ຂ່າວ: ຈຽງສັກ
ການແຂ່ງຂັນເວົ້າພາສາເກົາຫລີຄັ້ງທຳອິດໃນລາວໄດ້ ຈັດຂຶ້ນໃນວັນທີ 17 ມີນາຜ່ານມາ ທີ່ຫໍວັດທະນະທຳແຫ່ງຊາດ ເລີ່ມແຕ່ເວລາ 13 ໂມງ, ເຊິ່ງຈັດໂດຍພາກວິຊາພາສາເກົາຫລີ ມະຫາວິທະຍາໄລແຫ່ງຊາດ ແລະ ໃຫ້ການສະຫນັບສະຫນູນໂດຍອົງການຮ່ວມມືສາກົນ ສາທາລະນະລັດ ເກົາຫລີ ປະຈຳລາວ (KOICA) ຮັບກຽດກ່າວເປີດງານໂດຍທ່ານ ລີກອນແທ ເອກອັກຄະລັດທະທູດ ສ.ເກົາຫລີ ປະຈຳລາວ ເຂົ້າຮ່ວມໂດຍທ່ານ ດຣ. ທຸມມະລາ ແກ້ວພັກດີ ຮອງຄະນະບໍດີ ຄະນະອັກສອນສາດມະຫາວິທະຍາໄລແຫ່ງຊາດ, ມີບັນດາຄະນະນຳຈາກອົງການຈັດຕັ້ງເກົາຫລີປະຈຳລາວ, ມີບັນດາແຂກທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫນາແຫນ້ນ.
ງານຄັ້ງນີ້ ມີຜູ້ແຂ່ງຂັນຈຳ ນວນ 8 ຄົນ ທີ່ໄດ້ຜ່ານການຄັດເລືອກໃນ 2 ຮອບລວມມີ (ນາງ ພິດສະໄຫມ ລະດາລົມ, ນາງ ສົມ ພິດ ສີຫາລາດ, ທ້າວ ສຸລິຍາ ກັນຍາ, ນາງ ອໍລະພັນ ໂພນທະຈັນ, ທ້າວ ແອັບເປິ້ນ ວິໄລ, ທ້າວ ສຸລິຍາ ວັນນະລາດ, ທ້າວ ກ້ອງເມັ່ງ ເຮີລຽວເຊີ ແລະ ນາງ ພິດສະດາ ສີລິວົງສາ).
ຜູ້ແຂ່ງຂັນສາມາດເລືອກ 1 ໃນ 3 ຫົວຂໍ້ເຊັ່ນ: ພາສາເກົາຫລີຕໍ່ກັບຕົວຂ້ອຍ, ພາສາເກົາຫລີຕໍ່ກັບອະນາຄົດຂອງຂ້ອຍ ແລະ ມິດຕະພາບລາວເກົາຫລີ ໂດຍໃຊ້ເວລາໃນການອະທິບາຍຄົນລະ 5 ນາທີ, ຜົນປາກົດວ່າຜູ້ຊະນະເລີດລາງວັນທີ 1 ໄດ້ແກ່ນາງ ພິດສະດາ ສີລິວົງສາ ອາຍຸ 23 ປີ ສຶກສາທີ່ພາກວິຊາພາສາເກົາຫລີມະຫາວິທະຍາໄລແຫ່ງຊາດ (ພື້ນຖານຈາກບ້ານທົ່ງຈະເລີນ ເມືອງຄົງເຊໂດນ ແຂວງສາລະວັນ), ລາງວັນທີ 2 ທ້າວ ກ້ອງເມັ່ງ ເຮີລຽວເຊີ ແລະ ລາງວັນທີ 3 ທ້າວ ສຸລິຍາ ວັນນະລາດ ຂະນະທີ່ທັງ 3 ຄົນໄດ້ເລືອກອະທິບາຍໃນຫົວຂໍ້ດຽວກັນ “ພາສາເກົາຫລີຕໍ່ກັບຕົວຂ້ອຍ”.
ຜູ້ຊະນະເລີດລາງວັນທີ 1 ໄດ້ຮັບຄອມພິວເຕີໂນດບຸກຊຳຊຸງ, ຮັບການຝຶກອົບຮົມພາສາ ແລະ ທ່ອງທ່ຽວປະເທດເກົາຫລີເປັນເວລາ 11 ອາທິດ, ລາງວັນທີ 2 ຮັບໄອພອດ 1ເຄື່ອງ ແລະ ລາງ ວັນທີ 3 ຮັບກ້ອງຖ່າຍຮູບຊຳຊຸງ 1 ເຄື່ອງ.
ຈຸດປະສົ່ງຂອງການຈັດງານຄັ້ງນີ້ ແມ່ນເພື່ອເສີມສ້າງຄວາມສາມັກຄີລະຫວ່າງລາວ-ເກົາຫລີ ກ້າວເຂົ້າສູ່ປີທີ 17 ທີ່ສອງປະເທດໄດ້ໃຫ້ການຮ່ວມມືໃນຫລາຍໆ ດ້ານເປັນຕົ້ນແມ່ນດ້ານເສດຖະກິດການເງິນ-ການລົງທຶນ, ປະຈຸບັນ ປະເທດເກົາຫລີຕິດອັນດັບທີ 4 ຂອງການລົງທຶນຕ່າງປະເທດຫລາຍທີ່ສຸດຢູ່ ສປປ ລາວ ອີກ ຢ່າງຫນຶ່ງເພື່ອເປີດໂອກາດ ແລະ ຄວາມຫວັງໃຫມ່ໃຫ້ແກ່ຊາວຫນຸ່ມລາວ, ເພາະວ່າ ການທີ່ເຂົ້າ ໃຈ ຫລື ສາມາດເວົ້າພາສາເກົາຫລີໄດ້ບໍ່ພຽງຈະສາມາດເຂົ້າໃຈໃນການຟັງເພງເກົາຫລີ ຫລື ເບິ່ງຮູບເງົາຢ່າງມ່ວນຊື່ນເທົ່ານັ້ນ, ແຕ່ມັນຍັງສາມາດນຳໃຊ້ເຂົ້າໃນການເຮັດທຸລະກິດ ຫລື ສິ່ງທີ່ໃຫຍ່ກວ່ານັ້ນອີກໃນອະນາຄົດ,ທ່ານ ລີກອນແທ ກ່າວ.
ຊົມເຊີຍຄົນຕັ້ງກະທູ້ນີ້ເດີ....ສຳລັບພວກທີ່ຄິດອະຄະຕິແລ້ວພວກເຂົາມອງເປັນແງ່ລົບທັງໝົດ ເອົາຄະຕິຢູ່ເໜືອເຫດຜົນ.....(ການຮັກແລະສາມັກຄີກັນເປັນສິ່ງທີ່ດີ...ບໍ່ແມ່ນໄປຍູ້ແຍ່ໃຫ້ເຂົາເຈົ້າຜິດກັນແລ້ວເອົາກຳລັງທະຫານໄປຂ້າເຂົາ, ເອົາລູກລະເບີດໄປຫວ່ານໃສ່ບ້ານເຂົາ, ໄປກອບໂກຍເອົາຊັບພະຍາກອນເຂົາ ເໝືອນປະເທດມະຫາອຳນາດບາງປະເທດ ເຊິ່ງຫຼາຍຄົນນັບຖືວ່າ ມັນເປັນພໍ່)
ພໍ່ຕູ້ອານຸຣັກຮູ້ຂໍ້ມູນແລ້ວບໍ່ເນາະວ່າຢູ່ມະຫາວິທະຍາໄລແຫ່ງຊາດ ຄະນະສຶກສາສາດ ມີພາກວິຊາພາສາເກົາຫຼືແລ້ວເດີພໍ່ຕູ້ໃນອານາຄົດລາວຊິເປັນຫົວເມືອງຂື້ນເກົາຫຼີວ່າຊັນ
ຂ້ອຍກະບໍ່ຮູ້ວ່າມີນັກຊ່ຽວຊານເກົາຫລີຈັກຄົນທີ່ປະຈໍາຢູ່ຫ້ອງການກົມການເມືອງສູນກາງພັກ, ຖ້າມີຊາດໃດເປັນນັກຊ່ຽວຊານທີ່ຖ້າແນະນໍາໃຫ້ວາງນະໂຍບາຍຕ່າງໆໃຫ້ກັບກົມການເມືອງສູນກາງພັກ ກໍ່ໝາຍຄວາມວ່າ ...ເວົ້າບໍ່ໄດ້ເດີ ຢ້ານຖືກຍົກຍ້າຍໄປສັບຊ້ອນຢູ່ຕ່າງແຂວງທີ່ສອກຫລີກຫ່າງໄກ.
