ຫລາຍພາກສ່ວນ ຢູ່ລາວ ບໍ່ສາມາດ ບໍ່ກ້າ ສະແດງ ຄວາມເຫັນ ທີ່ເຫັນວ່າ ເປັນປໂຍດ ຕໍ່ປະເທດຊາດ ຖ້າຫາກວ່າ ຂັດກັບ ນະໂຍບາຍ ພາກຣັຖ.
ຊາວລາວ ບາງຈໍາພວກ ເວົ້າເຖິງ ການອອກ ຄວາມຄິດ ຄວາມເຫັນ ຂອງ ພະນັກງານ ພາກຣັຖ ຫລື ພະນັກງານ ຈາກອົງກອນ ເອກກະຊົນ ຕ່າງໆ ທີ່ເວົ້າເຖິງ ສິ່ງທີ່ເປັນ ປໂຍດຕໍ່ ປະເທດ, ແຕ່ຂັດນະໂຍບາຍ ພາກຣັຖ, ຊຶ່ງເຣື້ອງດັ່ງກ່າວ ເປັນສິ່ງທີ່ ຕ້ອງຫ້າມ ຢູ່ໃນລາວ. ດັ່ງນັ້ນ ຜູ້ທີ່ຢູ່ ເມືອງລາວ ຄວນປະພຶດຕົວ ໃຫ້ເໝາະສົມ ກັບເງື່ອນໄຂ ທາງສັງຄົມ ແລະ ວັທນະທັມ ເພາະຖ້າຫາກ ມີການຜິດພາດ ກໍຈະຖືກ ລົງໂທດ ຕາມກົດໝາຍ ຫລື ນອກກົດໝາຍ ໄດ້:
“ສ່ວນຫລາຍ ຄືປະເທດເຮົານີ້ ມັນຍາກ ກໍບ່ອນນີ້ ແຫລະ ເພາະວ່າ ບາງຄົນ ກໍບໍ່ຢາກໃຫ້ ອອກຄວາມຄິດເຫັນ ເພາະວ່າ ອອກຄວາມຄິດເຫັນ ແລ້ວ ເຮົາເວົ້າ ບ່ອນໃດ ມັນຖືກໃຈ ກັບຣັຖບານ ຂະເຈົ້າ ກໍຈະດີໃຈແທ້, ແຕ່ວ່າ ເຮົາເວົ້າອັນໃດ ທີ່ວ່າ ຣັຖບານ ເຮັດບໍ່ທັນໄດ້ດີ ຫລືວ່າ ຄວນຈະປ່ຽນແປງ ນີ໊ ບາງເທື່ອ ຕໍ່ໜ້າ ເຂົາກໍຈະ ບໍ່ເວົ້າຫຍັງ ແຕ່ວາເຮົາ ບໍ່ຮູ້ວ່າ ເບື້ອງຣັຖ ຂະເຈົ້າ ຈະຄິດໃສ່ເຮົາ ຄືແນວໃດ ມັນຍາກຢູ່ນະ ປະເທດເຮົາ.”
ທ່ານ ກ່າວຕື່ມວ່າ ຢາກໃຫ້ຄົນລາວ ຄືກັນກັບ ຫລາຍປະເທດ ທີ່ເວົ້າ ກົງໄປກົງມາ ໄດ້ ເພາະຢູ່ໃນລາວ ມີແຕ່ການເວົ້າ ສັລເສີນ ເພື່ອເອົາໜ້າ ເອົາຕາ ແລະ ຜົລງານ, ເປັນຕົ້ນວ່າ ຜູ້ຮັບຜິດຊອບ ໃນກະຊວງຕ່າງໆ ຣາຍງານ ຕໍ່ ສາທາຣະນະຊົນ ວ່າ ນະໂຍບາຍ ຂອງຣັຖບານ ທີ່ວາງອອກ ເປັນໄປ ຢ່າງ ມີແບບແຜນ ຕາມ ນະໂຍບາຍ ຂອງພາກຣັຖ ແຕ່ໃນຕົວຈິງ ມັນບໍ່ສາມາດ ປະຕິບັດ ໃຫ້ເປັນໄປ ຕາມແຜນໄດ້.
ສ່ວນຊາວລາວ ອີກຜູ້ນຶ່ງ ກໍເວົ້າວ່າ ປະຊາຊົນລາວ ສ່ວນຫລາຍ ຈະມັກສະແດງ ຄວາມຄິດ ຄວາມເຫັນ ທັງໃນດ້ານບວກ ແລະ ດ້ານລົບ ແຕ່ກໍຈະ ບໍ່ເປັນການດີ ຕໍ່ຄໍາເວົ້າ ຖ້າຫາກວ່າ ໄປຂັດກັບ ນະໂຍບາຍ ຂອງ ຣັຖບານ:
“ພວກຂ້ອຍ ກໍບໍ່ຮູ້ ບໍ່ສາມາດ ໃຫ້ຄວາມຄິດ ຄວາມເຫັນ ອັນດີບໍ່ດີ ກໍຍາກ ຊໍ່າໆກັນ ເຣື້ອງ ປະຊາຊົນ ນີ້ ຢາກໃຫ້ດີ ນັ້ນແຫລະ ແຕ່ວ່າ ເຣື້ອງທາງ ຣັຖບານເພິ່ນ ເພິ່ນ ກໍບໍ່ດີ ປານໃດ ຈະມີບັນຫາ ຈະຕ້ອງໂທດ ຄະດີ ການເມືອງ ຂອງ ຣັຖບານ ເພິ່ນ.”
ນາງກ່າວ ໃນຕອນທ້າຍ ວ່າ ຜ່ານມາ ໃນລາວ ມີຜູ້ທີ່ກ້າ ສະແດງຄວາມຄິດ ຄວາມເຫັນ ທີ່ເປັນປໂຍດ ຕໍ່ປະເທດຊາຕ ສູ່ສາທາຣະນະຊົນ ທັງພາກຣັຖ ແລະ ພາກເອກຊົນ, ແຕ່ບຸກຄົນ ເຫລົ່ານັ້ນ ກໍຕ້ອງໄດ້ຮັບ ຄວາມເດືອດຮ້ອນ ແລະ ຮວມໄປເຖິງ ຄອບຄົວອີກດ້ວຍ ເນື່ອງຈາກວ່າ ຄວາມຄິດ ທີ່ສະແດງ ອອກໄປນັ້ນ ເຖິງແມ່ນວ່າ ຈະເປັນປໂຍດ ແຕ່ກໍຂັດກັບ ນະໂຍບາຍ ຂອງພາກຣັຖ.
