ການເປັນຢູ່ຂອງຊາວລາວ ຄວນດີກວ່າທີ່ເປັນຢູ່

ມີຊາວເມືອງ ວຽງຈັນ ບາງຈໍາພວກ ຢາກໃຫ້ ຣັຖບານ ປັບປຸງ ທຸກໆດ້ານ ໃຫ້ດີຂຶ້ນ ເປັນຕົ້ນ ດ້ານຣາຍຮັບ ຂອງ ປະຊາຊົນ ໃຫ້ພໍຢູ່ ພໍກິນ

ຊາວລາວ ຈໍານວນນຶ່ງ ຢາກຮຽກຮ້ອງ ໃຫ້ຣັຖບານ ປັບປຸງ ການເປັນຢູ່ ໃນທຸກໆດ້ານ ຂອງ ປະຊາຊົນ ໃຫ້ດີຂຶ້ນ ຢ່າງແທ້ຈິງ ເພື່ອເສຖກິດ ແລະ ສັງຄົມ ໃນປະເທດ ຈະໄດ້ກ້າວໜ້າ ເພາະເຖິງວ່າ ຣັຖບານ ຈະມີໂຄງການ ພັທນາເພື່ອໃຫ້ ປະຊາຊົນລາວ ຫລຸດພົ້ນ ຈາກຄວາມທຸກຍາກ ຢູ່ແລ້ວກໍຕາມ ແຕ່ໃນຄວາມ ເປັນຈິງແລ້ວ ຊາວລາວ ສ່ວນໃຫຍ່  ກໍຍັງຫາເຊົ້າ ກິນຄໍ່າ ຍັງຂາດເຂີນ ໃນທຸກດ້ານ. ກ່ຽວກັບເຣື່ອງນີ້ ຊາວນະຄອນຫລວງ ວຽງຈັນ ຜູ້ນຶ່ງເວົ້າວ່າ:

"ກໍຢາກໃຫ້ ປັບປຸງໝົດ ທຸກດ້ານ ນັ້ນແຫລະ ໃຫ້ມັນດີຂຶ້ນ ເສຖກິດບໍ່ ການທ່ອງທ່ຽວ ອີ່ຫຍັງກໍຄ່ອຍໆ ຂຍາຍຕົວ ກວ່າເມື່ອກ່ອນ ແຕ່ຄືເວົ້າ ຊີວິດ ການເປັນຢູ່ ກໍຍັງບໍ່ທັນ ພຽງພໍເທື່ອ".

ເລົາເວົ້າຕື່ມວ່າ ເຣື່ອງເສຖກິດນີ້ ເປັນບັນຫາຫລັກ ຂອງຊາວລາວ ຂະນະທີ່ ໂຄງການຕ່າງໆ ຂອງຣັຖບານ ສ່ວນຫລາຍ ບໍ່ເປັນຜົນດີ ເທົ່າທີ່ຄວນ ສໍາລັບຊາວລາວ ແຕ່ຈະມີຜົນປໂຍດ ສະເພາະ ຄົນບາງກຸ່ມ ເທົ່ານັ້ນ ຮວມເຖິງ ການຫລັ່ງໄຫລ ເຂົ້າມາຂອງຄົນ ຕ່າງດ້າວ ຊຶ່ງຣັຖບານ ບໍ່ສາມາດ ຄວບຄຸມໄດ້ນັ້ນ ກໍມາຍາດແຍ່ງ ອາຊີບ ຂອງຄົນລາວ ຢູ່ເປັນປະຈໍາ.

ທາງເຈົ້າໜ້າທີ່ ເສີມສ້າງ ຮາກຖານ ການເມືອງ ນະຄອນຫລວງ ວຽງຈັນ ກໍໄດ້ ອະທິບາຍວ່າ ການທີ່ຈະປັບປຸງ ໃນແຕ່ລະດ້ານ ໃຫ້ດີຂຶ້ນໄດ້ນັ້ນ ຈໍາຕ້ອງ ໄດ້ເບິ່ງເຖິງ ຫລາຍປັດໃຈ ບໍ່ແມ່ນວ່າ ເຂດໃດ ຂໍມາ ກໍຈະໄດ້ໝົດ:

"ອີ່ຫຍັງ ທີ່ຕ້ອງການບ້າງ ອີ່ຫຍັງ ໄມ່ຕ້ອງການ ບໍ່ຈໍາເປັນ ເຮົາກໍຈະດູ ຕາມແຜນ ພວກເຮົາມີແຜນ ແລະໄປດູວ່າ ພວກເຮົາມີ ໂຄງການແບບນີ້ ມາຈະລົງ ທີ່ຕົງໄໜ ເຂດໃດ ທີ່ມີຄວາມ ຈໍາເປັນຫລາຍກວ່າ ແລະ ກໍດູວ່າເມືອງໃດ ທີ່ມີຄວາມ ຈໍາເປັນກ່ອນ ເຮົາກໍລົງເມືອງ ນັ້ນກ່ອນ".

ເຈົ້າໜ້າທີ່ ວ່າ ທຸກມື້ນີ້ ລາວຍັງຢູ່ໃນ ຄວາມສ່ຽງເຣື່ອງ ການສໍາຣະ ໜີ້ສິນ ຕໍ່ຕ່າງປະເທດ ທີ່ມີຢູ່ໃນ ຣະດັບສູງ ແລະ ຍັງມີຄວາມຈໍາເປັນ ຕ້ອງຫາທຶນ ເພື່ອເຂົ້າຖືຫຸ້ນ ໃນຫລາຍ ໂຄງການ ລົງທຶນ ຂນາດໃຫຍ່ ຂອງຕ່າງປະເທດ. ດັ່ງນັ້ນ ການທີ່ຈະພັທນາ ແຕ່ລະດ້ານ ໃນສັງຄົມລາວ ຈຶ່ງຕ້ອງໄດ້ເບິ່ງ ເຖິງຄວາມຈໍາເປັນ ໃນແຕ່ລະ ທ້ອງຖີ່ນ ໄປພ້ອມໆກັນ.