ເຈົ້າໜ້າທີ່ ອົງການ ຕ່າງປະເທດ ໃນນະຄອນຫລວງ ວຽງຈັນ ຄົນນື່ງ ບອກວ່າ ມັນເປັນໄປໄດ້ ທີ່ວ່າ ມີການສໍ້ຣາສ ບັງຫລວງ ຣະຫ່ວາງ ຜູ້ ບໍຣິຫານ ກັບເຈົ້າໜ້າທີ່ ໂຄງການ ຂອງຣັຖ ເນື່ອງຈາກວ່າ ຜ່ານມາ ເງິນຊ່ວຍເຫລືອ ຈາກ ຕ່າງປະເທດ ໃນບາງໂຄງການ ຫາຍໄປຢ່າງ ບໍ່ມີຫລັກຖານ ໃນບັນຊີ ແລະ ບໍ່ສາມາດ ບົ່ງໂຕ ຜູ້ເຮັດຜິດໄດ້. ດັ່ງຍານາງໄດ້ ອະທິບາຍ:
"ການຄໍຣັບຊັນ ຈະເກີດຂື້ນໂດຍ ຄົນພາຍໃນ ເຂົາເອງ ການບໍຣິຫານ ໂຄງການ ມັນກໍຈະຂື້ນ ກັບຣັຖບານ ສ່ວນອົງການ ຕ່າງປະເທດ ເປັນຜູ້ໃຫ້ການ ຊ່ວຍເຫລືອ assistant ການຄໍຣັບຊັນ ມັນກໍຈະເກີດ ມີແນ່ນອນ ປະມານວ່າ ທິມບໍຣິຫານ ກັນນັ້ນ ເຂົາຕ້ອງຮ່ວມຫົວກັນ ແມ່ນບໍ່ ຖ້າຜູ້ໃຫ່ຽ ບໍ່ເຫັນດີຫລືວ່າ ບໍ່ມີຜູ້ສົມຮູ້ ຮ່ວມຄິດນໍາ ເຣື້ອງມັນກໍບໍ່ເກີດໄດ້ ແມ່ນບໍລະ".
ນາງ ອະທິບາຍ ວ່າ ສ່ວນຫລາຍ ໂຄງການຊ່ວຍເຫລືອ ຂອງຕ່າງປະເທດ ທີ່ເຂົ້າມານັ້ນ ຣັຖບານ ຈະເປັນຜູ້ ພິຈາຣະນາ ແລະ ສົ່ງມອບໃຫ້ ກະຊວງໃດ ກະຊວງນື່ງເພື່ອບໍຣິຫານ ເງິນທຶນນັ້ນ ຮ່ວມກັນ ກັບຝ່າຍບໍຣິຫານ ຂອງອົງການ ຕ່າງປະເທດ ຢູ່ລາວ. ຫລາຍຄັ້ງມີ ການໃຊ້ເງິນ ຊ່ວຍເຫລືອ ໄປໃນທາງທີ່ຜິດ ຫລັງຈາກ ພົບເຫັນໂຕເລກ ໃນບັນຊີ ກັບເງິນທີ່ເຫລືອ ຢູ່ບໍ່ສອດຄ່ອງກັນ ຈື່ງໄດ້ຮຽກ ຜູ້ບໍຣິຫານ ໂຄງການ ມາສອບຖາມ:
"ບາງໂຄງການ ຕ້ອງໄດ້ໃຫ້ ຜູ້ບໍຣິຫານ ເຂົ້າມາຫລາຍເທື່ອ ເພື່ອມາກວດ ເປັນຫຍັງເງິນ ຈື່ງເສັຽ ຊື່ງອາດຈະເປັນ ທິມເກົ່າ ທີ່ເຂົາທີ່ເຂົາເຈົ້າ ບໍຣິຫານ ມາແລ້ວ ກໍໄດ້ຍ້າຍ ໄປບ່ອນໄໝ່ ເຂົາເຈົ້າ ຄໍຣັບຊັນ ໄປກ່ອນແລ້ວ. ທີ່ນີ້ທິມໃໝ່ ມາກໍບໍ່ຮູ້ ອີ່ຫຍັງ ທາງເບື້ອງ ຣັຖບານ ບໍ່ຮູ້ວ່າເພິ່ນ ກິນນໍາຫລືບໍ່ ເພິ່ນກໍຂໍຮ້ອງ support ໂຄງການນີ້ ຕໍ່ໄປຈົນຈົບ. ສ່ວນເງິນ ຄໍຣັບຊັນ ທີ່ຫາຍໄປ ກໍສ້າງເປັນ ກິຈກັມ ຂີ້ຕົວະຂື້ນມາ".
ຍານາງ ໄດ້ກ່າວຕໍ່ວ່າ ໃນເມື່ອຣັຖບານ ລາວອາໄສ ການຊ່ວຍເຫລືອ ຈາກຕ່າງປະເທດ ແຕ່ລະປີມັນ ກໍມີເງິນຫລັ່ງໄຫລ ເຂົ້າມາ. ມັນມີຄວາມ ເປັນໄປໄດ້ສູງ ທີ່ເງິນ ຊ່ວຍເຫລືອ ທັງໝົດ ບໍ່ຖືກນໍາໃຊ້ ໃນໂຄງການ ແຕ່ແຍກໄປໃຊ້ ເປັນຂອງ ສ່ວນໂຕ ແລ້ວມັນກໍມີ ຜົນກະທົບ ຕໍ່ການຊ່ວຍ ເຫລືອ ຕໍ່ໄປ.
