ຄວາມບໍ່ເຂົ້າໃຈ ເຣື້ອງການຊື້ ໂຄຕາໄມ້ ເກີດບັນຫາ ຟ້ອງຂຶ້ນສານ ຢ່າງຫລວງຫລາຍ ຣະຫວ່າງ ນັກລົງທຶນ ຕ່າງຊາດ ກັບ ກຸ່ມນາຍໜ້າ ຢູ່ລາວ.
ເຣື້ອງຄວາມບໍ່ເຂົ້າໃຈ ໃນການຊື້ໂກຕາໄມ້ ຣະຫວ່າງ ຜູ້ລົງທຶນ ຕ່າງຊາຕ ກັບ ກຸ່ມນາຍໜ້າ ຢູ່ລາວ ກໍ່ໃຫ້ເກີດບັນຫາ ຟ້ອງຂຶ້ນສານ ເນື່ອງຈາກວ່າ ການອອກໂຄຕາໄມ້ ບໍ່ໄດ້ຮວມຣາຄາໄມ້ ໃນສນາມ, ຊຶ່ງຜູ້ທີ່ມີໂຄຕາໄມ້ແລ້ວ ແມ່ນໄດ້ຮັບອະນຸຍາດ ໃນການຕັດມໄມ້ ແຕ່ຕ້ອງໄດ້ຈ່າຍ ຄ່າຈໍານວນໄມ້ ທີ່ຈະຕັດ ໃນພາກສນາມຕື່ມ. ແຕ່ວ່າ ນັກລົງທຶນ ທີ່ຊື້ໂຄຕາ ຕໍ່ຈາກກຸ່ມນາຍໜ້າ ຢູ່ລາວ ບໍ່ເຂົ້າໃຈ ເຣື້ອງການຊື້ຂາຍ ດັ່ງກ່າວ. ເຈົ້າໜ້າທີ່ ອົງການ ໄອຍະການ ປະຊາຊົນສູງສຸດ ເປີດເຜີຍ ເຣື້ອງດັ່ງກ່າວ ໃນວັນທີ 19 ພຶສຈິກາ ນີ້ວ່າ:
”ເຣື້ອງຜົລປໂຍດ ເຣື້ອງຊື້-ຂາຍ ໂຄຕາ ກະດາດ ມັນເປັນໂຄຕາ ອະນຸມັດ ໄດ້ແຕ່ໃບອະນຸຍາດ ແຕ່ວ່າ ບໍ່ໄດ້ຕົວໄມ້, ຕົວໄມ້ ທີ່ຈະຕ້ອງ ໄປດໍາເນີນການຕັດ ຈະຕ້ອງ ໄດ້ຈ່າຍຄ່າສິດ ຄືໄດ້ສິດ ໄດ້ໂຄຕານັ້ນ ແຕ່ວ່າ ບໍ່ໄດ້ ຄ່າຣາຄາ ໄມ້ ກໍຕ້ອງ ຊື້ ຕ່າງຫາກ. ຕ້ອງເບິ່ງວ່າ ອັນນີ້ ຄືຊື້ໂກຕາ ຕ້ອງເຂົ້າໃຈວ່າ ຊື້ໂຄຕາ ບໍ່ໄດ້ຊື້ໄມ້ ແບບນັ້ນ ມັນຈະເສັຍຫົວ.”
ຍານາງ ກ່າວຕື່ມວ່າ ທຸກມື້ນີ້ ມີບໍຣິສັດ ຕ່າງຊາຕ ຊື້ໂຄຕາໄມ້ ຈາກກຸ່ມນາຍໜ້າ ຢູ່ລາວ, ແຕ່ກໍເກີດບັນຫາ ເຣື້ອງດັ່ງກ່າວ ຂຶ້ນຫລາຍ ເນື່ອງຈາກວ່າ ຄວາມບໍ່ເຂົ້າໃຈ ໃນເຣື້ອງສັນຍາ ແລະ ກຸ່ມນາຍໜ້າເອງ ກໍບໍ່ໄດ້ ບອກຣາຍລະອຽດ ກັບຜູ້ທີ່ຊື້, ດັ່ງນັ້ນ ຈຶ່ງກາຍເປັນບັນຫາ ທີ່ຟ້ອງຮ້ອງກັນ ຫລາຍຂຶ້ນ. ແຕ່ເຣື້ອງດັ່ງກ່າວນີ້ ກໍບໍ່ສາມາດ ແກ້ໄຂຫຍັງໄດ້ ເນື່ອງຈາກວ່າ ນັກລົງທຶນ ມີພຽງແຕ່ ໃບໂຄຕ້າ ແຕ່ບໍ່ໄດ້ຈ່າຍຄ່າໄມ້ ໃນສນາມ.
ຍານາງ ກ່າວໃນຕອນທ້າຍ ວ່າ ສັນຍາ ການຊື້-ຂາຍໄມ້ ຈະຕ້ອງລະມັດລະວັງເປັນພິເສດ ເນື່ອງຈາກວ່າ ສັນຍາ ການຊື້-ຂາຍໄມ້ ນັ້ນ ໄດ້ແບ່ງເປັນປະເພດຕ່າງໆ ຍ່ອຍອອກໄປ, ຈຶ່ງເປັນເຣື້ອງງ່າຍ ທີ່ຈະເກີດການໂກງກັນ ເກີດຂຶ້ນໄດ້. ດັ່ງນັ້ນ ນັກທຸຣະກິຈ ທີ່ຊື້-ຂາຍ ໃນທຸກປະເພດ ຕ້ອງສຶກສາ ຢ່າງລະອຽດ ຫລື ປຶກສາ ຜູ້ທີ່ຊ່ຽວຊານເສັຍກ່ອນ ທີ່ຈະເຮັດສັນຍາ ຊື້-ຂາຍ ໃດໆ.
