ທາງການລາວໃຊ້ ມາຕການເດັດຂາດ

ທາງການລາວ ຍຶດ ອະນຸຍາດ ສຳປະທານ ຄືນຈາກ ບໍຣິສັດ ຂຸດຄົ້ນ ແຮ່ທາດ ຫລາຍ ບໍຣິສັດ ຍ້ອນ ບໍ່ປະຕິບັດ ຕາມສັນຍາ ປົກປ້ອງ ສິ່ງແວດລ້ອມ

ທາງການ ຜແນກບໍ່ແຮ່ ແຂວງວຽງຈັນ ເປີດເຜີຍ ໃນວັນທີ 20 ພຶສຈິກາ ວ່າ ການຍຸຕິ ໃຫ້ສຳປະທານ ຂຸດຄົ້ນແຮ່ທາດ ຊົ່ວຄາວ ຕາມດຳຣັດ ນາຍົກ ຣັຖມົນຕຣີ ໃນມໍ່ໆມານີ້ ຍ້ອນວ່າ ກົມບໍ່ແຮ່ ແລະ ຫນ່ວຍງານປົກປ້ອງ ສິ່ງແວດລ້ອມ ໄດ້ພົບເຫັນວ່າ ບໍຣິສັດ ຂຸດຄົ້ນແຮ່ທາດ ຫລາຍ ບໍຣິສັດ ຫລົ້ມແຫລວ ຕໍ່ການຄວບຄຸມ ສາຣພິດ ທາງການລາວ ຈື່ງໄດ້ຍົກເລີກ ສັນຍາ ສຳປະທານ ກັບຫລາຍ ບໍຣິສັດ. ດັ່ງເຈົ້າຫນ້າທີ່ ບໍ່ແຮ່ ເວົ້າວ່າ:

"ເວົ້າເຣື້ອງການ ຫລົ້ມແຫລວ ຂອງການຄຸ້ມຄອງ ສາຣພິດ ແລະ ສາຣເຄມີ ແລະ ຜິດຣະບຽບ ສິ່ງແວດລ້ອມ ຜ່ານມາ ເຮົາ ກໍທຳການ ຍົກເລີກ ຫລາຍໂຄງການ ທີ່ຜິດ ຣະບຽບ ຕໍ່ສິ່ງແວດລ້ອມ ແລະ ສ່ວນນຶ່ງ ກໍຕັ້ງໂຮງງານ ແລ້ວ ກໍທຳສັນຍາ ແລ້ວ ແລະເຮົາ ກໍເລີຍທຳ ການຍົກເລີກ".

ທ່ານກ່າວ ຕໍ່ໄປວ່າ ຈາກການກວດ ພື້ນທີ່ ແລະ ໄດ້ພົບເຫັນ ບັນຫາ ດັ່ງທີ່ ກ່າວມານັ້ນ ບັນດາເຈົ້າຂອງ ບໍຣິສັດ ກໍໄດ້ແກ້ໂຕ ໂດຍອ້າງເຫດຜົນ ຕ່າງໆນາໆ ເຊັ່ນ ການຮົ່ວໄຫລ ຂອງສາຣພິດ ກໍວ່າເປັນຍ້ອນ ການປ່ຽນແປງ ຂອງ ທັມມະຊາດ ບໍ່ແມ່ນ ຄວາມຜິດຂອງ ບໍຣິສັດ ແຕ່ຢ່າງໃດ ແລະ ຂໍແກ້ໄຂບັນຫາ ທີ່ເກີດຂຶ້ນ ແຕ່ໃນເມື່ອ ທາງການ ໄດ້ໃຫ້ໂອກາດ ອີກເທື່ອນຶ່ງ ແລະ ພວກບໍຣິສັດ ເຫລົ່ານັ້ນ ກໍບໍ່ໄດ້ ປະຕິບັດ ຕາມສັນຍາ ຕາມກົດເກນ ທີ່ວາງໄວ້ ຢູ່ຄືເກົ່າ ຈຶ່ງເຮັດໃຫ້ ຣັຖບານ ຕ້ອງຍົກເລີກ ສັນຍາ.

ເຈົ້າຫນ້າທີ່ ກ່າວເພີ້ມວ່າ ແຂວງ ທີ່ກວດພົບເຫັນ ຫລາຍກວ່າຫມູ່ ແມ່ນຢູ່ແຂວງ ວຽງຈັນ ເຖິງແມ່ນວ່າ ທາງການໄດ້ ສັ່ງໃຫ້ຢຸດ ໂຮງງານຂຸດຄົ້ນ ບາງບ່ອນ ແລ້ວກໍຕາມ ແຕ່ກໍມີຫລາຍ ໂຮງງານ ຍັງທໍາການ ຂຸດຄົ້ນຢູ່ ເປັນຕົ້ນ ບໍ່ເມືອງພູຄຳ ເມືອງ ໄຊສົມບູນ ທີ່ປ່ອຍ ສາຣໄຊໄນ ລົງສູ່ ແມ່ນ້ຳ ລຳທານ.