ການຕໍ່ຕ້ານ ໂຄງການ ເຂື່ອນ ໄຊຍະບູຣີ ໃນ ປະເທດໄທ ຂຍາຍ ໂຕຂື້ນ.
ໃນວັນທີ່ 30 ເມສາ ນີ້ ຜູ້ຕາງໜ້າ ຈາກ 130 ອົງກອນ ຂອງການ ຈັດຕັ້ງ ມະຫາຊົນ ໄດ້ພິມຖ້ອຍ ຖແລງ ເພື່ອສນັບສນູນ ແຜນການ ພັທນາພລັງງານ ທາງເລືອກໃໝ່ ແທນການ ສ້າງເຂື່ອນ ໄຊຍະບູຣີ ໃສ່ ແມ່ນໍ້າ ຂອງ ຂອງລາວ. ລາຍງານ ຂອງອົງການ ແມ່ນໍ້າ ສາກົນ ທີ່ອ້າງຕາມ ລາຍງານ ຂອງນັກຊ່ຽວຊານ ດ້ານພລັງງານ ວ່າບໍ່ຕ້ອງການ ໄຟຟ້າ ຈາກເຂື່ອນ ໄຊຍະບູຣີ ເພື່ອຕອບສນອງ ຄວາມຕ້ອງການ ພລັງງານໄຟຟ້າໃນປະເທດໄທ. ແຜນການ ພັທນາພລັງງານ ສໍາລັບປີ 2012 ສະເໜີໂດຍ ຍານາງ ຊື່ນຊົມ ສະງ່າຣາສີ Greacen ແລະ ດຣ. Chris Greacen ນັກຊ່ຽວຊານ ດ້ານພລັງງານ ທີ່ສົ່ງຂື້ນໄປ ຍັງຣັຖບານໄທ ເມື່ອ ອາທິດ ທີ່ແລ້ວນີ້ ມີໃຈຄວາມ ໃນຕອນນື່ງວ່າ:
"ຖ້າຫາກວ່າ ພວກເຮົາລົງທືນ ໃສ່ການ ຄຸ້ມຄອງ ພລັງງານ ໃຫ້ດີ ລົງທືນໃສ່ ພລັງງານ ຍືນຍົງ ການຜລິດ ພລັງງານ ແບບມີ ປະສິດທິພາບ ຣາຄາການໃຊ້ ໄຟຟ້າ ບໍ່ພຽງ ແຕ່ຖືກລົງ ແລະ ເຮົາຈະຫລີກລຽງ ບໍ່ສ້າງ ໂຮງໄຟຟ້າ ພລັງງານ ປະຣາມານູ ຫລີກລຽງການ ນໍາເຂົ້າໄຟຟ້າ ຈາກເຂື່ອນ ໄຊຍະບູຣີ ແລະ ພວກເຮົາບໍ່ຕ້ອງ ການສ້າງ ໂຮງໄຟຟ້າ ພລັງງານ ຖ່ານຫີນໃໝ່. ພວກເຮົາມີທາງ ເລືອກທີ່ດີກ່ວາ".
ຕາມແຜນການ ທີ່ຮຽກຮ້ອງ ໃຫ້ລົງທືນ ໃສ່ພລັງງານ ທີ່ບໍ່ໝົດເປັນ ຈັກເທື່ອນີ້ ແລະ ການລົງທືນ ໃສ່ພລັງງານ ທາງເລືອກອື່ນໆ ອາດຈະເຮັດ ໃຫ້ຣາຄາ ຄ່າໃຊ້ໄຟຟ້າ ຫລຸດລົງ ເຖິງ 12% ພາຍໃນປີ 2030. ຍານາງ ຊື່ນຊົມ ສະງ່າຣາສີ ວ່າ ການວາງແຜນ ພລັງງານ ຂອງໄທ ຢູ່ໃນ ສະພາບວິກິດ ການປະເມີນ ຄວາມຕ້ອງການ ພລັງງານ ເກີນຂອບເຂດ ມາຕຣອດນີ້ ໄດ້ນໍາໄປສູ່ ການລົງທືນ ເກີນຄວາມ ຕ້ອງການ ແລະສິ້ນເປືອງ ເສຖກິດ ແລະ ຕໍ່ຜູ້ໃຊ້ ໄຟຟ້າ.
