ເລີ່ມກໍ່ສ້າງສູນເສດຖະກິດການຄ້າຄົບວົງຈອນ
ພິທີ ວາງສີລາລຶກການກໍ່ສ້າງໂຄງການພັດທະນາສູນເສດຖະກິດການຄ້າຄົບ ວົງຈອນໜອງຈັນຕອນເໜືອ (ວຽງຈັນເຊັນເຕີ) ໄດ້ມີຂຶ້ນວັນທີ 31 ມີນາ 2012 ຜ່ານມາ ໂດຍໃຫ້ກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ທ່ານ ຫຼີຈີ້ເຫີງ ເຈົ້າແຂວງຢຸນນານ ສປ.ຈີນ ທ່ານທູດຈີນ ປະຈຳລາວ ບັນດາທ່ານລັດຖະມົນຕີວ່າການ ຊ່ວຍວ່າການ ການນຳນະຄອນຫຼວງ ນັກທຸລະກິດທັງ ຈີນ ແລະ ລາວ.
ໃນພິທີທ່ານ ເດດສົງຄາມ ທໍາມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງ ໄດ້ຂຶ້ນກ່າວລາຍງານວ່າ: ໂຄງການດັ່ງກ່າວກໍແມ່ນໂຄງການບູລິມະສິດໜຶ່ງທີ່ນອນຢູ່ໃນແຜນ ພັດທະນາຂອງນະຄອນຫຼວງວຽງຈັນ ຊຶ່ງທາງນະຄອນຫຼວງ ໄດ້ມີແຜນ ແລະ ນະໂຍບາຍໃນການດຶງດູດ ແລະ ສົ່ງເສີມການລົງທຶນພາຍໃນ ແລະ ຕ່າງປະເທດ ເພື່ອເປັນການພັດທະນາເສດຖະກິດ-ສັງຄົມໃນນະຄອນຫຼວງວຽງຈັນ ຈາກນະໂຍບາຍສົ່ງເສີມດັ່ງກ່າວ ກໍໄດ້ມີບໍລິສັດພາຍໃນ ແລະ ຕ່າງປະເທດ ໃຫ້ຄວາມສົນໃຈ ແລະ ມາລົງທຶນ ໂດຍສະເພາະແມ່ນພື້ນທີ່ຢູ່ເຂດໜອງຈັນ ທີ່ເປັນເຂດໃຈກາງການຄ້າ ແລະ ມີທ່າອ່ຽງຂອງການພັດທະນາທາງດ້ານເສດຖະກິດ-ສັງຄົມຂຶ້ນເລື້ອຍໆ ມາຮອດປີ 2010 ກໍໄດ້ມີການວາງແຜນຈັດສັນ ໂດຍຮ່ວມກັບບໍລິສັດ ກຼິດຕະພົງ ກຼຸບ ແລະ ກຸ່ມບໍລິສັດວິສາວະກຳກໍ່ສ້າງແຂວງຢຸນນານ ສປ.ຈີນ ຮ່ວມກັນເຈລະຈາເງື່ອນໄຂຕ່າງໆ ແລະ ເກັບກຳຂໍ້ມູນ ໄດ້ມີການເຊັນສັນຍາຮ່ວມກັນໃນວັນທີ 29/9/2010 ກຳນົດເວລາສຳປະທານ 50 ປີ ແລະ ສາມາດຕໍ່ໄດ້ 20 ປີ ໂດຍອີງຕາມກົດໝາຍວ່າດ້ວຍການລົງທຶນຂອງ ສປປ ລາວ.
ເປົ້າໝາຍໃນການພັດທະນາເຂດດັ່ງກ່າວ ແມ່ນຈະພັດທະນາເປັນເຂດເສດຖະກິດຄົບວົງຈອນ ມີຄວາມທັນສະໄໝ ລວມມີສູນການຄ້າ ຫ້ອງປະຊຸມ ທີ່ພັກອາໄສ ຫ້ອງການທີ່ທັນສະໄໝ ເຂດຂຽວ ແລະ ອື່ນໆ ການພັດທະນາໄດ້ແບ່ງອອກເປັນ 3 ໄລຍະຄື: ໄລຍະທີ 1.ກໍ່ສ້າງໂຄງລ່າງພື້ນຖານ ປັບປຸງໜອງນ້ຳ ເຂດຂຽວ ແລະ ສູນການຄ້າ ໄລຍະກໍ່ສ້າງແມ່ນ 24 ເດືອນ (ນັບແຕ່ວັນທີ 1/4/2012-1/4/2014) ໄລຍະທີ 2.ກໍ່ສ້າງຫ້ອງປະຊຸມ ຫ້ອງການ ທີ່ພັກອາໄສ ແລະ ຫ້ອງວາງສະແດງສິນຄ້າ ໄລຍະການກໍ່ສ້າງແຕ່ວັນທີ 1/4/2014-1/10/2015 ແລະ ໄລຍະທີ 3.ກໍ່ສ້າງອາຄານເພື່ອຈັດງານອະເນກປະສົງ ໄລຍະການກໍ່ສ້າງແມ່ນ 12 ເດືອນ ແຕ່ປີ 2016-2017 ໂຄງການດັ່ງກ່າວແມ່ນໂຄງການຮ່ວມທຶນລະຫວ່າງນັກທຸລະກິດພາຍໃນ 40% ແລະ ນັກທຸລະກິດຕ່າງປະເທດ 60% ມີມູນຄ່າການລົງທຶນທັງໝົດ 90 ກວ່າລ້ານໂດລາສະຫະລັດ ປະມານ 700 ກ່ວາຕື້ກີບ
