ທາງການລາວກວດກາເຣື້ອງ ຄົນຕ່າງດ້າວຊື້ທີ່ດິນ

ໃນທຸກມື້ນີ້ ມີຊາວຈີນ ເກົາຫລີ ວຽດນາມ ຊື້ທີ່ດິນ ໂດຍໃຊ້ຊື່ ຄົນລາວ ເປັນເຈົ້າຂອງ ມີຫລາຍຂຶ້ນ ນໍາເລື້ອຍໆ

ໃນກໍຣະນີ ການຊື້ທີ່ດິນ ຂອງຊາວຕ່າງດ້າວ ໃນຮູບແບບນີ້ ຫາກກວດພົບວ່າ ຜູ້ທີ່ຊື້ ບໍ່ມີການ ກ່ຽວດອງ ກັບຄົນລາວ ກໍເປັນເຣື້ຶອງ ທີ່ຜິດກົດໝາຍ ແລະຕ້ອງຖືກ ດໍາເນີນຄະດີ. ຕາມຄໍາເວົ້າ ຂອງເຈົ້າໜ້າທີ່ ກົມທີ່ດິນ ນະຄອນຫລວງ ວຽງຈັນ:

"ຄວາມຈິງແລ້ວ ເຮົາຕ້ອງໄດ້ ສຶກສາລະອຽດ ທີ່ວ່າເຂົາເຈົ້າ ຊື້ຄົນລາວມັນ ແມ່ນເມັຽ ລູກເມັຽ ຂອງຂະເຈົ້າບໍ່ ສ່ວນຫລາຍນີ້ ຄົນຕ່າງປະເທດ ກໍມາ ແຕ່ງງານກັບ ຄົນລາວຫລາຍ ເຮົາຕ້ອງໄດ້ ສຶກສາຈຸດນີ້ ວ່າຜູ້ໄປຊື້ ທີ່ດິນ ອອກຊື່ຄົນລາວ ນີ້ມັນແມ່ນຄອບຄົວ ຂອງຂະເຈົ້າບໍ່ ຄັນວ່າເປັນ ຄອບຄົວແທ້ໆ ຂະເຈົ້າ ມີສິດຊື້ໄດ້".

ນາງກ່າວ ຕໍ່ໄປວ່າ ທຸກມື້ນີ້ ມີຄົນ ຕ່າງປະເທດ ເຂົ້າມາແຕ່ງງານ ກັບຄົນລາວຫລາຍ ດັ່ງນັ້ນ ຈຶ່ງຕ້ອງກວດກາ ໃຫ້ຣະອຽດ ເພາະຄົນ ຕ່າງປະເທດ ບໍ່ມີສິດ ຊື້ທີ່ດິນ ໃນລາວ. ໃນກໍຣະນີ ຄົນລາວ ເປັນນາຍໜ້າ ຊື້ທີ່ດິນ ໃຫ້ຄົນ ຕ່າງປະເທດ ເພື່ອໄວ້ຂາຍ ເອົາກໍາໄຣ ກໍຖືວ່າ ຜິດກົດໝາຍ ຫາກຈັບໄດ້ ຈະຕ້ອງຖືກ ສົ່ງຟ້ອງສານ:

"ຕົວນີ້ໜີ້ແທ້ ປາກົດວ່າມີ ເພາະວ່າຕົວນີ້ ຂະເຈົ້າ ກໍສິບໍ່ກ້າສ່ຽງ ປານໃດ ເພາະວ່າ ຕ່າງປະເທດນີ່ ກໍບໍ່ກ້າສ່ຽງດອກ ເພາະວ່າຂະເຈົ້າ ຊີ່ເອົາທຶນ ມະຫາສານ ມາແລ້ວ ອອກຊື່ຄົນລາວ ນີ້ ແຕ່ວ່າມັນ ກໍເວົ້າບໍ່ໄດ້ ຖ້າຂະເຈົ້າ ໄວ້ເນື້ອເຊື່ອໃຈກັນ ເພາະວ່າ ມັນບໍ່ມີ ກົດໝາຍ ຄໍ້າປະກັນ ໃຫ້ຕົວນີ້ ຖ້າວ່າເຈົ້າ ມາອອກຊື່ ຄົນລາວ ຊື້ໃຫ້ ແຕ່ວ່າ ສົມມຸດວ່າ ມັນມີການ ຫັກຫລັງກັນ ຢ່າງໃດຢ່າງນຶ່ງ ພວກເຮົາ ຈະບໍ່ຮັບ ປະກັນໃຫ້ ຕົວນີ້".

ບັນຫາການໃຊ້ ຊື່ຄົນລາວ ເພື່ອຊື້ທີ່ດິນ ເກີດຂຶ້ນ ມາດົນແລ້ວ ແຕ່ກໍຍັງ ບໍ່ສາມາດ ກວດກາ ໄດ້ຢ່າງລະອຽດ ເພາະມີຫລາຍບັນຫາ ທີ່ກ່ຽວຂ້ອງ ກັບທີ່ດິນ ທີ່ຕ້ອງໄດ້ ແກ້ໄຂ.