ຊາວລາວ ເວົ້າວ່າ ປັຈຈຸບັນ ການຂຸດຄົ້ນ ແຮ່ທາດ ໃນລາວ ຂອງ ນັກລົງທຶນ ຕ່າງຊາດ ຮ່ວມກັບ ຣັຖບານ ເປັນການ ຂຸດຄົ້ນ ທີ່ຄຽງຄູ່ ໄປກັບການ ສໍ້ໂກງ ແບບ ໜ້າຕາເສີຍ
ສປປລາວ ມີຊັພຍາກອນ ທັມມະຊາດ ອັນ ມະຫາສານ ແຕ່ ປະຊາຊົນ ລາວ ຍັງທຸກຍາກ ເພາະລາຍຮັບ ຈາກໂຄງການ ຂຸດຄົ້ນ ຊັພຍາກອນ ທັມມະຊາດ ນັ້ນບໍ່ຕົກ ມາຮອດ ປະຊາຊົນ. ດັ່ງຄົນລາວ ຜູ້ນື່ງເວົ້າວ່າ:
"ບັນຫາ ເຣື້ອງຄໍຣັບຊັ້ນ ບັນຫາເຣື້ອງ ຫລາຍໆຢ່າງ ມັນກິນ ໄປຕາມໆກັນ ມັນຫລາຍເຫດຜົລ ເຖິງວ່າ ຊັພສົມບັດ ຊັພຍາກອນ ທັມມະຊາດ ຢ່າງ ມະຫາສານ ໄມ້ນານາ ຊນິດ ມີຫລາຍຢ່າງ ແຕ່ວ່າມັນບໍ່ໄດ້ ໄປຂຸດຄົ້ນມາ ພັທນາ ປະເທດຊາດ ຂຸດຄົ້ນມາ ພັທນາ ປະເທດຊາດ ປະມານ 50% ເທົ່ານັ້ນ ສ່ວນ 50% ມັນຕົກຢູ່ໃນ ຜູ້ມີອຳນາດ".
ທ່ານກ່າວ ຕໍ່ໄປວ່າ ເຖິງແມ່ນວ່າ ຣັຖບານ ຈະປະກາດໂຈະ ໃຫ້ສຳປະທານ ຂຸດຄົ້ນ ຊັພຍາກອນ ທັມມະຊາດ ບາງຢ່າງ ແລ້ວກໍຕາມ ແຕ່ການໂຈະ ນັ້ນ ກໍບໍ່ເປັນໄປ ແບບຖາວອນ ຍັງມີການ ອະນຸຍາດ ໃຫ້ມີການ ຂຸດຄົ້ນຢູ່ ຍ້ອນການ ສໍ້ຣາສ-ບັງຫລວງ ຂອງເຈົ້າຫນ້າທີ່ ກ່ຽວຂ້ອງ ຂອງຣັຖ ທີ່ຮ່ວມມືກັບ ນັກລົງທຶນ.
ປະຊາຊົນ ສ່ວນໃຫຍ່ ກໍມີແຕ່ເປັນຫວ່ງ ແຕ່ເຮັດຫຍັງບໍ່ໄດ້ ການຂຸດຄົ້ນ ແຮ່ທາດ ສ້າງຄວາມເສັຽຫາຍ ໃຫ້ແກ່ ຊັພຍາກອນ ຂອງຊາດ ຢ່າງໃຫຍ່ຫລວງ ເຊັ່ນ ປ່າໄມ້ ແລະ ແມ່ນ້ຳລຳທານ. ດັ່ງຄົນລາວ ອີກທ່ານນື່ງ ເວົ້າວ່າ:
"ກໍຄິດເປັນຫວ່ງ ເປັນຫ່ວງ ທີ່ຊັພຍາກອນ ປ່າໄມ້ ທີ່ທຳລາຍ ແລະ ກໍເສັຽຫາຍ ກໍທັມມະດາ ຖ້າເອົາ ຊັພຍາກອນ ທັມມະຊາດ ມາໃຊ້ເປັນປໂຍດ ເປັນເຣື້ອງ ທັມມະດາ ປະຊາຊົນ ແລະ ກໍນັກທຸຣະກິດ ຕ່າງໆກໍມີ ປົກກະຕິ".
ການຂຸດຄົ້ນ ຊັພຍາກອນ ທັມມະຊາດ ປະເພດ ແຮ່ທາດ ນອກຈາກ ຈະບໍ່ສົ່ງ ຜົລດີ ຕໍ່ຊິວິດ ການເປັນຢູ່ ຂອງ ປະຊາຊົນ ລາວແລ້ວ ຍັງສ້າງ ຄວາມເສັຽຫາຍ ໃຫ້ແກ່ ສິ່ງແວດລ້ອມ ນຳອີກ.
