ລາວໂຮມລາວ ເພື່ອປະຊາທິປະໄຕ

ນັກຊ່ຽວຊານ ອະເມຣິກັນ ສເນີໃຫ້ ສປປລາວ ຂຍາຍ ວິທີການສ້າງເມືອງ

ເວັບໄຊຕ໌ ຂອງ ສະຖານທູຕ ສະຫະຣັຖ ອະເມຣິກາ ປະຈຳ ສປປລາວ ຣາຍງານວ່າ ທ່ານ Senen Antonio ວິສວະກອນ ການກໍ່ສ້າງ ອອກແບບ ຈາກ ບໍຣິສັດ ຊື່ດັງແຫ່ງນຶ່ງ ໃນຣັດ ຟລໍລີດາ ສະຫະຣັຖ ອະເມຣິກາ ໄດ້ໄປຢ້ຽມຢາມ ປະເທດລາວ ນັບແຕ່ວັນທີ່ 30 ເດືອນ ກໍຣະກະດາ ຈົນເຖິງວັນທີ່ 2 ເດືອນສິງຫາ ນີ້ແລະ ໄດ້ຫາລືກັບ ເຈົ້າໜ້າທີ່ ກະຊວງ ໂຍທາທິການ ແລະ ຂົນສົ່ງຂອງລາວ ກ່ຽວກັບ ການສ້າງສາພັທນາ ເຂດໃນເມືອງ ຢ່າງຍືນຍົງ.

ທ່ານ Antonio ອະທິບາຍວ່າ ການຂຍາຍເມືອງ ອອກຢ່າງ ບໍ່ມີຣະບຽບ ແບບແຜນ ຢ່າງຄັກແນ່ ໄດ້ສົ່ງຜົນກະທົບ ໃນທາງລົບ ຕໍ່ຊຸມຊົນ ຫລາຍໆແຫ່ງ ໃນລາວ ທ່ານຄິດວ່າ ທາງທີ່ດີແລ້ວ ນະຄອນຫລວງ ວຽງຈັນ ຄວນຫລີກລ້ຽງ ບັນຫາດັ່ງກ່າວ.

ອີກຕອນນຶ່ງ ທ່ານ Antonio ໄດ້ກ່າວຍ້ອງຍໍ ສັລເສີນ ປະເທດລາວ ທີ່ໄດ້ພຍາຍາມ ສ້າງສາພັທນາ ເຂດໃນເມືອງ ຢ່າງຍືນຍົງ. ສິ່ງສຳຄັນ ອີກຢ່າງນຶ່ງ ໃນການ ຂຍາຍຕົວເມືອງ ຜູ້ອອກແບບ ຕ້ອງອອກແບບ ເພື່ອຄົນຍ່າງແດ່ ບໍ່ແມ່ນແຕ່ ເພື່ອຣົດແລນ ຢ່າງດຽວ ນອກຈາກນັ້ນ ຕ້ອງມີຣະບົບ ຂົນສົ່ງມວນຊົນ ຕ້ອງສ້າງຕຶກ ອາຄານ ທີ່ກະທັດລັດ ແລະ ຕ້ອງສ້າງຖນົນ ໃຫ້ເຊື່ອມຕໍ່ກັນ.

ທ່ານ Antonio ນັກຊ່ຽວຊານ ອະເມຣິກັນ ກ່າວອີກວ່າ ຍ້ອນມີການໃຊ້ ຣົດຫລາຍ ປະເທດລາວ ຈຶ່ງປ່ອຍຄວັນໄອພິດ ເຮືອນແກ້ວ ອອກເພິ້ມຂື້ນ ຫລາຍເຖິງ 1,000 ສ່ວນຮ້ອຍ ໃນຣະຍະ ຊາວກວ່າປີ ທີ່ຜ່ານມາ. ນອກຈາກ ຈະໄດ້ພົບປະຫາລື ກັບເຈົ້າໜ້າທີ່ ກະຊວງ ໂຍທາທິການ ແລະຂົນສົ່ງແລ້ວ ທ່ານ Antonio ຍັງໄດ້ໄປ ອະທິປາຍ ວິຊາການ ການກໍ່ສ້າງ ຢູ່ມະຫາວິທຍາໄລ ແຫ່ງຊາດລາວ ແລະ ໃນມື້ສຸດທ້າຍ ທ່ານກໍໄປຢ້ຽມຢາມ ນະຄອນ ຫລວງພຣະບາງ ແລະ ປຶກສາຫາລື ກັບເຈົ້າໜ້າທີ່ ຫ້ອງການ ເມືອງມໍຣະດົກໂລກ ກ່ຽວກັບ ການຮັກສາ ປະເພນີ ແລະ ວັທນະທັມ ຂອງລາວ ເພື່ອໃຫ້ ນະຄອນຫລວງ ພຣະບາງ ເປັນເມືອງທ່ອງທ່ຽວ ສືບຕໍ່ໄປເລື້ອຍໆ.