ທ່ານ ຈູມມະລີ ໄຊຍະສອນ ຜູ້ນຳພັກ ແລະ ຣັຖບານ ສປປ ລາວ ໄປຢ້ຽມຢາມ ປະຕິບັດ ໜ້າທີ່ ຢູ່ວຽດນາມ ແລະ ໃນມື້ສຸດທ້າຍ ຂອງການຢ້ຽມຢາມ ໃນວັນທີ່ 28 ທັນວາ 2012 ນີ້ ຜູ້ນຳລາວ ແລະ ວຽດນາມ ໄດ້ຮ່ວມກັນ ສລອງໄຊຊະນະ ຫລືຜົນສຳເຣັດ ທີ່ສອງປະເທດ ຍາດມາໄດ້ໃນ 2012 ຊຶ່ງເປັນປີ ມິຕພາບ ແລະ ສາຍພົວພັນ ແບບພິເສດ ຣະຫວ່າງ ສປປ ລາວ ແລະ ວຽດນາມ. ໃນຕົ້ນປີ ຜູ້ນຳພັກ ແລະ ຣັຖບານລາວ ປະກາດປີ ສລອງມິຕພາບ ນີ້ວ່າ:
"ສອງຊາດລາວ ວຽດນາມ ມີການພົວພັນ ຖານບ້ານໃກ້ເຮືອນຄຽງ ທີ່ດີນຳກັນ ມາແຕ່ບູຮານ ນະການ."
ສ່ວນພິທີສລອງ ຜົນສຳເຣັດ ຈັດຂື້ນຢູ່ ນະຄອນຫລວງ ຮ່າໂນ່ຍ ປະເທດ ວຽດນາມ ທ່ານ ຈູມມະລີ ໄຊຍະສອນ ເວົ້າໃນພິທີນັ້ນວ່າ ສປປລາວ ສະແດງ ຄວາມຂອບໃຈ ແລະ ຄວາມຮູ້ບຸນຄຸນ ຕໍ່ພັກ-ຣັຖ ແລະ ປະຊາຊົນ ວຽດນາມ ທີ່ໄດ້ຊ່ວຍ ການປະຕິວັດ ໃນລາວ. ທ່ານ ຈູມມະລີ ໄຊຍະສອນ ກ່າວອີກວ່າ ເຖິງສະພາບການ ຂອງໂລກ ຈະປ່ຽນໄປ ແນວໃດກໍຕາມ ສປປລາວ ຈະປົກປັກຮັກສາ ສາຍພົວພັນ ແບບພິເສດ ກັບ ວຽດນາມ ນີ້ໃຫ້ໝັ້ນຄົງ ຖາວອນ ຕລອດໄປ.
ແຕ່ໃນຂະນະທີ່ ຜູ້ນຳລາວ ແລະ ວຽດນາມ ສລອງໄຊຊະນະ ຢູ່ນັ້ນ ປະຊາຊົນລາວ ສ່ວນຫລາຍ ກັບບໍ່ຕື່ນເຕັ້ນ ຫຼືດີໃຈແນວໃດ ກັບຄວາມສຳພັນ ຖານພິເສດນັ້ນ ຊາວລາວຄິດວ່າ ປະເທດລາວ ຖືກ ວຽດນາມ ຄວບຄຸມ ພ້ອມທັງ ວິຕົກ ກັງວົນ ທີ່ຊາວວຽດນາມ ຫລັ່ງໄຫລເຂົ້າມາ ແລະ ທຳມາຫາກິນ ຢູ່ໃນລາວ ຫລາຍເກີນໄປ ເຊັ່ນມາຈັບຈອງ ຍຶດເອົາທີ່ດິນ ເພື່ອປູກ ຢາງພາຣາ ມາຕັດໄມ້ ແລະ ປຸ້ນສະດົມເອົາ ຊັພຍາກອນ ທັມມະຊາດ ຂອງລາວໄປ ຢ່າງບໍ່ລົດລະ.
ໄຊຊະນະອີ່ຫຍັງ?ຂ້ອຍຄືບໍ່ຮູ້ຈັກ ! ການຕໍ່ສູ້ຍັງບໍ່ທັນສິ້ນສຸດ ເຮັດຈັ່ງໃດຈຶ່ງວ່າໄດ້ຮັບໄຊຊະນະ !
ສົງຄາມຍັງບໍ່ທັນເລີກຣົບຢ່າຟ້າວນັບສົບທະຫານ ແມ້ !
