ຊາວລາວ ບໍ່ຢາກອອກ ຄວາມເຫັນ ເຣື້ອງ ມາດາມ Anne Sophie Gindroz ຜູ້ອໍານວຍການ ອົງການ ບໍ່ຂື້ນກັບ ຣັຖບານ ທີ່ຖືກ ເນຣະເທດ ອອກຈາກ ສປປ ລາວ ຢ່າງ ກະທັນຫັນ.
ເຖິງແມ່ນວ່າ ໃນທຸກມື້ນີ້ ຊາວລາວ ຢາກຈະອອກ ຄວາມຄິດ ຄວາມເຫັນ ໃນບັນຫາ ຕ່າງໆ ກ່ຽວກັບ ບ້ານເມືອງ ກໍດີ ແຕ່ເມື່ອຖາມ ຄວາມເຫັນ ເຣື້ອງ ທີ່ ຣັຖບານ ອອກຄໍາສັ່ງ ເນຣະເທດ ມາດາມ Anne-Sophie Gindroz ຜູ້ອໍານວຍການ ອົງການ Helvetas ຂອງ Switzeland ໃຫ້ອອກຈາກ ສປປ ລາວ ພາຍໃນ 48 ຊົ່ວໂມງ ນັ້ນ ຊາວລາວ ໃນ ນະຄອນຫລວງ ວຽງຈັນ ຜູ້ນື່ງເວົ້າວ່າ ຕົນບໍ່ຢາກໃຫ້ ຄວາມເຫັນໃດໆໝົດ ເພາະວ່າ ຂ່າວທີ່ໄດ້ຮັບ ບໍ່ແຈ້ງຂາວ. ນາງເວົ້າວ່າ:
"ເຣື້ອງຂ່າວນີ້ ບໍ່ຮູ້ວ່າແມ່ນບໍ ຫລືບໍ່ແມ່ນ ວ່າຊັ້ນຊະ ເຣືອງການເວົ້າ ຕໍ່ຕ້ານ ຫລື ບໍ່ຕໍ່ຕ້ານ ມັນແມ່ນ ເວົ້າຄືແນວໃດ ເຮົາກໍບໍ່ຮູ້. ໂຄງການຊ່ວຍເຫລືອ ທີ່ວ່າ ບໍ່ຂື້ນກັບ ຣັຖບານ ທີ່ເວົ້າວ່າ ຕໍ່ຕ້ານນັ້ນ ມັນແມ່ນ ມູນຄວາມຈິງ ຫລືບໍ່ ທີ່ເພິ່ນສົ່ງອອກ ເມືອງລາວ ເພາະວ່າ ເນື້ອໃນການເວົ້າ ເຮົາບໍ່ຮູ້ວ່າ ເພິ່ນເວົ້າຫຍັງ ການກະທໍາ ເຂົາກະທໍາ ຄືແນວໃດ".
ນາງວ່າ ເຣື້ອງນີ້ ບໍ່ມີໜັງສືພິມ ຫລື ສື່ມວນຊົນໃດ ໃນລາວ ຣາຍງານ ຢ່າງລະອຽດ ວ່າ ມາດາມ Sophie ມີຄວາມຜິດ ເຣື້ອງໃດ ຣັຖບານຈື່ງສັ່ງ ໃຫ້ອອກ ຈາກ ປະເທດໄປ ໃນເຣື້ອງນີ້ ອາດເປັນເຣື້ອງ ການເມືອງ ຫລາຍກວ່າ. ຊາວລາວ ອີກຄົນນື່ງ ເວົ້າວ່າ ເຣື້ອງນີ້ ບໍ່ສົມຄວນ ເວົ້າຫຍັງ ເພາະເຮົາ ບໍ່ເຂົ້າໃຈ:
"ເວົ້າບໍ່ໄດ້ດອກ ອັນນີ້ນະ ເວົ້າໄປດຽວ ມັນຈະຜິດອີກ. ບໍ່ມີຄວາມເຫັນ ຫລາຍກ່ອນ ບໍ່ຮູ້ຈັກ ຊີ່ເວົ້າ".
ເມື່ອເວົ້າເຖິງ ການເມືອງແລ້ວ ຊາວລາວ ບໍ່ຄ່ອຍກ້າເວົ້າ ກ້າວິຈານ ອັນໃດໝົດ ເພາະຄິດຢ້ານວ່າ ບໍ່ມີຄວາມ ປອດພັຍ.
