ມີຄົນຊາວເມືອງ ຊານໄຊ ແຂວງ ອັດຕະປື ຜູ້ທີ່ຂໍສງວນຊື່ ທ່ານນື່ງ ໄດ້ໂທຣະສັບ ຫາວິທຍຸ ເອເຊັຽເສຣີ ໃນວັນທີ 22 ພຶສຈິກາ ນີ້ວ່າ ໃນຊ່ວງກາງຄືນ ຂອງມື້ວັນຈັນ ວັນທີ 19 ພຶສຈິກາ ຢູ່ເຮືອນຄົນງານ ປູກຢາງພາລາ ຂອງຊາວຈີນ ທີ່ຢູ່ບໍ່ໄກຈາກ ໂຕເມືອງ ຖືກຣະເບີດ ແກວ່ງໃສ່ ໂດຍຄົນຮ້າຍ ທີ່ລຶກລັບ ບໍ່ຮູ້ຈຳນວນ ເຮັດໃຫ້ຄົນງານ ຊາວຈີນ ເສັຽຊິວິີດ 1 ຄົນ ແລະ ໄດ້ຮັບບາດ ເຈັບ 2 ຄົນ.
ນອກຈາກນັ້ນ ຊາວອັດຕະປື ທ່ານນີ້ ຍັງໄດ້ກ່າວ ຕໍ່ເອເຊັຽເສຣີວ່າ ໃນຊ່ວງວັນທີ 5 ເດືອນພຶສຈິກາ ຜ່ານມາ ຊາວບ້ານ ຫລາຍສິບຄົນ ໄດ້ພາກັນ ໄປຊຸມນຸມ ຕໍ່ຫນ້າ ຫ້ອງການແຂວງ ອັດຕະປື ສາຣະວັນ ແລະ ເຊກອງ ເພື່ອຂໍຄວາມ ກະຈ່າງແຈ້ງ ຈາກອຳນາດ ການປົກຄອງ ທ້ອງຖິ່ນ ກ່ຽວກັບການ ສຳປະທານ ທີ່ດີນແກ່ ນັກລົງທຶນ ຕ່າງຊາດ ທີ່ໄປກວມເອົາ ດິນຊາວບ້ານນັ້ນ ທາງການແຂວງ ຈະແກ້ໄຂ ຢ່າງໃດ. ກຸ່ມດ່ັງກ່າວ ຖືກກັກຂັງຊົ່ວຄາວ ແລະ ກໍຖືກປ່ອຍໂຕ ໃນເວລາຕໍ່ມາ ແຕ່ຫົວຫນ້າ ແກນນຳ ຫລາຍຄົນ ຍັງຖືກ ກັກຂັງຢູ່. ກ່ຽວກັບ ເຣື້ອງດັ່ງກ່າວ ຜູ້ສື່ຂ່າວຂອງເຮົາ ກໍໄດ້ ໂທລະສັບ ໄປຫາ ເຈົ້າຫນ້າທີ່ ກ່ຽວຂ້ອງ ທີ່ ແຂວງສາຣະວັນ ທ່ານນື່ງ ກໍໄດ້ຄຳຕອບວ່າ:່
"ໃນເດືອນພະຈິ ຖືວ່າບໍ່ມີບັນຫາ ທີ່ທ່ານເວົ້າ ບັນຫາ ທີນື່ງບໍ່ມີ".
ນອກຈາກນັ້ນ ເຈົ້າຫນ້າທີ່ ທ່ານນີ້ ຍັງໄດ້ຕິດຕໍ່ ໄປຍັງອຳນາດ ການປົກຄອງ ທີ່ແຂວງ ອັດຕະປື ເພື່ອສອບຖາມ ກ່ຽວກັບ ເຣື້ອງນີ້ ກໍໄດ້ຄຳຕອບ ແບບດຽວກັນ ວ່າ:
"ບໍ່ມີກຳລັງ ໂທລະສັບ ໄປຫາຫົວຫນ້າຫ້ອງ ວ່າການທີ່ ແຂວງ ອັດຕະປື ເຫດການ ດັ່ງກ່າວ ດັ່ງທີ່ທ່ານ ເວົ້າມານັ້ນ ຖືວ່າບໍ່ມີ ໃນແຂວງ ອັດຕະປື".
ທີ່ຜ່ານມາ ການ ອະນຸຍາດ ໃຫ້ສຳປະທານ ແກ່ ບໍຣິສັດ ຕ່າງຊາດ ເພື່ອປູກຕົ້ນໄມ້ ເສຖກິດ ຂຸດຄົ້ນ ແຮ່ທາດ ແລະ ການພັທນາ ປະເພດຕ່າງໆນັ້ນ ໄດ້ກວມເອົາ ທີ່ດິນຊາວບ້ານ ໃນຫລາຍພື້ນທີ່ ການໃຫ້ ຄ່າຊົດເຊີຍ ກໍບໍ່ກະຈ່າງແຈ້ງ ບາງແຫ່ງ ກໍບໍ່ໄດ້ເລີຍ ເຮັດໃຫ້ເກີດ ບັນຫາ ໃນຫລາຍ ທ້ອງຖິ່ນ ແຕ່ກໍບໍ່ເປັນຂ່າວ ເພາະທາງການລາວ ຄວບຄຸມ ແລະ ປິດງຽບ.
