ລາວມີຜູ້ຕິດເຊື້ອເອດ ເກືອບ 5 ພັນຄົນ
ຜູ້ຕິດເຊື້ອເອດໃນລາວຖື ວ່າມີຕົວເລກເພີ່ມຂຶ້ນທຸກໆປີ, ໃນນັ້ນ ກຸ່ມຊາຍຮ່ວມເພດກັບຊາຍມີຄວາມສ່ຽງສູງ ສາເຫດຍ້ອນມີເພດສຳພັນທີ່ບໍ່ປອດໄພ. ປະຈຸບັນ ມີຜູ້ຕິດເຊື້ອເອດແລ້ວ 4.942 ຄົນ. ຂະນະທີ່ສູນຕ້ານເອດເລ່ງປ້ອງກັນສຸມໃສ່ກຸ່ມເປົ້າຫມາຍທີ່ມີຄວາມ ສ່ຽງ.
ອີງຕາມການໃຫ້ຂໍ້ມູນຂອງ ສູນຕ້ານເອດ ແລະ ພະຍາດຕິດຕໍ່ ທາງເພດສຳພັນໃຫ້ຮູ້ວ່າ: ປະຈຸບັນ ມີຜູ້ຕິດເຊື້ອເອດແລ້ວ 4.942 ໃນທົ່ວປະເທດ, ສະເພາະປີ 2011 ມີ 670 ຄົນເພີ່ມຂຶ້ນ ຈາກປີ 2010: 58 ຄົນ. ເຊິ່ງແຂວງທີ່ມີຜູ້ຕິດເຊື້ອເອດຫລາຍ ກວ່າຫມູ່ແມ່ນນະຄອນຫລວງວຽງຈັນ 1.752 ຄົນ, ຮອງລົງ ມາແມ່ນແຂວງສະຫວັນນະເຂດ 1.719 ຄົນ. ໃນນັ້ນ ກຸ່ມຄົນທີ່ມີຄວາມສ່ຽງສູງກວ່າຫມູ່ແມ່ນ ກຸ່ມຊາຍຮ່ວມເພດຊາຍ, ສາວບໍລິການ ແລະ ກຸ່ມທີ່ສັກຢາເສບ ຕິດເຂົ້າທາງເສັ້ນເລືອດ.
ທ່ານ ດຣ. ຈັນທອນ ຄຳສີບຸນເຮືອງ ຮອງຫົວຫນ້າສູນ ຕ້ານເອດ ແລະ ພະຍາດຕິດຕໍ່ ທາງເພດສຳພັນໃຫ້ຮູ້ວ່າ: ສາເຫດຫລັກທີ່ພາໃຫ້ມີການຕິດເຊື້ອເອດ ສ່ວນໃຫຍ່ແມ່ນການມີ ພຶດຕິກຳທາງເພດທີ່ບໍ່ປອດໄພເຊັ່ນ: ການບໍ່ໄດ້ຮັບຂໍ້ມູນຂ່າວສານໃນການປ້ອງກັນຕົນເອງ, ການມີເພດສຳພັນທີ່ບໍ່ໄດ້ປ້ອງກັນ (ບໍ່ໃສ່ຖົງຢາງອະນາໄມເວລາມີເພດສຳພັນ) ແລະ ການມີ ພະຍາດຕິດຕໍ່ທາງເພດສຳພັນທີ່ ບໍ່ໄດ້ປ້ອງກັນເປັນເສັ້ນທາງຫນຶ່ງທີ່ສາມາດຕິດເຊື້ອເອດໄດ້.
ຢ່າງໃດກໍ່ຕາມ ເພື່ອເປັນການສະກັດກັ້ນພະຍາດດັ່ງກ່າວ ສູນຕ້ານເອດຈະສຸມໃສ່ປ້ອງກັນການຕິດເຊື້ອໂດຍເລັງໃສ່ກຸ່ມເປົ້າ ຫມາຍທີ່ມີ ຄວາມສ່ຽງສືບຕໍ່ໃຫ້ຂໍ້ມູນ-ຂ່າວສານ, ສ້າງອາສາສະຫມັກເພື່ອນຊ່ວຍເພື່ອນຂອງເພດຍິງ ແລະ ເພດຊາຍ, ລະດົມການນຳໃຊ້ຖົງ ຢາງອະນາໄມ, ການແຈກຖົງ ຢາງອະນາໄມລ້າ, ລະດົມໃຫ້ບຸກຄົນທີ່ມີຄວາມສ່ຽງເຂົ້າໃຫ້ ຄຳປຶກສາ ແລະ ກວດເລືອດ, ຂະຫຍາຍຕາຫນ່າງສະຖານທີ່ ກວດເລືອດແບບສະຫມັກໃຈ.
ເຊິ່ງປະຈຸບັນ ລາວເຮົາມີຕາຫນ່າງ ຫລື ສູນກວດເລືອດ ຫາພະຍາດນີ້ແລ້ວ 100 ກວ່າແຫ່ງໃນທົ່ວປະເທດ ແລະ ສູນປິ່ນປົວ 7 ແຫ່ງ ໂດຍບໍ່ເສຍຄ່າບໍລິການ, ໃນນັ້ນ ຢູ່ນະຄອນຫລວງວຽງຈັນມີ 2 ແຫ່ງ, ສະຫວັນນະເຂດ, ຈຳປາສັກ, ຫລວງພະບາງ, ບໍ່ແກ້ວ ແລະ ຫລວງນ້ຳທາ.
