ບ້ານພັກເຮືອນງາມສ້າງແລ້ວ ຊາວບ້ານລອຍແພ

ການສ້າງບ້ານພັກ ໃນເຂດ ຫາດດອນຈັນ ເພື່ອຮັບຕ້ອນ ຜູ້ນໍາ ຕ່າງປະເທດ ທີ່ເຂົ້າຮ່ວມ ກອງປະຊຸມ ເອເຊັມ ເຮັດໃຫ້ ປະຊາຊົນ ເກືອບ 500 ຄົນ ເໝິດອາຊີພ.

ໜັງສືພິມ Telegraph ຂອງອັງກິດ ແຈ້ງວ່າ ວິລລ່າ 50 ຫລັງ ທີ່ທາງການລາວ ສ້າງຂື້ນ ຢູ່ດອນຈັນ ເພື່ອເປັນທີ່ພັກ ຂອງບັນດາ ຜູ້ນໍາ ຈາກຕ່າງປະເທດ ທີ່ເດີນທາງ
ມາຮ່ວມກອງປະຊຸມ ສຸດຍອດ ເອເຊັຽ-ຢູໂຣບ ໃນວັນທີ່ 5 ພຶສຈິກາ 2012 ນີ້ ແມ່ນສ້າງໃສ່ທີ່ດິນ ບ່ອນທໍາມາຫາກິນ ຂອງ ປະຊາຊົນ ປະມານ 102 ຄອບຄົວ ທີ່ທາງການລາວ ຕ້ອງໄດ້ ໃຫ້ໂຍກຍ້າຍ ໄປຢູ່ບ່ອນໃໝ່ ແລ້ວໃຫ້ຄ່າ ຕອບແທນ ແກ່ເຂົາເຈົ້າ ແບບບໍ່ເໝາະສົມ.

ຊາວສວນ ໃນຫາດດອນຈັນ ແຕ່ກ່ອນມີຣາຍໄດ້ ຈາກການປູກເຂົ້າ ແລະ ປູກຜັກຂາຍ ແຕ່ຫລັງຈາກ ຍ້າຍໄປຢູ່ ນອກເມືອງແລ້ວ ເຂົາເຈົ້າ ບໍ່ມີດິນປູກຝັງ ຄືເກົ່າ ແລະ ການລ້ຽງຊີພ ກໍຫຍູ້ງຍາກ ລໍາບາກຂື້ນ. ຊາວສວນຄົນນື່ງ ທີ່ຖືກໂຍກຍ້າຍ ເວົ້າວ່າ ດຽວນີ້ ເລົາບໍ່ສາມາດ ປູກເຂົ້າ ແລະ ພືດຜັກໄດ້ອີກແລ້ວ ເລົາວ່າ ບໍ່ຮູ້ວ່າຊີ່ ຫາລ້ຽງຊີພ ແບບໃດ ເພາະດິນທີ່ລາວ ເຄີຽມີ ຖືກຣັດເອົາໄປແລ້ວ.

ການຍຶດທີ່ດິນ ປະຊາຊົນ ເພື່ອໂຄງການພັທນາ ເປັນບັນຫາທີ່ ສ້າງຄວາມເດືອດຮ້ອນ ໃຫ້ຊາວລາວ ໃນປັດຈຸບັນ. ປະຊາຊົນ ສູນເສັຽ ທີ່ດິນໄດ້ກາຍເປັນ ຄົນບໍ່ມີຣາຍໄດ້ ຄອບຄົວ ຂາດສມັຕພາບ ລູກເຕົ້າບໍ່ມີ ອະນາຄົດ ແຕ່ສໍາລັບ ເຈົ້າໜ້າທີ່ລາວ ທີ່ຮັບຜິດຊອບ ໂຄງການແລ້ວ ປະຊາຊົນ ເຫັນວ່າ ພວກເພິ່ນ ມີຣາຍໄດ້ເຂົ້າຖົງ ຢ່າງງາມໆ.

ທີ່ດິນຢູ່ໃນເຂດ ດອນຈັນຕອນນີ້ ຣັຖບານລາວ ໄດ້ມອບໃຫ້ ບໍຣິສັດພັທນາ ເຄຫາສະຖານ ຂອງຈີນ ທີ່ລົງທຶນຮ່ວມກັບ ນັກທຸຣະກິດ ໃນລາວ ສັມປະທານ ເປັນເວລາ 50 ປີ ແລະ ສາມາດຕໍ໋ໄດ້ ອີກ 40 ປີ.

ຫລັງຈາກ ກອງປະຊຸມ ອາເຊັມ ສິ້ນສຸດລົງ ຄຸ້ມບ້ານພັກ ເຫລົ່ານັ້ນ ກໍຈະຖືກ ປະກາດຂາຍ ໃຫ້ແກ່ນັກ ທຸຣະກິດ ສໍາລັບຣັຖບານ ເພິ່ນກໍເວົ້າໄດ້ ຢ່າງເຕັມປາກວ່າ ມັນເປັນກຽດ ອັນສູງສົ່ງ ທີ່ຣັຖບານລາວ ສາມາດ ຮັບຕ້ອນ ບັນດາຜູ້ນໍາ ຂອງໂລກໄດ້.