ນາໆຊາຕ ກໍານົດເງື່ອນໄຂ ເຂັ້ມງວດຫລາຍຂຶ້ນ ກ່ຽວກັບ ການໃຫ້ເງິນຊ່ອຍເຫລືອລ້າ ແກ່ຣັຖບານລາວ
ການຊ່ອຍເຫລືອລ້າ ທີ່ຣັຖບານລາວ ຄາດຫວັງວ່າ ຈະໄດ້ຮັບຈາກຕ່າງປະເທດຫລາຍຂຶ້ນ ໃນຂັ້ນຕໍ່ໄປນີ້ ຈະຕ້ອງ ປະສົບກັບ ຄວາມຫຍຸ້ງຍາກ ຫລາຍຂຶ້ນ ເພາະວ່າ ບັນດາ ຄູ່ຮ່ວມພັທນາ ຂອງຣັຖບານລາວ ຈາກ 42 ອົງການຈັດຕັ້ງສາກົນ ແລະ 35 ປະເທດນັ້ນ ໄດ້ຮ່ວມກັນ ກໍານົດເງື່ອນໄຂ ທີ່ເຂັ້ມງວດ ຫລາຍຂຶ້ນ.
ການປະຕິບັດ ດັ່ງກ່າວ ພາຍໃຕ້ເປົ້າໝາຍ ການຄວບຄຸມ ການໃຊ້ຈ່າຍ ງົປມານ ຂອງຣັຖບານລາວ ເພື່ອໃຫ້ມີປະສິດທິພາບ ຢ່າງແທ້ຈິງ, ໂດຍສະເພາະ ແມ່ນງົປມານ ທີ່ຈະໃຫ້ການຊ່ອຍເຫລືອ ເພື່ອການພັທນາ ໂຄງລ່າງພື້ນຖານ ຕ່າງໆນັ້ນ, ບັນດາ ຄູ່ຮ່ວມພັທນາ ຂອງຣັຖບານລາວ ກໍໄດ້ກໍານົດເງື່ອນໄຂ ຢ່າງເຂັ້ມງວດ ນັບຕັ້ງແຕ່ ການສຶກສາ, ການອອກແບບ, ການປະເມີນຣາຄາ, ການປະມູນ ເພື່ອຄັດເລືອກ ຜູ້ຮັບເໝົາກໍ່ສ້າງ ຢ່າງໂປ່ງໃສ, ການນໍາໃຊ້ ວັດຖຸ ອຸປກອນຕ່າງໆ ທີ່ໄດ້ມາຕຖານ, ການຄວບຄຸມວຽກງານ ກໍ່ສ້າງ ແລະ ການກວດຮັບໂຄງການ ທີ່ຈະຕ້ອງ ເປັນການປະສານງານກັນ ຢ່າງໃກ້ຊິດ ຣະຫວ່າງ ເຈົ້າໜ້າທີ່ ຂອງຣັຖບານລາວ ກັບຜູ້ຕາງໜ້່າ ຂອງອົງການ ສາກົນ ທີ່ໃຫ້ການຊ່ອຍເຫລືອ ດັ່ງກ່າວ.
ເງື່ອນໄຂ ທີ່ເຂັ້ມງວດ ກ່ວາເກົ່ານີ້ ເຮັດໃຫ້ນາໆຊາຕ ທີ່ເປັນເຈົ້າຂອງ ງົປມານ ມີວາມເຊື່ອໝັ້ນວ່າ ໂຄງການພັທນາຕ່າງໆ ໃນຂັ້ນຕໍ່ໄປ ຈະສົ່ງຜົລປໂຍດ ຕໍ່ປະຊາຊົນລາວ ບັນດາເຜົ່າ ໄດ້ຢ່າງທົ່ວເຖິງ ແລະ ແທ້ຈິງ. ໃນຂະນະດຽວກັນ, ຍັງຈະເປັນການປ້ອງກັນ ການສໍ້ລາສບັງຫລວງ ໃນວົງການ ຣັຖບານລາວ ໄດ້ຢ່າງມີປະສິດທິພາບ ນໍາອີກດ້ວຍ.
ສໍາລັບ ແຜນການປະຈໍາປີ 2012-2013 ນີ້, ຣັຖບານລາວ ຕ້ອງການ ທີ່ຈະໄດ້ ຮັບການຊ່ອຍເຫລືອ ຈາກຕ່າງປະເທດ ຄິດໄລ່ເປັນມູນຄ່າ ບໍ່ຕໍ່າກ່ວາ 790 ລ້ານດອນລາ ສະຫະຣັຖ. ສ່ວນໃນລະຍະ ຂອງແຜນການ ປະຈໍາປີ 2011-2012 ທີ່ສິ້ນສຸດ ລົງໃນທ້າຍເດືອນກັນຍາ ທີ່ຜ່ານມານັ້ນ,ຣັຖບານລາວ ກໍໄດ້ ຮັບການຊ່ອຍເຫລືອ ຈາກຕ່າງປະເທດ ຄິດເປັນມູນຄ່າຮວມ ປະມານ 700 ລ້ານ ກ່ວາດອນລາ ສະຫະຣັຖ.
