ປະຊາຊົນ ລາວ ເວົ້າວ່າ ຜູ້ນຳລາວ ບາງຄົນ ຍັງຕ້ອງໄດ້ ພັທນາໂຕເອງ ເພື່ອທີ່ຈະ ບໍຣິຫານ ປະເທດ ໃຫ້ດີຂື້ນ
ສັງຄົມຂ່າວຄາວ ອອນລາຍ ກ່ຽວກັບ ເຣື້ອງການເມືອງ ໃນສປປລາວ ໃນທຸກມື້ນີ້ ປາກົດວ່າ ມີຜູ້ເຂົ້າມາ ສະແດງ ຄວາມຄິດ ຄວາມເຫັນ ແລະ ວິຈານ ຣັຖບານລາວ ຫລາຍກວ່າ ແຕ່ກອ່ນ ໂດຍສະເພາະ ເຣື້ອງການປົກຄອງ ຊື່ງຄົນລາວ ຫລາຍຄົນ ເວົ້າວ່າ ບຸກຄຣາກອນ ໃນຄະນະ ຜູ້ນຳລາວ ຫລາຍຄົນ ຍັງຈະຕ້ອງໄດ້ ພັທນາໂຕເອງ ເພື່ອທີ່ຈະສາມາດ ບໍຣິຫານ ປະເທດ ໄປສູ່ຄວາມ ຈະເຣີນໄດ້. ດັ່ງຄົນລາວ ຄົນນື່ງ ເວົ້າວ່າ:
"ຜູ້ນຳລຸ້ນນີ້ ຍັງຖືວ່າ ຍັງຫລາຍຢ່າງ ຕ້ອງໄດ້ພັທນາ ທັງຄວາມຄິດ ເຣື້ອງພັທນາ ບຸກຄຣາກອນ ຜູ້ນຳ ຂອງປະເທດ ຕ້ອງມີ ປະຊາຊົນ ມີສ່ວນຮ່ວມ ນີ້ບໍ່ແມ່ນ ປະຊາຊົນ ມີສ່ວນຮ່ວມ ຍັງຫ່າງໄກຫລາຍ".
ທ່ານກ່າວ ຕໍ່ໄປວ່າ ຣັຖບານລາວ ເຄີຍເວົ້າ ຢູ່ສເມີວ່າ ປົກຄອງປະເທດ ແບບ ປະຊາທິປະຕັຍ ປະຊາຊົນ ມີສິດ ເລືອກຕັ້ງ ມີສິດຮ້ອງຮຽກ ແລະ ທັກທວງ ຖ້າພົບເຫັນ ບັນຫາ ຫຍໍ້ທໍ້ ທາງສັງຄົມ ເກີດຂື້ນ ແລະ ປະຊາຊົນ ກໍຕ້ອງມີ ສ່ວນຮ່ວມ ແຕ່ເປັນພຽງ ຄຳເວົ້າລ້າໆ ພາກປະຕິບັດ ໂຕຈີງ ນັ້ນບໍ່ມີເລີຍ. ປະຊາຊົນ ອີກຄົນນື່ງ ເວົ້າວ່າ ຈະເວົ້າເຣື້ອງ ການເມືອງ ກັບ ຣັຖບານ ຢ່າເວົ້າດີກວ່າ ເພາະຈະມີ ບັນຫາ ຕາມມາ. ເລົາເວົ້າ ໃນຕອນນື່ງວ່າ:
"ຈະໃຫ້ຊາວບ້ານ ຫລື ຈະໃຫ້ ປະຊາຊົນ ເວົ້າເຣື້ອງ ການສໍ້ຣາສ-ບັງຫລວງ ທຸກສິ່ງຢ່າງ ມັນກໍບໍ່ ຢາກເວົ້າ".
ທ່ານວ່າ ທຸກມື້ນີ້ ສັງຄົມອອນລາຍ ໃນລາວ ກໍມີການ ວິພາກວິຈານ ແລະ ສະແດງ ຄວາມຄິດເຫັນ ທາງດ້ານການເມືອງ ຫລາຍຂື້ນ ຮ່ວມໄປຮອດເຣື້ອງ ການຂັດແຍ່ງ ໃນພັກ-ຣັຖ ແຕ່ກໍບໍ່ມີຫຍັງ ປ່ຽນແປງເລີຍ. ທຸກສີ່ງທຸກຢ່າງ ກໍຍັງເຫມືອນເດີມ ຫລື ຮ້າຍໄປກວ່າເກົ່າ. ຍັງຈະໃຊ້ ເວລາດົນ ຫລື ອາດບໍ່ມີເລີຍ ທີ່ຄົນລາວ ຈະມີສິດ ເທົ່າທ່ຽມ ກັບ ປະເທດອື່ນ.
