ການລັກຕັດໄມ້ ຢູ່ເຂດ ຊາຍແດນລາວ ທີ່ຕິດກັບ ປະເທດ ເພື່ອນບ້ານ ຍັງມີຢູ່ ຕລອດ ຊື່ງເປັນອຸປສັກ ຕໍ່ແຜນການ ຈະເພີ່ມຄວາມ ແໜ້ນໜາ ໃຫ້ປ່າໄມ້ ໃນລາວ.
ອົງການຟື້ນຟູ ສະພາບປ່າໄມ້ ໃນເຂດລຸ່ມ ແມ່ນໍ້າຂອງ ເວົ້າວ່າ ປ່າໄມ້ໃນລາວ ໄດ້ຫລຸດລົງ ຄິດເປັນ ອັດຕຣາສະເລັ່ຍ 1.4% ຕໍ່ປີ ຊຶ່ງເຮັດໃຫ້ ປ່າໄມ້ ໃນປະເທດລາວ ຍັງເຫຼືອຢູ່ ບໍ່ເກີນ 9 ລ້ານ 5 ແສນ 5 ໝື່ນເຮັກຕາ ຫລື 40% ຂອງພື້ນທີ່ ທັງໝົດ ໃນປັດຈຸບັນ ຊື່ງເກີດຈາກການ ລັກຕັດໄມ້ເຖື່ອນ ເປັນຈໍານວນ ຫລວງຫລາຍ.
ທາງການລາວ ແບ່ງພື້ນທີ່ ປ່າໄມ້ ອອກເປັນ 3 ປະເພດ ຄື ປ່າປ້ອງກັນ ປ່າສງວນ ແລະ ປ່າຜລິດ. ອິງຕາມແຜນການ ແມ່ນຈະເຮັດໃຫ້ ເນື້ອທີ່ປ່າໄມ້ ເພີ່ມຂຶ້ນເປັນ 16 ລ້ານ ເຮັກຕາ ໃນປີ 2015 ແລະ ຫລາຍກ່ວາ 17 ລ້ານ ເຮັກຕາ ໃນປີ 2020.
ເຄືອຂ່າຍອະນຸຮັກ ຊັພຍາກອນ ທັມມະຊາດ ໃນເຂດລຸ່ມ ແມ່ນໍ້າຂອງ ກໍຣາຍງານວ່າ ການລັກຕັດໄມ້ ໃນລາວ ນັ້ນເປັນບັນຫາ ໃຫຍ່ຂຶ້ນນັບມື້ ໃນເຂດທີ່ມີ ການລັກຕັດໄມ້ ຫລາຍທີ່ສຸດ ກໍແມ່ນເຂດ ຊາຍແດນ ທີ່ຕິດກັບ ປະເທດ ວຽດນາມ ຈີນ ກໍາພູຊາ ແລະ ໄທ ໃນຈໍານວນ ທີ່ຫລາຍກວ່າ 300,000 ແມັດກ້ອນ ໃນແຕ່ລະປີ.
ດັ່ງນັ້ນ ຈຶ່ງເປັນການຍາກ ທີ່ຣັຖບານລາວ ຈະສາມາດບັນລຸ ໄດ້ຕາມແຜນການ ເພີ່ມຄວາມໜາແໜ້ນ ຂອງປ່າໄມ້ ຈະເຮັດໃຫ້ ປ່າໄມ້ ໜາແໜ້ນຂຶ້ນ 65% ຂອງພື້ນທີ່ທັງໝົດ ໃນປີ 2015 ແລະ ເພີ່ມຂຶ້ນເປັນ 70% ໃນປີ 2020.
ຕາມການເປີດເຜີຍ ຂອງເຈົ້າໜ້າທີ່ ຣະດັບສູງ ຂອງ ກົມປ່າໄມ້ ກະຊວງ ກະສິກັມ ປ່າໄມ້ ຜູ້ບໍ່ປະສົງ ອອກຊື່ ທ່ານນຶ່ງ.
