ໂຄງການສ້າງ ສນາມບິນ ສາກົນ ຢູ່ເຂດ ເສຖກິດ ພິເສດ ສາມຫລ່ຽມຄໍາ ທີ່ ແຂວງບໍ່ແກ້ວ ຈະເຮັດໃຫ້ ຣັຖບານລາວ ເປັນໜີ້ ເພີ່ມຂຶ້ນອີກ 500 ລ້ານ ໂດລາ ສະຫະຣັດ.
ການທີ່ ຣັຖບານລາວ ລົງນາມ ໃນສັນຍາ ວ່າດ້ວຍການກໍ່ສ້າງ ສນາມບິນສາກົນ ຢູ່ເຂດ ເສຖກິດ ພິເສດ ສາມຫລ່ຽມຄໍາ ທີ່ ແຂວງບໍ່ແກ້ວ ຮ່ວມກັບກຸ່ມ ທຸຣະກິດຈີນ ເມື່ອຕົ້ນປີນີ້ນັ້ນ ບໍ່ພຽງແຕ່ ຈະເຮັດໃຫ້ກຸ່ມ ທຸຣະກິດ ຈີນ ມີພັນທະ ເປັນຜູ້ລົງທຶນ ສ້າງສນາມບິນ ໃຫ້ແລ້ວຕາມ ສັນຍາ ເທົ່ານັ້ນ ແຕ່ຫາກຍັງຈະເຮັດໃຫ້ ຣັຖບານລາວ ມີພັນທະຊໍາລະ ເງິນທີ່ກູ້ຢືມ ບໍ່ໜ້ອຍກວ່າ 500 ລ້ານ ໂດລາ ສະຫະຣັດ ແລະ ເພີ້ມດອກເບັ້ຽ ໃຫ້ຝ່າຍຈີນ ເພາະວ່າ ເປັນການລົງທຶນ ທີ່ຈີນອອກໃຫ້ ລ່ວງ ໜ້າ. ຕາມຄໍາເວົ້າ ຂອງເຈົ້າໜ້າທີ່ ກະຊວງ ໂຍທາທິການ ແລະ ຂົນສົ່ງ ຂອງລາວທ່ານນຶ່ງ ທີ່ບໍ່ປະສົງ ອອກຊື່ ໄດ້ເປີດເຜີຍ ຕໍ່ເອເຊັຍ ເສຣີ. ສນາມບິນສາກົນ ທີ່ວ່ານີ້ ຈະມີທາງແລ່ນ ຂຶ້ນ-ລົງ ຂອງຍົນຍາວ ໃນຣະຫວ່າງ 2,700 ຫາ 3,000 ແມັດ. ສ່ວນລານຈອດຍົນ ກໍຈະມີ ຂນາດໃຫຍ່ ທີ່ຮອງຮັບ ບໍ່ໜ້ອຍກວ່າ 40 ລໍາ. ຄ່າກໍ່ສ້າງ ປະມານ 500 ລ້ານໂດລາ.
ເຂດເສຖກິດ ພິເສດ ສາມຫລ່ຽມຄໍາ ເປັນການລົງທຶນ ຂອງກຸ່ມ ບໍຣິສັດ ດອກງິ້ວຄໍາ ຂອງຈີນ ຊຶ່ງຣັຖບານ ລາວ ໄດ້ອະນຸມັດ ໃຫ້ສໍາປະທານ ທີ່ດິນ ໃນເນື້ອທີ່ 3,000 ເຮັກຕາ ເປັນເວລາ 99 ປີ ເປັນເຂດທີ່ຕິດ ກັບເຂດ ປ່າສງວນ ແຫ່ງຊາດ ສາຍພູກິ້ວລົມ ໃນເນື້ອທີ່ 7,000 ກວ່າເຮັກຕາ ທີ່ຍາວໄປຕາມ ລໍາແມ່ນໍ້າຂອງ ໃນແຂວງ ບໍ່ແກ້ວ.
ເຂດເສຖກິດພິເສດ ແຫ່ງນີ້ ມີເປົ້າໝາຍ ທີ່ຈະພັທນາ ໃຫ້ເປັນເຂດ ທ່ອງທ່ຽວ ທັນສະໄໝ ຄອບຄູ່ໄປກັບ ການອະນະຮັກ ຊັພຍາກອນ ທັມມະຊາດ ທີ່ຕັ້ງ ມາແຕ່ປີ 2007. ການກໍ່ສ້າງ ສນາມບິນສາກົນ ຢູ່ເຂດ ເສຖກິດພິເສດ ສາມຫລ່ຽມຄໍາ ທີ່ ແຂວງບໍ່ແກ້ວ ເຮັດໃຫ້ຫລາຍ ພາກສ່ວນ ໃນສັງຄົມລາວ ແລະ ບັນດາ ນັກລົງທຶນ ຕ່າງປະເທດ ໃນລາວ ຕ່າງກໍມີ ຄວາມແປກໃຈ ແລະ ສົງສັຍ ໄປຕາມໆກັນ ທີ່ ຣັຖບານລາວ ຍັງຈະຕ້ອງ ລົງທຶນ ເປັນໜີ້ ໃນການກໍ່ສ້າງ ທັ້ງໆທີ່ໃຜໆ ກໍຮູ້ດີວ່າ ຜູ້ທີ່ຈະໄດ້ຮັບ ຜົນປະໂຫຍດ ຢ່າງຫລວງຫລາຍ ຈາກສນາມບິນ ນັ້ນຄື ກຸ່ມບໍຣິສັດ ດອກງິ້ວຄໍາ ຂອງຈີນ ນັ້ນເອງ.
