ເຂດເສດຖະກິດບໍ່ເຕ່ນແດນຄໍາ ປ່ຽນຜູ້ພັດທະນາໃຫມ່
ເຂດ ເສດຖະກິດພິເສດບໍ່ເຕ່ນແດນຄຳ ປະຈຸບັນໄດ້ປ່ຽນຜູ້ພັດທະນາໃຫມ່ ໂດຍແມ່ນບໍລິສັດໄຮເສິນ ຈາກສິບສອງພັນນາ ສປ ຈີນ, ເນັ້ນສານຕໍ່ 12 ກິດຈະກຳຫລັກ ຂະນະທີ່ກາຊີໂນ ຖືກລົບຈາກບັນຊີການພັດທະນາ.
ທ່ານ ວອນຄຳ ເພັດທະວົງ ຫົວຫນ້າຄະນະບໍລິຫານເຂດເສດຖະກິດພິເສດບໍ່ເຕ່ນແດນຄຳ ເປີດເຜີຍຕໍ່ທີມຂ່າວເສດຖະກິດ ເມື່ອທ້າຍອາທິດຜ່ານມາວ່າ: ມາຮອດປະຈຸບັນ ເຂດເສດຖະກິດບໍ່ເຕ່ນແດນຄຳ ແມ່ນໄດ້ສຳເລັດເປັນທີ່ຮຽບຮ້ອຍແລ້ວສຳລັບການມອບໂອນກິດຈະການຈາກ ບໍລິສັດ ຮົງກົງ ຄັອກທິງ ຈຳກັດ (ນັກລົງທຶນຜູ້ເກົ່າ) ໃຫ້ແກ່ບໍລິສັດໄຮເສິນ ຈາກສິບສອງພັນນາ ສປ ຈີນ ເຊິ່ງບໍລິສັດດັ່ງກ່າວ ປະຈຸບັນຢູ່ໃນຂັ້ນຕອນເຮັດຮ່າງສັນຍາກິດຈະການກັບລັດຖະບານ ແລະ ຈະດຳເນີນໃນ 12 ກິດຈະການຕາມການອະນຸຍາດ.
ທ່ານ ວອນຄຳ ເພັດທະວົງ ໃຫ້ຮູ້ວ່າ: ເຂດເສດຖະກິດພິເສດບໍ່ເຕ່ນແດນຄຳ ມີທີ່ຕັ້ງຢູ່ແຂວງຫລວງນ້ຳທາ ພາຍຫລັງທີ່ດຳເນີນມາໄດ້ປະມານ 89 ປີຜ່ານມາ ໃນ 12 ກິດຈະການໃນນັ້ນ ໄດ້ດຳເນີນການພັດທະນາພື້ນຖານໂຄງລ່າງ, ເສັ້ນທາງ, ໄຟຟ້າ, ນ້ຳປະປາ ແລະ ອາຄານເຮືອນພັກຕ່າງໆຂອງຜູ້ພັດທະນາ ຂະນະທີ່ຫນຶ່ງໃນນີ້ກິດຈະກາຊີໂນໄດ້ສ້າງລາຍຮັບຫລັກ ແກ່ຜູ້ລົງທຶນ.
ຢ່າງໃດກໍ່ຕາມ ເນື່ອງຈາກລະບົບການຄຸ້ມຄອງບໍລິຫານການຊີໂນຂອງຜູ້ທີ່ມາຮັບສຳ ປະທານນຳຜູ້ພັດທະນາບໍ່ຮັດກຸມ ໂດຍສະເພາະວິທີການກູ້ຢືມ ແລະ ທວງຫນີ້ເງິນກູ້ນອກລະບົບ ໃຫ້ຜູ້ມາໃຊ້ບໍລິການ ໃນຂະນະດຽວກັນ ສປປ ລາວ ກໍ່ຍັງບໍ່ທັນມີນິຕິກຳ ຫລື ລະບຽບໃນການຄຸ້ມຄອງທຸລະກິດການພະນັນ ຈິ່ງກໍ່ໃຫ້ເກີດບັນຫາຄວາມບໍ່ເປັນລະບຽບຮຽບຮ້ອຍໃນສັງຄົມ ລວມທັງມີຜົນກະທົບຕໍ່ການພົວພັນ ແລະ ການຮ່ວມມືຕ່າງປະເທດ ດັ່ງນັ້ນ, ກິດຈະການຈິ່ງໃຫ້ຢຸດເຊົາການດຳເນີນກິດຈະກຳ.
ແນວໃດກໍ່ດີ ສຳລັບຜູ້ພັດທະນາໃຫມ່ນີ້ທ່ານ ວອນຄຳ ເພັດທະວົງ ກ່າວວ່າ: ເລີ່ມຕົ້ນຈະເລ່ງ ໃສ່ 11 ກິດຈະກຳເປັນຕົ້ນແມ່ນກິດຈະກຳດ້ານບໍລິການທ່ອງທ່ຽວ, ສ້າງເຂດຂ່ຽນຖ່າຍສິນຄ້າພາຍໃນ ແລະ ຕ່າງປະເທດ, ເຮືອນພັກ, ໂຮງແຮມ ແລະ ສະຫນາມກ໊ອຟ ທີ່ມີແຜນສ້າງໃນຕໍ່ຫນ້າ.
ໂດຍທຶນຈົດທະບຽນໃນເບື້ອງຕົ້ນ 10 ລ້ານໂດລາສະຫະລັດ ສ່ວນທຶນຫມູນວຽນອາດສູງປະມານ 500 ລ້ານໂດລາສະຫະລັດ ເຊິ່ງບັນດາກິດຈະກຳທີ່ຜູ້ພັດທະນາເກົ່າໄດ້ດຳເນີນມາຈະໄດ້ມີ ການປັບປຸງຄືນໃຫມ່ຫມົດ ແລະ ປະຈຸບັນແມ່ນພວມເລັງໃສ່ປັບປຸງສະຖານທີ່ອາຄານໃຫ້ເປັນໃນ ລັກສະນະຂອງລາວ ແລະ ປະສົມກັບປະເພນີສາກົນ ແຕ່ຫລັກໆແມ່ນແບບລາວໆ ແລະ ເລ່ງສ້າງເຂດຂ່ຽນຖ່າຍຂົນສົ່ງສິນຄ້າຜ່ານແດນ.
ການສ້າງເຂດເສດຖະກິດພິເສດບໍ່ເຕ່ນແດນຄຳຢູ່ແຂວງຫລວງນ້ຳທາ ທ່ານ ວອນຄຳ ເພັດທະວົງ ໃຫ້ມູມມອງວ່າ: ປະຊາຊົນກໍ່ຄືແຂວງຈະໄດ້ຜົນປະໂຫຍດໃນທາງກົງ ແລະ ທາງ ອ້ອມເປັນຕົ້ນແມ່ນເຂດຊາຍແດນລາວ-ຈີນ ຈະໄດ້ຮັບການພັດທະນາເພາະແຂວງດັ່ງກ່າວ ເປັນຈຸດເຊື່ອມຕໍ່ ສປປ ລາວ ກັບ ສປ ຈີນ ນອກຈາກນີ້ປະຊາຊົນ ກໍ່ຍັງຈະມີສະຖານທີ່ຊື້-ຂາຍ ສິນຄ້າກະສິກຳທີ່ຜະລິດໄດ້ ລວມທັງສ້າງວຽກເຮັດງານທຳໃຫ້ ກັບປະຊາຊົນເພາະເຂດດັ່ງກ່າວ ມີຄວາມຕ້ອງການແຮງງານຄົນລາວຈຳນວນຫລາຍເປັນຕົ້ນ ແມ່ນຂະແຫນງບໍລິການ.
