ຄວາມຂັດແຍ່ງ ເຣື່ອງທີ່ດິນ ຣະຫວ່າງ ຊາວບ້ານ ກັບ ນັກລົງທຶນ ປູກຢາງພາຣາ ເມືອງທ່າແຕງ ແຂວງເຊກອງ ເຮັດໃຫ້ ຊາວບ້ານ ຜິດຖຽງ ແຕກແຍກ ກັນເອງ
ແຫລ່ງຂ່າວ ຈາກ ປະຊາຊົນ ຜູ້ທີ່ບໍ່ປະສົງ ອອກຊື່ ທ່ານນື່ງ ເວົ້າວ່າ ບັນຫາ ຄວາມຂັດແຍ່ງ ທາງດ້ານທີ່ດີນ ທີ່ເມືອງທ່າແຕງ ແຂວງ ເຊກອງ ເຮັດໃຫ້ ຊາວບ້ານ ຜິດຖຽງ ກັນເອງ ຍ້ອນວ່າ ກຸ່ມນື່ງຕ້ອງການ ຍຸຕິ ຄວາມຂັດແຍ່ງ ກັບ ຣັຖບານ ເພາະຢ້ານອຳນາດ ພັກຣັຖ ແລະ ອີກກຸ່ມນື່ງ ຕ້ອງການ ສູ້ຕໍ່ໄປ ເພື່ອຄວາມ ຍຸຕິທັມ ໃນການ ຮຽກຮ້ອງ ສິດທິ ຂອງ ປະຊາຊົນ. ດັ່ງທ່ານກ່າວ ໃນຕອນນື່ງວ່າ:
"ປັດຈຸບັນ ມັນກໍມີຫລາຍ ເຫດການ ຕາມມາຢູ່ ຫັ້ນແຫລະ ກໍມີຄວາມ ແຕກແຍກ ພາຍໃນຫມູ່ບ້ານ ເພາະວ່າ ບາງກຸ່ມຄົນ ເຂົາກໍຢ້ານ ອຳນາດຂອງຣັຖ ບາງກຸ່ມເຂົາ ກໍມີອຸດົມການ ຕໍ່ສູ້ຕໍ່ໄປ ເກີດການແບ່ງແຍກ ກັນຫມົດ".
ທ່ານກ່າວ ຕໍ່ໄປວ່າ ປັດຈຸບັນ ຊາວບ້ານ ແບ່ງອອກເປັນ 2 ກຸ່ມ ຄືກຸ່ມນື່ງ ບໍ່ຢາກຮັບ ເອົາການຊ່ອຍເຫລືອ ຈາກຣັຖບານ ຍ້ອນວ່າ ການຊ່ອຍເຫລືອ ດັ່ງກ່າວ ບໍ່ສົມເຫດ ສົມຜົລ ທີ່ຊາວບ້ານ ຕ້ອງການ ຂະນະທີ່ ອີກກຸ່ມນື່ງ ເຫັນວ່າຄວນຮັບ ເອົາການ ຊ່ອຍເຫລືອ ຈາກຣັຖບານ ເພື່ອໃຫ້ຢຸດ ບັນຫາ ຄວາມຂັດແຍ່ງ ກັບຣັຖບານ ທັງສອງຝ່າຍ ມີຄວາມເຫັນ ບໍ່ກົງກັນ.
ຄົນລາວ ທ່ານນັ້ນກ່າວ ຕື່ມວ່າ ຄວາມຕ້ອງການ ຂອງຊາວບ້ານ ທີ່ແທ້ຈີງນັ້ນ ພວກຂະເຈົ້າ ຕ້ອງການທີ່ດີນ ສຳລັບ ທຳມາຫາກີນ ຖ້າຣັຖບານ ຈະຊ່ອຍຫາ ດີນໃຫມ່ໃຫ້ ແຕ່ທີ່ຜ່ານມາ ຣັຖບານ ແກ້ໄຂບັນຫາ ບໍ່ຕົງຈຸດ ມີແຕ່ໃຫ້ ຄ່າຊົດເຊີຍ ແລ້ວໃຫ້ເຂົາ ໂຍກຍ້່າຍ ຊື່ງທີ່ດີນ ທີ່ເຂົາໂຍກຍ້າຍ ໄປຢູ່ນັ້ນ ບາງແຫ່ງ ກໍປູກຝັງບໍ່ໄດ້.
ໃນປັດຈຸບັນ ເຂດບ້ານຍຶບ ເມືອງທ່າແຕງ ບ່ອນທີ່ເກີດ ບັນຫານັ້ນ ກໍອ້ອມຮອບໄປດ້ວຍ ສວນຢາງພາລາ ຂອງວຽດນາມ ຊື່ງຫລາຍແຫ່ງ ກໍກວມເອົາດີນ ຊາວບ້ານ ເຮັດໃຫ້ຊາວບ້ານ ຂາດພື້ນທີ່ ທຳມາຫາກີນ ຈຶ່ງມີການ ຮຽກຮ້ອງ ເກີດຂື້ນ ແລະ ຫລາຍຄົນ ກໍຖືກຈັບກຸມ ໃນເດືອນ ມີຖຸນາ ຜ່ານມາ.
