ທ່ານ ຄໍາພູນ ເຕເມລາດ ອໍານວຍການລັດວິສາຫະກິດລົດເມນະຄອນຫຼວງວຽງຈັນ ໄດ້ກ່າວໃຫ້ຮູ້ວ່າ: ລົດເມຈໍານວນດັ່ງກ່າວນໍາສົ່ງມາເຖິງນະຄອນຫຼວງວຽງຈັນຂອງພວກເຮົາ ໃຫ້ສຳເລັດ ພາຍໃນເດືອນພຶດສະພາ 2012 ຊຶ່ງຊຸດທີ 2 ຈໍານວນ 8 ຄັນ ຈະມາເຖິງວັນທີ 26 ເມສານີ້ ລົດເມທີ່ນໍາເຂົ້າມາໃໝ່ນີ້ແມ່ນເປັນລົດເມຢູ່ໃນສະພາບໃໝ່ມີ 45 ບ່ອນນັ່ງ ພ້ອມຕິດແອເຢັນ ຖືວ່າເປັນລົດທີ່ທັນສະໄໝພໍສົມຄວນ ເພື່ອຮັບປະກັນໃຫ້ແກ່ການຮັບໃຊ້ການບໍລິການຂົນສົ່ງມວນຊົນ ນະຄອນຫຼວງວຽງຈັນ.
ທ່ານ ຄໍາພູນ ເຕເມລາດ ຍັງໃຫ້ຮູ້ຕື່ມວ່າ: ເບື້ອງຕົ້ນນີ້ ຝ່າຍລາວ ປະກອບມີ ກົມຂົນສົ່ງ ພະແນກໂຍທາທິການ ແລະ ຂົນສົ່ງ ນະຄອນຫຼວງ ແລະ ລັດວິສາຫະກິດລົດເມນະຄອນຫຼວງ ຈະໄດ້ສົມທົບກັບວິຊາການອົງການໄຈກາ ແລະ ວິຊາການບໍລິສັດຜະລິດລົດປະເທດຍີ່ປຸ່ນ ປຶກສາຫາລືການກະກຽມການມອບ-ຮັບລົດ ແລະ ຝຶກອົບຮົມແນະນຳທາງດ້ານເຕັກນິກ ກໍຄືການນຳໃຊ້ ແລະ ການບຳລຸງຮັກສາລົດໃຫ້ແກ່ພະນັກງານວິຊາການຂອງລາວ ໂດຍສະເພາະຜູ້ຂັບລົດເພື່ອຮັບປະກັນທາງດ້ານເຕັກນິກ ແລະ ການບໍລິການຜູ້ໂດຍສານທີ່ມີຄຸນນະພາບປອດໄພ.
ລົດເມໃໝ່ ຈໍານວນ 42 ຄັນ ແມ່ນຈະໄດ້ນຳໃຊ້ຂົນສົ່ງຜູ້ໂດຍສານຢູ່ພາຍໃນນະຄອນຫຼວງວຽງຈັນ ກໍຄືພໍ່ແມ່ປະຊາຊົນຈົ່ງມີສ່ວນຮ່ວມໃນການມີຄໍາຄິດຄໍາເຫັນວ່າ ຈະຄວນປັບປຸງບັນຫາໃດ ແລະ ສະເໜີໃຫ້ເສັ້ນທາງໃດຄວນມີລົດເມປະຈໍາທາງ ແລະ ບັນຫາອື່ນໆ ເພື່ອຈະໄດ້ມາປັບປຸງຖອດຖອນບົດຮຽນໃນຕໍ່ໜ້າ.
