ຍັງບໍ່ທັນໄດ້ໃຊ້ງານແຕ່ສັງເກດເຫັນວ່າບາງບ່ອນມີຮອຍແຕກແຫງແລ້ວ
ໂຄງການກໍ່ສ້າງເສັ້ນ ທາງແຕ່ກຳແພງຫລັກ 6 ຫາບ້ານຊ້າງຄູທີ່ເລີ່ມລົງມືມາແຕ່ຕົ້ນປີ, ອີງຕາມການໃຫ້ຂໍ້ມູນຂອງພະນັກງານທີ່ກ່ຽວຂ້ອງກ່າວວ່າ: ຕາມແຜນການຄາດວ່າ ການກໍ່ສ້າງຈະໃຫ້ສຳເລັດໃນທ້າຍປີນີ້, ແຕ່ປະຊາຊົນເຂດບ້ານດັ່ງກ່າວຮຽກຮ້ອງຂໍໃຫ້ຜູ້ຮັບຜິດຊອບເລ່ງ ດຳເນີນການເພາະທຽວຍາກກ້າວເຂົ້າສູ່ຫນ້າຝົນຍິ່ງເປັນຫ່ວງ.
ເມື່ອບໍ່ດົນມານີ້ ຫນັງສືພິມເສດຖະກິດສັງຄົມໄດ້ຮັບໂທລະສັບຈາກປະຊາຊົນເຂດບ້ານ ສີວິໄລພະຂາວຮຽກຮ້ອງໃຫ້ທີມຂ່າວຊ່ວຍສ່ອງແສງເຖິງພາກສ່ວນທີ່ ກ່ຽວຂ້ອງ ເຊິ່ງຜູ້ໂທມາແຈ້ງວ່າ: ການກໍ່ສ້າງເສັ້ນທາງດັ່ງກ່າວນີ້ ໄດ້ລົງມືປະຕິບັດມາແຕ່ຕົ້ນປີ, ໂດຍສະເພາະຍ່ານທາງຜ່ານລະຫວ່າງບ້ານສີວິໄລຫາບ້ານພະຂາວສອງຟາກ ທາງທີ່ຖືກຂຸດເຈາະ ເພື່ອສ້າງເປັນຮ່ອງລະບາຍນ້ຳສົ່ງຜົນໃຫ້ທາງເຂົ້າບ້ານຂອງ ປະຊາຊົນຖືກຕັດຂາດ, ຮອດປະຈຸບັນເກືອບສອງເດືອນແລ້ວເຮັດໃຫ້ຜູ້ໃຊ້ລົດຈັກ, ລົດໃຫຍ່ຕ້ອງລຳບາກໃນການຂ້າມໄຕ່ໄປມາ, ນອກຈາກນັ້ນ ທໍ່ນ້ຳປະປາຂອງແຕ່ລະເຮືອນກໍ່ຖືກຕັດຂາດເຮັດໃຫ້ບາງເຮືອນບໍ່ມີ ນ້ຳໃຊ້ເກືອບຫນຶ່ງອາທິດ, ອີກທັງເວລາຝົນຕົກເຮັດໃຫ້ການທຽວທາງພົບຄວາມລຳບາກ, ລົດບາງຄັນກໍ່ຫລົ່ມ ແລະ ຫມື່ນຕົກຮ່ອງ ຂະນະທີ່ໄລຍະນີ້ຫາກໍ່ເປັນພຽງໄລຍະຕົ້ນຂອງລະດູຝົນບວກກັບ ເສັ້ນທາງທີ່ຂ້ອນຂ້າງແຄບຈິ່ງຍິ່ງເພີ່ມຄວາມຫຍຸ້ງຍາກແກ່ການ ເດີນທາງຂອງຜູ້ໃຊ້ລົດ, ໃຊ້ຖະຫນົນ.
ປະຊາຊົນທີ່ໂທເຂົ້າມາບອກວ່າ ບັນຫາຫນຶ່ງທີ່ສຳຄັນກ່ຽວກັບເຕັກນິກການກໍ່ສ້າງຮ່ອງລະບາຍນ້ຳ, ແມ່ນມີຄວາມເປັນຫ່ວງຕໍ່ການໃຊ້ງານໃນອະນາຄົດເພາະສ່ວນພື້ນຂອງ ຮ່ອງເທດ້ວຍຊີມັງ ແຕ່ບໍ່ມີຕານ່າງເຫລັກຊ່ວຍຄ້ຳແຮງ ເພາະປະຈຸບັນຍັງບໍ່ທັນໄດ້ໃຊ້ງານແຕ່ສັງເກດເຫັນວ່າບາງບ່ອນມີ ຮອຍແຕກແຫງແລ້ວ.
ຕໍ່ບັນຫານີ້ ປະຊາຊົນຫລາຍຄົນກໍ່ສະແດງຄວາມຫ່ວງດ້ວຍສຽງດຽວກັນ, ເພາະອະນາຄົດຈະຕ້ອງມີລົດໃຫຍ່ທຽວເຂົ້າອອກເປັນປະຈຳທຸກວັນຕໍ່ ກັບບັນຫານີ້ໄລຍະຜ່ານມາ ເຄີຍສົ່ງ ຂ່າວໄປຍັງພະນັກງານຄົນຫນຶ່ງ ເພື່ອສານຕໍ່ເຖິງພາກສ່ວນທີ່ກ່ຽວຂ້ອງໃຫ້ລົງມາກວດກາ ແຕ່ຈົນມາເຖິງປະຈຸບັນກໍ່ຍັງບໍ່ເຫັນມີພາກສ່ວນໃດລົງມາຕິດຕາມ ທ່ານທີ່ໂທລະສັບມາກ່າວຢ້ຳ.
ຕໍ່ກັບປະເດັນດັ່ງກ່າວນີ້ ທີມຂ່າວຫນັງສືພິມເສດຖະກິດ-ສັງຄົມໄດ້ລົງໄປເບິ່ງ ແລະ ນຳສະເຫນີຂ່າວຕາມການຮຽກຮ້ອງຂອງປະຊາຊົນ ແຕ່ບໍ່ໄດ້ມີເຈດຕະນາແຕະຕ້ອງພາກສ່ວນໃດພຽງແຕ່ເປັນສື່ກາງໃຫ້ ແກ່ສັງຄົມ.
