ຊາວເມືອງ ຫົງສາ ຍັງຢ້ານ ຜົລກະທົບ ຈາກໂຄງການ ໂຮງໄຟຟ້າ ຫົງສາລິກໄນທ໌ ເຖິງແມ່ນວ່າ ຈະໄດ້ຮັບ ການຢືນຢັນ ຈາກພາກສ່ວນ ທີ່ກ່ຽວຂ້ອງ ກໍຕາມ.
ໂຄງການໄຟຟ້າ ຫົງສາລິກໄນທ໌ ໃນແຂວງໄຊຍະບູຣີ ໄດ້ຄືບໜ້າໄປ ຢ່າງວ່ອງໄວ, ຊຶ່ງມາເຖິງປັຈຈຸບັນນີ້ ໄດ້ສໍາເລັດໄປແລ້ວ 20 ສ່ວນຮ້ອຍ. ເຖິງຢ່າງໃດ ກໍຕາມ, ຍັງມີຊາວບ້ານ ຈໍານວນນຶ່ງ ທີ່ເປັນຫ່ວງ ກ່ຽວກັບ ຜົລກະທົບ ທີ່ອາດເກີດຂຶ້ນ ຕິດຕາມມາ ຍ້ອນສານພິດຕົກຄ້າງ ຈາກໂຄງການໂຄງໄຟຟ້າຖ່ານຫີນແຫ່ງນີ້.
ອີງຕາມຄວາມຄືບໜ້າຫລ້າສຸດ, ຣັຖບານລາວ ໄດ້ປະຊຸມກັບ ບໍຣິສັດ ຜູ້ກໍ່ສ້າງ ໂດຍຢືນຢັນ ວ່າ ຣັຖບານ ຈະພະຍາຍາມ ສ້າງຄວາມເຊື່ອໝັ້ນ ກັບປະຊາຊົນ ໃຫ້ໄດ້, ໂດຍເບື້ອງຕົ້ນ ຈະອະນຸຍາດ ໃຫ້ຕົວແທນ ຊາວບ້ານ ໄດ້ຮ່ວມ ກວດສອບ ຜົລກະທົບນໍາ, ດັ່ງທ່ານ ຄໍາສິງ ສອນສຸກ, ເຈົ້າໜ້າທີ່ ຫົງສາ ກ່າວໃນຕອນນຶ່ງ ວ່າ:
“ປະຊາຊົນ ເຂົາກໍຍັງໄດ້ຮັບຂໍ້ມູນຢູ່ ແຕ່ເຂົາກໍສົງໃສວ່າ ອັນນີ້ ແມ່ນທາງພາກຣັຖເຮົານີ້ ເອົາຂໍ້ມູນອັນນີ້ມາ ມາຣາຍງານ ປະຊາຊົນນີ້ ແມ່ນຕົວຈິງ ຫລືບໍ່ ເຂົາກໍຍັງບໍ່ທັນເຊື່ອໝັ້ນ ດັ່ງນັ້ນ ໃນກອງປະຊຸມ ປະຈໍາເດືອນ ເດືອນແລ້ວນີ້ ຈະເອົາຕົວແທນ ຂອງຊຸມຊົນໄປນໍາ.”
ທ່ານ ກ່າວຕື່ມວ່າ ຊາວບ້ານ ສ່ວນຫລາຍ ທີ່ຢູ່ໃກ້ໂຄງການກໍ່ສ້າງ ໄດ້ໂຍກຍ້າຍ ອອກຈາກພື້ນທີ່ແລ້ວ ແຕ່ຊາວບ້ານ ບາງສ່ວນ ທີ່ບໍ່ໄດ້ໂຍກຍ້າຍ ກໍຍັງ ມີຄວາມກັງວົນ ວ່າ ໂຄງການດັ່ງກ່າວ ຈະສົ່ງຜົລກະທົບ ຍ້ອນວ່າ ມີພື້ນທີ່ບາງສ່ວນ ຂອງປະຊາຊົນ ທີ່ເປັນທາງຜ່ານ ຂອງຄອງນໍ້າ ຈາກໂຄງການ.
ໂຄງການໄຟຟ້າຖ່ານຫີນ ຫົງສາລິກໄນທ໌, ຖ້າຫາກວ່າ ກໍ່ສ້າງສໍາເລັດ ຈະມີກໍາລັງຜລິດ 1878 ເມກາວັດ ແລະ ຈະເຮັດໃຫ້ ໂຄງການດັ່ງກ່າວ ເປັນໂຄງການຜລິດໄຟຟ້າ ທີ່ໃຫຍ່ທີ່ສຸດ ໃນປະເທດລາວ, ແລະ ມີເປົ້າໝາຍ ຂາຍກະແສໄຟຟ້າ ໃຫ້ປະເທດໄທ. ໃນທ້າຍປີ 2012, ໂຄງການ ດັ່ງກ່າວ ໄດ້ສໍາເລັດການໂຍກຍ້າຍ 5 ໝູ່ບ້ານ ໃນຣັສມີ ການກໍ່ສ້າງ 15 ກິໂລແມັດ, ໄດ້ແກ່ ບ້ານ ໜອງຄໍາ, ບ້ານນາຊາຍຄໍາ, ບ້ານຫານ, ບ້ານທາດ ແລະ ບ້ານຈໍາປາ, ຊຶ່ງຮວມມີ ຊາວບ້ານ ປະມານ 2000 ກ່ວາຄົນ ຍ້າຍໄປຢູ່ ໝູ່ບ້ານແຫ່ງໃໝ່ ທີ່ທາງໂຄງການ ຈັດສັນໄວ້ໃຫ້.
ນອກຈາກ ຊາວບ້ານແລ້ວ ກໍຍັງມີອົງການສາກົນຕ່າງໆ ທີ່ກັງວົນ ເຣື້ອງຜົລກະທົບ ຈາກໂຄງການດັ່ງກ່າວ ເພາະວ່າ ເຄີຍມີໃຫ້ເຫັນ ຢ່າງຈະແຈ້ງແລ້ວ ກ່ຽວກັບ ໂຄງການ ໂຮງໄຟຟ້າຖ່ານຫີນແມ່ເມາະ, ແຂວງລໍາປາງ ປະເທດໄທ. ເຖິງຢ່າງໃດ ກໍຕາມ, ບັນຫາ ທັງໝົດ ກໍຂຶ້ນ ຢູ່ກັບວ່າ ໂຄງການ ຈະລົງທຶນ ນໍາຣະບົບ ກໍາຈັດມົລພິດໄດ້ດີ ເທົ່າໃດ.
