ຊາວບ້ານ ຄົນນຶ່ງ ຢູ່ເມືອງ ຍົມມະລາດ ທີ່ ປະຕິເສດ ບໍ່ໃຫ້ ທາງການ ຍຶດທີ່ດິນ ຂອງຕົນ ຈົນຖືກຈັບ ແລະ ຖືກກັກຂັງ ຢູ່ຄຸກ ໃນແຂວງ ຄຳມ່ວນ
ນາງ ສິວັນໄຊ ພົມມະລາດ ອາຍຸ 31 ປີ ຖືກຈັບ ແລະ ຄຸມຂັງ ມາເປັນເວລາ ຫລາຍອາທິດ ແລ້ວ ໃນເບື້ອງຕົ້ນ ຖືກຈັບ ຢູ່ບ້ານຄູນຄຳ ເມືອງຍົມມະລາດ ແຂວງ ຄຳມ່ວນ ແລ້ວຖືກສົ່ງໄປ ຂັງຢູ່ຄຸກ ແຂວງຄຳມ່ວນ ຈົນເຖິງ ປັດຈຸບັນ. ທ່ານ ສຸກພະອວນ ພົມມະລາດ ຜູ້ເປັນຜົວເວົ້າວ່າ ເມັຍຂອງເລົາ ຖືກຈັບ ເພາະວ່າຂະເຈົ້າ ບໍ່ພໍໃຈ ທີ່ທາງການ ຂອງເມືອງ ຍົມມະລາດ ຈະຍຶດເອົາ ທີ່ດິນ ມູນມັງຂອງຂະເຈົ້າ. ດັ່ງຜູ້ເປັນຜົວ ໄດ້ ອະທິບາຍ ສາເຫດ ເພິ້ມຕື່ມວ່າ:
"ເປັນດິນ ຂອງພວກຂ້ອຍ ພວກຂ້ອຍຢູ່ຫັ້ນ ບັດນີ້ແຫລະ ເຂົາເຊີນ ໃຫ້ເຂົ້າໄປ ຫ້ອງການ ເພິ່ນຢາກໃຫ້ ຍ້າຍໜີ ເພິ່ນຊິເອົາ ເພິ່ນເວົ້າວ່າ ຖ້າບໍ່ຍ້າຍ ເພິ່ນຈະເອົາຣົດ ມາດຸດ ມາມ້າງ ມາດຸດ ກໍດຸດ ມ້າງກໍມ້າງ ບໍ່ຍອມໜີ ຕາຍກໍຕາຍ ຖືກຄຸກກໍຖືກ ຮ້ອງຄ່າທົດແທນ ເພິ່ນບໍ່ຍອມເສັຍ ເຈົ້າຢາກໄປ ຟ້ອງເອົາໃສ ກໍເຊີນໂລດຫລ໋າ."
ບໍ່ເທົ່ານັ້ນ ທ່ານ ສຸກພະອວນ ຜູ້ເປັນຜົວຍັງ ເວົ້າວ່າ ທາງເຈົ້າໜ້າທີ່ ຍັງຕູ່ຫາວ່າເມັຍ ຂອງເລົາ ເປັນຫົວໜ້າ ຄ້າມະນຸດ ແລະ ນຳພາຊາວບ້ານ ໄປປະທ້ວງ ຄັດຄ້ານ ຣັຖບານ ຢູ່ຂົວ ສວັນນະເຂດ.
ສ່ວນທ່ານ ຄຳພູວັນ ໄຊຍະລາດ ເຈົ້າໜ້າທີ່ ເມືອງ ຍົມມະລາດ ກໍຍອມຮັບວ່າ ສອງຜົວເມັຍນີ້ ມີຂໍ້ຂັດແຍ້ງ ທີ່ດິນ ກັບເຈົ້າໜ້າທີ່ ເມືອງແທ້. ດັ່ງທ່ານກ່າວ ໃນຕອນນຶ່ງວ່າ:
"ນັກວິຊາການ ເຂົາໄປແທກ ຫລາຍເທື່ອນໍ໋ ດິນນັ່ນຖືກ ຊົດເຊີຍແລ້ວ ແຕ່ວ່າຕອບ ຊົດເຊີຍນັ້ນ ມີບາງອັນ ອາດຈະບໍ່ ລະອຽດ ປານໃດນໍ໋ ຄືວ່າ ມີຕອນນຶ່ງວ່າ ໄດ້ເງິນ ຄ່າຊົດເຊີຍ ໜ້ອຍຫ່ັນນ໋ະ ອາດຈະເບື້ອງຕົ້ນ ຂໍ້ມູນ ບໍ່ລະອຽດ."
ແຕ່ສາເຫດ ທີ່ພາໃຫ້ນາງ ສີວັນໄຊ ຖືກຈັບ ແລະ ກັກຂັງນັ້ນ ທ່ານ ຄຳພູວັນ ອະທິບາຍ ວ່າ ທ່ານເອງ ກໍຍັງບໍ່ຮູ້ຄັກ ອາດຈະບໍ່ຖືກຈັບ ຍ້ອນເຣື່ອງ ທີ່ດິນ ອາດຈະເປັນຍ້ອນ ເຣື່ອງອື່ນ ແຕ່ ທ່ານ ສີວັນໄຊ ບໍ່ຍອມເປີດເຜີຍ ຣາຍລະອຽດ ວ່າເຣື່ອງອື່ນນັ້ນ ແມ່ນເຣື່ອງ ໃດແທ້.
ຫລ້າສຸດ ຜົວຂອງຜູ້ຖືກຈັບ ເວົ້າວ່າ ໃນເບື້ອງຕົ້ນ ມີອີກຄົນນຶ່ງ ຖືກຈັບພ້ອມໆ ກັບເມັຍຂອງເລົາ ແລະຕໍ່ມາ ຊາວບ້ານອີກ 30 ຄົນ ທີ່ໄປຂົວ ສວັນນະເຂດ ນຳກັນນັ້ນ ກໍຖືກຈັບ ເຊັ່ນກັນ ແຕ່ປັດຈຸບັນ ທັງໝົດ ຖືກປ່ອຍຕົວແລ້ວ ຍັງເຫລືອແຕ່ ເມັຍຂອງເລົາ ທີ່ຍັງຖືກ ກັກຂັງຢູ່.
