ກຸ່ມທຸຣະກິດ ຈີນ ສົນໃຈ ຢາກລົງທືນ ສ້າງຂົວ ຂ້າມນໍ້າຂອງ ຈາກເມືອງ ຫລວງພຣະບາງ ໄປຫາເມືອງ ຈອມເພັດ.
ກຸ່ມລົງທຶນ ຈາກແຂວງ ຢຸນນ່ານ ສົນໃຈ ສ້າງຂົວ ແຫ່ງນີ້ ເພື່ອແລກປ່ຽນ ກັບການໄດ້ຮັບ ສັມປະທານ ທີ່ດິນ ໃນເມືອງຈອມເພັດ ທີ່ ນັກທຸຣະກິດ ຈີນ ຕ້ອງການ ພັທນາ ເປັນເຂດ ເສຖກິດ ພິເສດ. ຕາມການເປີດເຜີຽ ຂອງເຈົ້າໜ້າທີ່ ຂັ້ນສູງ ປະຈໍາແຂວງ ທີ່ບໍ່ປະສົງ ອອກຊື່.
ເຈົ້າໜ້າທີ່ເວົ້າວ່າ ສະຖາບັນ ການອອກແບບ ແລະ ສໍາຣວດ ແຜນການ ຄົມມະນາຄົມ ຂົນສົ່ງ ຈາກແຂວງຢຸນນ່ານ ໄດ້ສໍາເຣັດ ສືກສາ ສໍາຣວດ ແລະ ອອກແບບ ຂົວ ເປັນທີ່ຮຽບຮ້ອຍ ແລ້ວ ຫລັງຈາກໄດ້ ເລີ້ມລົງມືມາ ແຕ່ຕົ້ນປີ 2012. ຜົນຂອງການ ສືກສາ ສໍາຣວດ ເຫັນວ່າ ການສ້າງຂົວ ຄຸ້ມຄ່າ ໃນຫຼາຍດ້ານ. ນອກຈາກຮັບໃຊ້ ການຂົນສົ່ງ ແລະ ຄົມມະນາຄົມ ຣະຫ່ວາງ ສອງເມືອງ ນີ້ແລ້ວ ກໍຍັງຈະເຮັດ ໃຫ້ມີການ ຂະຫຍາຍໂຕ ທາງດ້ານ ເສຖກິດ ໃນເຂດ ເມືອງຈອມເພັດ ເພາະວ່າ ເມື່ອງຈອມເພັດ ຈະເປັນ ສະຖານີ ຣົຖໄຟ ແຫ່ງນື່ງ ຂອງ ເສັ້ນທາງຣົດໄຟ ຄວາມໄວສູງ ລາວ-ຈີນ ທີ່ຢູ່ໃນ ແຜນການ.
ນັກທຸຣະກິດ ຈີນ ຈະສເນີສ້າງຂົວ ໃຫ້ກ່ອນ ໃນມູນຄ່າ $USD 65 ລ້ານ ເພື່ອໄດ້ຮັບ ສັມປະທານ ທີ່ດິນ ໃນພື້ນທີ່ ບໍ່ຕໍ່າກວ່າ 1,000 ເຮັກຕ້າ ເພື່ອພັທນາ ເປັນເຂດ ເສຖກິດພິເສດ ບໍຣິການ ທ່ອງທ່ຽວ ຄົບວົງຈອນ ໂດຍມີຣະຍະ ສັມປະທານ 50 ປີ.
ຣາຍຣະອຽດ ຢ່າງເປັນທາງການ ນັ້ນຍັງບໍ່ທັນ ນໍາມາ ເປີດເຜີຽເທື່ອ ແຕ່ວ່ານີ້ ກໍເປັນຂ່າວ ຄວາມຄືບໜ້າ ຂອງການພັທນາ ແຂວງ ຫລວງພຣະບາງ ທີ່ເລີ້ມ ມາໄດ້ 2-3 ປີ ແລ້ວ ທີ່ວ່າຈີນ ຈະສ້າງເມືອງໃໝ່.
ນີ້ກໍເປັນໂຄງການ ຢ່າງນື່ງ ຂອງແຜນການ ພັທນາ ເສຖກິດ ທີ່ ຣັຖບານລາວ ປ່ຽນດິນ ເປັນຕົ້ນທືນ.
