ຊາວໜຸ່ມຮຽກຮ້ອງ ສປປລາວ ໃຫ້ປ່ອຍ ທ່ານສົມບັດ

ໃນຕອນເຊົ້າ ຂອງ ວັນທີ່ 25 ທັນວາ 2012 ໂຕແທນ ຊາວໜຸ່ມ ລຸ່ມແມ່ນໍ້າຂອງ ລາວ ໄທ ພະມ້າ ກໍາພູຊາ ແລະ ວຽດນາມ ໄດ້ອອກຖແລງ ຢູ່ຕໍ່ໜ້າ ສະຖານທູດ ລາວ ທີ່ ບາງກອກ ຂໍໃຫ້ທາງການ ລາວ ປ່ອຍທ່ານ ສົມບັດ ສົມພອນ ອະດີດຫົວໜ້າ ອົງການ ສູນຝືກອົບຮົມ ຮ່ວມພັທນາ ຊຸມຊົນ ໃນລາວ ທີ່ ຫາຍສາບສູນ ຢ່າງໄຮ້ຮ່ອງຮອຍ.  ດັ່ງໂຕແທນ ເຍົາວະຊົນ ໄດ້ກ່າວວ່າ:

"ສຽງຊາວໜຸ່ມ ເຍົາວະຊົນ ຈາກລາວ ປະຊາຊົນລາວ ຕ້ອງການ ໃຫ້ມີຄວາມສງົບ ການປົກຄອງແບບ ປະຊາທິປະໄຕ ແລະ ຄວາມຍຸຕິທັມ ໃນສັງຄົມ ອັນແທ້ຈິງ. ຈົ່ງປ່ອຍໂຕ ທ່ານ ສົມບັດ ສົມພອນ ໃຫ້ເປັນອິສຣະ".

ສຽງຈາກໂຕແທນ ເຍົາວະຊົນໄທ ວ່າ ການຫາຍສາບສູນ ຂອງ ທ່ານສົມບັດ ບໍ່ຄວນເປັນ ພຽງແຕ່ຂ່າວ ຢູ່ໃນໜ້າ ໜັງສືພິມ ເທົ່ານັ້ນ ແຕ່ມັນເຮັດໃຫ້ເຮົາ ແລະ ສັງຄົມ ມີຄໍາຖາມວ່າ ມັນເປັນເຣື້ອງ ທີ່ຍຸຕິທັມ ແລ້ວບໍ່ ສໍາລັບຄົນ ທີ່ອຸທິດຊີວິດ ເຮັດໜ້າ ທີ່ປົກປ້ອງ ແລະ ຮັກສາສິດທິ ໃຫ້ຜູ້ອື່ນ ແຕ່ບໍ່ໄດ້ຮັບ ການປົກປ້ອງ ການໃຊ້ສິດທິ ຂອງຕົນເອງ.

ສຽງຈາກໂຕແທນ ເຍົາວະຊົນ ວຽດນາມ ເວົ້າວ່າ ທ່ານ ສົມບັດ ແລະ ພວກເຮົາ ຕ່າງກໍມີ ຄວາມຕ້ອງການ ສັນຕິສຸກ ເພື່ອໃຫ້ໂລກນີ້ ໜ້າຢູ່. ໂປຣດຢ່າໄດ້ ປິດຕັນໂອກາດ ໃນການສ້າງ ສັນຕິພາບ ໃຫ້ເກີດຂື້ນ ໃນໂລກຂອງເຮົາ ດັ່ງນັ້ນ ໂປຣດໃຫ້ຄວາມ ຍຸຕິທັມ ແກ່ທ່ານ ສົມບັດ ໃຫ້ທ່ານ ມີອິສຣະ ໃຫ້ມີຄວາມ ຍຸຕິທັມ ໃນໂລກໜ່ວຍນີ້ ຂໍໃຫ້ສຽງຂອງ ນັກກິຈກັມ ທ່ານນີ້ ຖືກຮັບຟັງ.

ໃນຕອນທ້າຍ ໂຕແທນ ເຍົາວະຊົນ ລຸ່ມແມ່ນໍ້າຂອງ ໄດ້ຮຽກຮ້ອງ ໃຫ້ຣັຖບານລາວ ເລັ່ງລັດ ສືບສວນ ແລະ ຊອກຫາ ທ່ານ ສົມບັດ ແລະ ຫວັງວ່າ ທ່ານສົມບັດ ຈະໄດ້ຮັບ ອິສຣະພາບ ໄດ້ກັບຄືນສູ່ ຄອບຄົວ ໃນໄວໆນີ້.