ພັກລັດເຫັນດີໃຫ້ນັກລົງທຶນຈີນ ສໍາຫລວດແຮ່ເກືອກາລີຢູ່ນະຄອນຫລວງ
ລັດຖະບານ ລາວໄດ້ອະນຸມັດໃຫ້ບໍລິສັດປັກກິ່ງປູເຢລົງທຶນ (ລາວ) ຈຳກັດ ເຂົ້າຊອກຄົ້ນ ແລະ ສຳຫລວດແຮ່ເກືອກາລີ (ໂປຕາດສ) ຢູ່ເຂດບ້ານຫາດກ້ຽງ, ບ້ານປາກຊາບ, ບ້ານ ຫລັກ 51 ເມືອງໄຊທານີ ແລະ ບ້ານແສນອຸດົມ ເມືອງປາກງື່ມ ນະຄອນຫລວງວຽງຈັນ ໃນເນື້ອທີ່ 259,4 ກິໂລແມັດ
ພິທີເຊັນສັນຍາໄດ້ມີຂຶ້ນໃນຕອນແລງມື້ວານນີ້ ທີ່ກະຊວງແຜນການ ແລະ ການລົງທຶນ, ຕາງຫນ້າໃຫ້ລັດຖະບານລາວລົງນາມໂດຍ ທ່ານ ດຣ. ບຸນທະວີ ສີສຸພັນທອງ ລັດຖະມົນຕີ ຊ່ວຍວ່າການກະຊວງແຜນການ ແລະ ການລົງທຶນ ກັບ ທ່ານ ຊູກາວມິງ ປະທານບໍລິສັດ ປັກກິ່ງປູເຢລົງທຶນ (ລາວ) ຈຳກັດ, ນອກນີ້ ຍັງມີບັນດາທ່ານແຂກທີ່ກ່ຽວຂ້ອງເຂົ້າຮ່ວມ.
ໂດຍລັດຖະບານໄດ້ອະນຸມັດໃຫ້ບໍລິສັດດັ່ງກ່າວ ເຂົ້າຊອກຄົ້ນ ແລະ ສໍາຫລວດແຮ່ເກືອກາລີ (ໂປຣຕາດສ) ໃນ 2 ເມືອງຂອງນະຄອນຫລວງວຽງຈັນຄື: ເຂດບ້ານຫາດກ້ຽງ, ບ້ານປາກຊາບ, ບ້ານຫລັກ 51 ເມືອງໄຊທານີ ແລະ ບ້ານແສນອຸດົມ ເມືອງປາກງື່ມໃນເນື້ອທີ່ທັງ ຫມົດ 259,4 ກິໂລແມັດ.
ໃນພິທີດັ່ງກ່າວ ທ່ານ ຊູກາວ ມິງ ໄດ້ກ່າວວ່າ: ບໍລິສັດປັກກິ່ງປູເຢລົງທຶນແມ່ນມີປະສົບການໃນການສໍາຫລວດຂຸດ ຄົ້ນແຮ່ເກືອ, ຄຳ ແລະ ທອງ ມາຫລາຍ ກວ່າ 30 ປີ, ປະຈຸບັນບໍລິສັດມີກຳມະສິດບໍ່ແຮ່ 56 ແຫ່ງຢູ່ພາຍໃນ ແລະ ຕ່າງປະເທດ ມີເນື້ອທີ່ທັງຫມົດ 2.220 ກິໂລແມັດ, ມີຖານການຜະລິດ 7 ແຫ່ງ, 3 ສາຂາ ບໍລິສັດລູກ ລວມມີພະນັກງານປະມານ 5.000 ກວ່າຄົນ, ສາມາດຂຸດຄົ້ນບໍ່ຄຳໄດ້ 7.500 ໂຕນຕໍ່ມື້, ມີຄວາມສາມາດປຸງແຕ່ງຄຳທີ່ມີຄຸນນະພາບສູງໄດ້ 1.000 ໂຕນ, ສາມາດຜະລິດຄຳໄດ້ 16 ໂຕນ, ເງິນ 40 ໂຕນ, ຜະລິດທອງສາຍໄຟຟ້າ 10.000 ໂຕນ, ແຜ່ນທອງທີ່ມີຄຸນນະພາບ 13.500 ໂຕນຕໍ່ປີ
