັນທ່າແຮງດຶງດູດຄວາມສົນໃຈ ຂອງນັກທຸລະກິດໃຫ້ເຂົ້າມາລົງທຶນໃນມາແຂວງບໍ່ແກ້ວໄດ້ຫລາຍຂຶ້ນ, ທ່ານ ໂຈມ ໄຊສົງຄາມ ກ່າວ.
ນັບແຕ່ປີ1998ເຖິງປີ2011 ການລົງທຶນທັງຫມົດຢູ່ພາຍໃນແຂວງບໍ່ແກ້ວ ມີ83ບໍລິສັດ ດ້ວຍມູນຄ່າການລົງທຶນ220ລ້ານກວ່າໂດລາສະຫະລັດ ໃນນັ້ນເປັນການລົງທຶນພາຍໃນ39ບໍລິສັດ ມູນຄ່າ18,8ລ້ານໂດລາສະຫະລັດ. ສ່ວນໃຫຍ່ເຂົ້າມາລົງທຶນໃນຂະແຫນງບໍລິການ, ເດັ່ນ ກວ່າຫມູ່ແມ່ນບໍລິສັດດອກງິ້ວຄໍາຈໍາກັດ ຂອງນັກທຸລະກິດຈີນທີ່ເຂົ້າມາພັດທະນາເສດເສດຖະກິດພິເສດຢູ່ເມືອງ ຕົ້ນເຜິ້ງ ແລະ ບໍລິສັດເອເອຊີກຣີນ ຊິດຕີ້ລາວຈໍາກັດຂອງນັກທຸລະກິດສ.ເກົາຫລີ ທີ່ເຂົ້າມາລົງທຶນພັດທະນາການທ່ອງທ່ຽວຄົບວົງຈອນບໍລິເວນສົ້ນຂົວມິດຕະພາບ4. ສະເພາະສົກປີນີ້ ພະແນກແຜນການ ແລະ ການລົງທຶນ ຄາດວ່າຈະມີ9-10ບໍລິສັດເຂົ້າມາລົງທຶນ ດ້ວຍທຶນປະມານ10ລ້ານໂດລາສະຫະລັດ. ສ່ວນນັກທ່ອງທ່ຽວເຂົ້າມາໃນປີ2011 ເພີ່ມຂຶ້ນ8,27% ເທົ່າກັບ183.208ເທື່ອຄົນ.
ດ້ານທ່ານ ຈໍາພອນ ແກ້ວກາງເພັງ ຫົວຫນ້າພະແນກອຸດສາຫະກໍາ ແລະການຄ້າແຂວງ ກໍເຊື່ອວ່າ ທັງເສັ້ນທາງR3, ຂົວ ແລະສະຫນາມບິນ ຈະຊ່ວຍສົ່ງເສີມວຍກງານການຄ້າຂອງແຂວງບໍແກ້ວໃຫຍ່ຂະຫຍາຍຕົວຍິງຂຶ້ນ ປະຈຸບັນທາງພະແນກໄດ້ວາງແຜນສ້າງເຂດອຸດສາຫະກໍາຂຶ້ນຕາມເສັ້ນທາງR3 ໃນເນື້ອທີ່800ເຮັກຕາ ຫ່າງຈາກເທດສະບານເມືອງຫ້ວຍຊາຍປະມານ40ກິໂລແມັດ ເຊິ່ງໄດ້ເລີ່ມສຶກສາສໍາຫລວດມາແຕ່ປີ2011.
ສໍາລັບຄວາມຄຶບຫນ້າໂຄງການກໍ່ສ້າງຂົວມິດຕະພາບ4(ຫ້ວຍຊາຍ-ຊຽງຂອງ) ທີ່ເລີ່ມລົງມືກໍ່ສ້າງມາແຕ່ກາງປີ2010 ຄືບຫນ້າປະມານ33% ຫລຸດແຜນການທີ່ວາງໄວ້21%. ດ້ານທ່ານຫົວຫນ້າໂຄງການຊີ້ຈະຕໍ່ອາຍຸໂຄງການອອກຕື່ມອີກ6ເດືອນ ເຊິ່ງຄາດວ່າໂຄງການຈະສໍາເລັດໃນກາງປີ2013 ຈາກເດີມທີ່ຈະ ໃຫ້ສໍາເລັດໃນເດືອນທັນວາປີນີ້.
ສ່ວນ ໂຄງການກໍ່ສ້າງສະຫນາມບິນສາກົນທີ່ເມືອງຕົ້ນເຜີ້ງ ໃນເຂດເສດຖະກິດພິເສດສາມຫລ່ຽມຄໍາທີ່ລັດຖະບານອະນຸຍາດໃຫ້ບໍລິສັດດອກ ງິ້ວຄໍາລົງທຶນນັ້ນ, ທ່ານບຸນມີ ສຸວັນນະລັງສີ ຫົວຫນ້າຄະນະບໍລິຫານເຂດເສດຖະກິດພິເສດສາມຫລ່ຽມຄໍາ ກ່າວວ່າ: ປະຈຸບັນກໍາລັງຢູ່ໃນຂັ້ນຕອນສໍາຫລວດອອກແບບລະອຽດຕື່ມອີກ ລວມເຖິງເອກະສາຕ່າງໆເພື່ອຂໍອະນຸຍາດກໍ່ສ້າງ, ສ່ວນທີ່ດິນກໍໄດ້ມີການບຸກເບີກແດ່ແລ້ວ ເຊິ່ງຕໍໄປກໍຈະເລີ່ມລົງເກັບກໍາຂໍ້ມູນ ແລະ ເລີ່ມໄກ່ເກຍທີ່ດິນກັບປະຊາຊົນ. ດ້ານວັດ ສະດຸກໍ່ສ້າງກໍເລີ່ມມີການກະກຽມແດ່ແລ້ວເປັນຕົ້ນແມ່ນແຮ່ຊາຍ ເຊິ່ງພວກເຮົາຈະພະຍາມຍາມສ້າງໃຫ້ສໍາເລັດພາຍໃນສອງປີ.
