ການພັທນາ ຢ່າງວ່ອງໄວ ອາດສົ່ງຜົລ ທາງລົບ ຫລາຍກວ່າ ທາງບວກ
ນັກພັທນາ ສິ່ງແວດລ້ອມ ໄດ້ສະແດງ ຄວາມເຫັນວ່າ ການພັທນາ ທີ່ເຕີບໂຕໄປ ຢ່າງວ່ອງໄວ ໃນເມືອງໃຫຍ່ ເປັນຕົ້ນແມ່ນ ນະຄອນຫລວງ ວຽງຈັນ, ຫລວງພຣະບາງ ແລະ ຈໍາປາສັກນັ້ນ ອາດຈະສົ່ງຜົລ ໃຫ້ເກີດຄວາມ ເສັຍຫາຍ ແລະ ອັນຕລາຍ ຕໍ່ສັງຄົມ, ເມືອງ ແລະ ທັມມະຊາຕໄດ້. ແລະ ບາງເທື່ອ ໃນເຂດ ຊົນນະບົດ ທີ່ເບິ່ງ ຄ້າຍກັບວ່າ ບໍ່ໄດ້ຮັບ ການພັທນາ ກໍຈະສົ່ງຜົລ ຮ້າຍແຮງ ໄປກ່ວາເດີມ ເຊັ່ນກັນ:
“ເຮົາພັທນາ ໄວເກີນໄປ ມັນກໍຈະເຮັດໃຫ້ ຊັພຍາກອນ ຂອງຊາຕ ມັນກໍຈະຫາຍ ໄປໄວ ບາງເທື່ອນີ້ ເຮົາຕ້ອງການພັທນາ ແຕ່ວ່າ ເຮົາພັທນາ ໄປແບບ ບໍ່ຄໍານຶງເຖິງ ການເສັຍຫາຍ ນີ້ກໍອັນຕະລາຍ.”
ທ່ານ ກ່າວຕື່ມວ່າ ທຸກມື້ນີ້ ເຣື້ອງການພັທນາ ຖືວ່າ ເປັນສິ່ງທີ່ມີ ຄວາມຈໍາເປັນ ຕໍ່ປະເທດ ແລະ ເພື່ອໃຫ້ຊີວິດ ການເປັນຢູ່ ຂອງປະຊາຊົນ ດີຂຶ້ນ, ໂດຍສະເພາະ ດ້ານວັດຖຸ ແລະ ຈິດໃຈ, ແຕ່ການພັທນາ ທີ່ເກີດຂຶ້ນນັ້ນ ຄວນເປັນໄປ ແບບໝັ້ນຄົງ ແລະ ຍືນຍົງ ບໍ່ແມນວ່າ ພັທນາ ເປັນຈຸດໆ ຫລື ພັທນາ ເພື່ອຜົລປໂຍດ ດ້ານໃດດ້ານນຶ່ງ, ໂດຍທີ່ບໍ່ໄດ້ ຄໍານຶງເຖິງ ຜົລເສັຍ ທີ່ຕາມມາ ພາຍຫລັງ.
ນອກຈາກ ການພັທນາ ຢ່າງວ່ອງໄວ ໃນຕົວເມືອງ ຈະສົ່ງຜົລ ເສັຍແລ້ວ, ແຕ່ທາງເຂດ ຊົນນະບົດ ບໍ່ໄດ້ມີການ ພັທນາ ແຕ່ຢ່າງໃດ ເກີດຂຶ້ນ ກໍຈະສົ່ງ ຜົລເສັຍ ເຊັ່ນດຽວກັນ:
“ບ້ານນອກ ບາງເທື່ອ ເໝືອນເດີມ ແຕ່ ບາງເທື່ອ ມັນກໍຍັງ ຮ້າຍກ່ວາເດີມ ເພາະວ່າ ປະຊາຊົນ ມັນການສຶກສາ ຂອງພວກເຮົາ ມັນບໍ່ສາມາດ ຈະຕອບສນອງ ດ້ານການພທັນາ ໃຫ້ແກ່ ຊົນນະບົດໄດ້.”
ບັນຫາ ທີ່ສົ່ງຜົລ ຕໍ່ການພັທນາ ໃນລາວ ກໍຄື ມາຕຖານ ການດໍາຣົງ ຊີວິດ ທີ່ຕໍ່າ, ໂດຍສະເພາະ ການສຶກສາ ແລະ ສາທາຣະນາະສຸກ ເຮັດໃຫ້ ຣັຖບານລາວ ມີຄວາມຫວັງ ທີ່ຈະດຶງດູດ ການລົງທຶນ ຈາກຕ່າງປະເທດ ແລະ ຄວາມຊ່ອຍເຫລືອ ຕ່າງໆ ເພື່ອມາພັທນາ ປະເທດ ແຕ່ການດຶງດູດ ນັກລົງທຶນ ເຂົ້າມານັ້ນ, ຣັຖບານລາວ ບໍ່ໄດ້ ມີການວາງແຜນ ທີ່ເຂັ້ມງວດ ໃນທຸກໆດ້ານ.
