ການເກັບ ຣາຍຮັບພາສາ ຂາອອກ-ຂາເຂົ້າ ປະຈໍາປີ 2011-2012 ຂອງ ສປປລາວ ບໍ່ໄດ້ຕາມເປົ້າໝາຍ ທີ່ຕັ້ງໄວ້ ແລະ ເປັນອັນນຶ່ງ ໃນ 5 ບັນຫາ ທີ່ເຮັດໃຫ້ ການເກັບຣາຍຮັບ ໂດຍລວມ ບັນລຸ ໄດ້ພຽງແຕ່ 96% ກ່ວາ ຂອງແຜນການ.
ສາເຫດ ສໍາຄັນ ຂອງບັນຫານີ້ ແມ່ນມາຈາກ ການຮົ່ວໄຫລ ແລະ ການຕົກເຮັ່ຍເສັຍຫາຍ ຂອງຣາຍຮັບ ຍ້ອນການຫລີກລ້ຽງ ແລະ ບໍ່ແຈ້ງເສັຍພັນທະ ຂອງໜ່ວຍງານ ທຸຣະກິຈ ທີ່ເກີດຂຶ້ນ ຢ່າງກ້ວາງຂວາງ, ເປັນນຶ່ງ ໃນຈໍານວນ ຂໍ້ຄົງຄ້າງ ຫລາຍຢ່າງ ຂອງຂແນງການເງິນ. ທ່ານ ພູເພັດ ຄໍາພູນວົງ, ຣັຖມົນຕຣີ ວ່າການ ກະຊວງການເງິນ, ກ່າວວ່າ ບັນດາ ວິສາຫະກິຈ ທີ່ດໍາເນີນ ທຸຣະກິຈ ການຄ້າ ຂາເຂົ້າ-ຂາອອກ ຈໍານວນ ຫລວງຫລາຍ ໄດ້ແຈ້ງຂໍ້ມູນ ທີ່ບໍ່ຖືກຕ້ອງ ເພື່ອຫວັງຜົລກໍາໄລ ຫລາຍຂຶ້ນ ດ້ວຍການຮ່ວມມື ກັບ ພະນັກງານ-ຣັຖກອນ ບາງກຸ່ມ ທີ່ຫວັງ ກອບໂກຍ ຜົລປໂຍດສ່ວນຕົວ. ທ່ານ ໄດ້ເນັ້ນຕື່ມວ່າ ບັນຫາ ດັ່ງກ່າວ ເກີດຈາກກົນໄກ ຄຸ້ມຄອງ ຂອງຣັຖ ຍັງບໍ່ທັນເຂັ້ມງວດ ເທົ່າທີ່ຄວນ,ໂດຍສະເພາະ ການຄຸ້ມຄອງ ມູນຄ່າການແຈ້ງພາສີ ບໍ່ໄດ້ໄປ ຕາມຣາຄາ ຕົວຈິງ. ນອກຈາກນັ້ນ, ກໍຍັງມີ ການລັກລອບ ຫລີກລ້ຽງ ພາສີ ທັງໃນດ່ານ ແລະ ນອກດ່ານ. ສະພາບ ການລະເມີດ ກົດໝາຍ ແລະ ລະບຽບ ການພາສີ ໃນປະເທດລາວ ຍັງມີຫລາຍ, ຊຶ່ງສະແດງໃຫ້ເຫັນວ່າ ມີຄະດີ ກ່ຽວກັບ ພາສີ ເກີດຂຶ້ນ ໃນປັຈຈຸບັນ ທັງໝົດ 2,000 ກ່ວາຄະດີ. ນອກຈາກນີ້, ການເກັບຣາຍຮັບ ຈາກພາສີ ທີ່ດິນ ໃນຕລອດແຜນການ ປີ 2011-2012 ກໍບໍ່ສາມາດ ບັນລຸໄດ້ ຕາມເປົ້າໝາຍ. ມາຮອດ ປັຈຈຸບັນ, ບັນລຸ ໄດ້ພຽງແຕ່ 50% ກ່ວາ ຂອງແຜນການປະຈໍາປີ ເທົ່ານັ້ນ, ເຮັດໃຫ້ຊາວລາວ ສູນເສັຍໂອກາດ ໃນການພັທນາ ເສຖກິຈ-ສັງຄົມ ຂອງຊາຕ. ໃນຂະນະດຽວກັນ, ທ່ານ ທອງສິງ ທັມມະວົງ, ນາຍົກ ຣັຖມົນຕຣີ ແຫ່ງສປປລາວ, ໄດ້ໃຫ້ທັສນະ ວ່າ ຂແນງການເງິນ ຍັງມີຫລາຍ ບັນຫາ ສໍາຄັນ ທີ່ຈະຕ້ອງ ເອົາໃຈໃສ່ ແກ້ໄຂ, ເປັນຕົ້ນ ການຂຸດຄົ້ນ ເກັບຣາຍຮັບ ງົປມານ ສ່ວນໃຫຍ່ ແມ່ນ ໄດ້ມາຈາກ ຊັພຍາກອນ ທັມມະຊາຕ ແລະ ການນໍາເຂົ້າ ສິນຄ້າ, ຊຶ່ງເປັນຣາຍຮັບ ທີ່ບໍ່ປົກຕິ. ນອກຈາກນີ້, ການຄຸ້ມຄອງ ຣາຍຈ່າຍ ງົປມານ ແລະ ການປະຕິບັດ ຣະບຽບກົດໝາຍ ການເງິນ ບໍ່ເຂັ້ມງວດ, ກົນໄກ, ຣະບຽບ ການບໍຣິຫານຄຸ້ມຄອງ ແລະ ບໍຣິການ ຍັງບໍ່ສອດຄ່ອງ ກັບ ສະພາບ ໃນລະຍະໃໝ່, ການປະຕິບັດ ໜ້າທີ່ ຄົ້ນຄ້ວາ ນະໂຍບາຍ, ການວິເຄາະ, ວິໃຈ ສະພາບເສຖກິຈ-ການເງິນພາຍໃນ ແລະ ສາກົນ ຍັງບໍ່ໄດ້ດີ ເທົ່າທີ່ຄວນ.
