ກວມເອົາ 7 ໝູ່ ບ້ານຂອງເມືອງໄຊເຊດຖາ ແລະ ເມືອງໄຊທານີ ໄລຍະສຳປະທານ 50 ປີ
ວັນ ທີ 26 ມີນາ 2012 ທີ່ຫ້ອງວ່າການປົກຄອງນະຄອນຫຼວງ ໄດ້ສໍາມະນາກ່ຽວກັບການພັດທະນາເສດຖະກິດພິເສດ ແລະ ເຂດເສດຖະກິດສະເພາະ (ຂພສ) ຂຶ້ນ ໂດຍເປັນປະທານຂອງທ່ານນາງ ບຸນເພັງ ມູນໂພໄຊ ລັດຖະມົນຕີປະຈຳຫ້ອງວ່າການລັດຖະບານ ຮອງປະທານຜູ້ປະຈຳການ ຄະນະກຳມະການແຫ່ງຊາດລາວ ເພື່ອຄຸ້ມຄອງ ຂພສ ມີບັນດາທ່ານຮອງເຈົ້າຄອງນະຄອນຫຼວງ ກໍຄືການນຳນະຄອນຫຼວງ ແລະ ນັກທຸລະກິດເຂົ້າຮ່ວມ.
ການ ຈັດສຳມະນາຄັ້ງນີ້ ກໍເພື່ອເຮັດໃຫ້ການນຳນະຄອນຫຼວງ ກໍຄືຜູ້ເຂົ້າຮ່ວມເຂົ້າໃຈ ແລະ ກໍາໄດ້ເນື້ອໃນຈິດໃຈ ແລະ ນະໂຍບາຍຂອງພັກ-ລັດຖະບານລາວເຮົາ ໃນການສ້າງສາພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ໃນປີ 2020 ໂດຍສະເພາະເຂົ້າໃຈຕໍ່ການສ້າງເຂດເສດຖະກິດ ຂພສ ຊຶ່ງກອງປະຊຸມໄດ້ຜ່ານຂໍ້ຕົກລົງສ້າງຕັ້ງເຂດພັດທະນາກວມລວມໄຊ ເຊດຖາ ຂໍ້ຕົກລົງວ່າດ້ວຍການແຕ່ງຕັ້ງຄະນະບໍລິຫານ ຂພສ ສະເໜີກ່ຽວກັບການພັດທະນາ ຂພສ ແຜນຍຸດທະສາດການພັດທະນາ ຂພສ ຢູ່ ສປປ ລາວ ແຜນແມ່ບົດການພັດທະນາ ຂພສ ແລະ ອື່ນໆ ຫຼັງຈາກນັ້ນ ກໍໄດ້ເປີດກ້ວາງໃຫ້ຜູ້ເຂົ້າຮ່ວມໄດ້ປະກອບຄຳຄິດຄຳເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ໄດ້ຮັບຜົນສຳເລັດຕາມລະດັບຄາດໝາຍ.
ໃນ ການສໍາມະນາຄັ້ງນີ້ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງ ຍັງໄດ້ແຈ້ງໃຫ້ຊາບກ່ຽວກັບການຈັດຕັ້ງປະຕິບັດ ຂພສ ຢູ່ໃນນະຄອນຫຼວງ ຄື: ປັດຈຸບັນຢູ່ນະຄອນຫຼວງ ມີ 2 ຈຸດ ໜຶ່ງ: ເຂດເສດຖະກິດ ອຸດສາຫະກຳ ແລະ ການຄ້າວຽງຈັນ-ໂນນທອງ ແລະ ສອງ:ເຂດ ພັດທະນາກວມລວມໄຊເຊດຖາ ສະເພາະແຜນພັດທະນາກວມລວມໄຊເຊດຖານີ້ ນະຄອນຫຼວງຕາງໜ້າໃຫ້ລັດຖະບານລາວ ໄດ້ເຊັນສັນຍາກັບບໍລິສັດແຂວງຢຸນນານ ສປ.ຈີນ ສ້າງຕັ້ງບໍລິສັດຮ່ວມທຶນ ລາວ-ຈີນ ຂຶ້ນ ເພື່ອພ້ອມກັນພັດທະນາເຂດດັ່ງກ່າວ ຊຶ່ງໄດ້ກຳນົດເອົາເນື້ອທີ່ດິນ ຈຳນວນ 1.000 ເຮັກຕາ ກວມເອົາ 7 ບ້ານຂອງເມືອງໄຊເຊດຖາ ແລະ ເມືອງໄຊທານີ ໄລຍະສໍາປະທານ 50 ປີ ຕໍ່ໄດ້ 25 ປີ ປັດຈຸບັນ ການນໍານະຄອນຫຼວງ ໄດ້ແຕ່ງຕັ້ງຄະນະກຳມະການແກ້ໄຂທີ່ດິນ ສໍາຫຼວດ ກຳນົດຂໍ້ມູນ ຂຶ້ນແຜນຈ່າຍເງິນເພື່ອຊົດເຊີຍ ແກ່ເຈົ້າຂອງດິນທີ່ຜົນກະທົບຈາກໂຄງການ ພ້ອມກັນນັ້ນ ການນໍານະຄອນຫຼວງ ກໍໄດ້ຮັບຮອງເອົາແຜນແມ່ບົດເຂດກວມລວມໄຊເຊດຖາ ແລະ ປັດຈຸບັນ ກຳລັງກະກຽມສະເໜີຕໍ່ກອງປະຊຸມລັດຖະບານ.
