ທາງການລາວ ບໍ່ສົນໃຈ ໃນຄວາມ ເດືອດຮ້ອນ ຂອງ ປະຊາຊົນ ຫຼັງຈາກ ທີ່ຖືກສັ່ງ ໃຫ້ໂຍກຍ້າຍ ອອກຈາກ ໂຄງການ ພັທນາຕ່າງໆ.
ຊາວບ້ານ ຜູ້ທີ່ຖືກ ໂຍກຍ້າຍ ໃນແຂວງຫົວພັນ ເວົ້າວ່າ ທາງການລາວ ບໍ່ໃຫ້ຄວາມສົນໃຈ ໃນຄວາມເດືອດຮ້ອນ ຂອງ ປະຊາຊົນ ຫລັງຈາກ ການໂຍກຍ້າຍ ຂະເຈົ້າ ໄປແລ້ວ. ປະຊາຊົນ ຜູ້ທີ່ຖືກ ໂຍກຍ້າຍ ສ່ວນໃຫຍ່ ຈະໄດ້ຮັບ ຄວາມເດືອດຮ້ອນ ເນື່ອງຈາກວ່າ ຄ່າຊົດເຊີຍ ບໍ່ພຽງພໍ ທີ່ຈະໄປ ເລີ້ມຕົ້ນ ຢູ່ບ່ອນໃຫມ່ໄດ້ ເພາະຂາດເຂີນ ທຸກຢ່າງ ແລະຂະເຈົ້າ ກໍບໍ່ກ້າທີ່ຈະ ທັກທວງ ຫຼືຮຽກຮ້ອງຫຍັງໄດ້ ເພາະຢ້ານຖືກ ຈັບກຸມໃສ່ໂທດ. ດັ່ງນາງໄດ້ເວົ້າ ໃນຕອນນື່ງວ່າ:
"ຖ້າວ່າໃນ ກໍຣະນີ ເຮົາໄດ້ຍ້າຍ ໄປແລ້ວ ພໍຫລືບໍ່ພໍ ກໍເທົ່ານັ້ນ ຂັນເທີງ ເຂົາບໍ່ຮັບຮູ້ ກໍຄືເກົ່າ ຖ້າວ່າເຮົາ ໄດ້ອອກໄປແລ້ວ ເຖິງວ່າເຮົາ ຊີ່ໄປຈົ່ມຢູ່ ບ່ອນອື່ນ ໄປບົ່ນ ຢູ່ບ່ອນອື່ນ ກໍບໍ່ມີ ຄວາມຫມາຍ ຖ້າວ່າເຮົາ ໄດ້ຍີນຍອມ ອອກໄປແລ້ວ".
ນາງເວົ້າຕໍ່ໄປວ່າ ຄົນລາວ ຜູ້ທີ່ອາສັຍຢູ່ ໃນເມືອງ ມີໂອກາດ ຖືກເວນຄືນ ພື້ນທີ່ ຫລາຍກວ່າ ປະຊາຊົນ ໃນເຂດ ຊົນນະບົດ ເນື່ອງຈາກພື້ນທີ່ ເຂດໃນເມືອງ ມີຣາຄາ ສູງກວ່າ. ນາຍທືນ ຈະໃຫ້ຄ່າທົດແທນ ເປັນທີ່ດີນ ບ້ານຫລືເງີນ ຈຳນວນນື່ງ ແຕ່ໃນເຂດ ຊົນນະບົດ ຈະບໍ່ໄດ້ຫລາຍ ບາງແຫ່ງ ບໍ່ໄດ້ເລີຍ ປະຊາຊົນ ຈະເສັຽປຽບ ຫລາຍກວ່າ ໃນການໂຍກຍ້າຍ ຖີ່ນຖານ:
ນາງເວົ້າ ເພີ້ມອີກວ່າ: "ສ່ວນຫລາຍຖ້າວ່າ ຢູ່ໃນເມືອງ ເຂົາກໍກະທົບ ເຣື້ອງການ ທຳມາຫາກິນ ຂອງເຂົາ ເພາະວ່າ ເຂົາເປັນຄົນ ໃນເມືອງ ເຂົາໄປຢູ່ ບ້ານນອກ ບາງທີເຂົາ ກໍຢູ່ບໍ່ໄດ້ ການທຳມາ ຫາກິນ ເຂົາກໍລຳບາກ ມັນຫ່າງໄກ ຈາກຕົວເມືອງ".
ອິງຕາມຂໍ້ມູນ ທີ່ເຊື່ອຖືໄດ້ ມີຊາວບ້ານ ຫລາຍຄົນ ຖືກຂົ່ມຂູ່ ຈາກ ເຈົ້າຫນ້າທີ່ ທາງການ ແລະ ນັກລັງທຶນ ຕ່າງຊາດ ທີ່ຮ່ວມຫົວກັນ ໃນການໃຫ້ ຄ່າຊົດເຊີຍ ແບບບໍ່ຍຸຕິທັມ ແຕ່ບໍ່ຖືກເປີດເຜີຍ ຈາກຊາວບ້ານ ເພາະຢ້ານອຳນາດ ຂອງພັກຣັຖ.
