ເຈົ້າຫນ້າທີ່ ປກສ ແຂວງຄຳມ່ວນ ປະຕິເສດ ການເຂົ້າຢ້ຽມ ຂອງ ຄອບຄົວ ນາງ ສີວັນໄຊ ພົມມະຣາດ ທີ່ຍັງຖືກ ທາງການ ຄຸມຂັງໄວ້ຢູ່.
ການຈັບໂຕ ກັກຂັງ ນາງ ສີວັນໄຊ ພົມມະຣາດ ອາຍຸ 31 ປີ ຣາສດອນບ້ານ ຄູນຄຳ ເມືອງ ຍົມມະຣາດ ແຂວງຄຳມ່ວນ ໃນບັນຫາ ການຂັດແຍ່ງ ທີ່ດິນ ທີ່ຊາວບ້ານ ບໍ່ພໍໃຈ ທີ່ ທາງການລາວ ຈະເອົາດິນ ຂະເຈົ້າ ໄປໃຫ້ ນັກລົງທຶນ ຕ່າງຊາດ ສຳປະທານ.
ນາງສີວັນໄຊ ພົມມະຣາດ ທີ່ຖືວ່າເປັນ ຫົວຫນ້າ ນໍາພາ ຊາວບ້ານ ໄປຮ້ອງທຸກ ຕໍ່ທາງການ ນາງ ຈຶ່ງຖືກຈັບ ຈໍາຄຸກ ຢູ່ຈົນຮອດ ທຸກມື້ນີ້ ແລະ ທາງການ ກໍສັ່ງຫ້າມ ບໍ່ໃຫ້ ຍາດພີ່ນ້ອງ ເຂົ້າຢ້ຽມ ໂດຍເດັດຂາດ. ທາງ ປກສ ແຂວງຄຳມ່ວນ ອ້າງວ່າ ມີການສັ່ງຫ້າມ ບໍ່ໃຫ້ເຂົ້າຢ້ຽມ ຍ້ອນວ່າ ຄະດີ ຍັງຢູ່ໃນ ຂັ້ນຕອນ ການສືບສວນ. ເຈົ້າຫນ້າທີ່ ເວົ້າວ່າ:
"ເພີ່ນຍັງ ຢູ່ໃນສ່ວນ ການດຳເນີນ ຄະດີ ຢູ່ ມັນກໍຍັງ ບໍ່ທັນສາມາດ ພົບໄດ້ ຍັງສືບສວນຢູ່ ນາງສີວັນໄຊບໍ ບໍ່ຮູ້ນຳເພີ່ນ ນ່າ".
ເຈົ້າໜ້າທີ່ ຕຳຣວດ ຝ່າຍສືບສວນ ທີ່ແຂວງຄຳມ່ວນ ອີກທ່່ານນື່ງ ເວົ້າວ່າ ຄະດີ ດັ່ງກ່າວ ບໍ່ມີມູນ ຄວາມຈິງ ທາງການແຂວງ ບໍ່ໄດ້ ຈັບກຸມຜູ້ໃດ ແລະ ຄະດີເຣື້ອງ ນາງ ສີວັນໄຊ ພົມມະຣາດ ນັ້ນ ບໍ່ມີຂໍ້ມູນວ່າ ຖືກຈັບມາ ແຕ່ຄົນລາວ ແຂວງຄຳມ່ວນ ຜູ້ນື່ງເວົ້າວ່າ ເຣື້ອງດັ່ງກ່າວ ເປັນເຣື້ອງ ຂອງທາງການ ບໍ່ສາມາດ ອອກຄວາມຄິດ ຄວາມເຫັນ ໃນທີ່ ສາທາຣະນະ ໄດ້. ນາງເວົ້າວ່າ:
"ເຮົາຈະເວົ້າຫຍັງ ມັນກໍບໍ່ໄດ້ ເຮົາກໍບໍ່ຮູ້ ເຣື້ອງ ເຫມືອນກັນ ວ່າ ມັນຈະມີ ຫຍັງແດ່ ບໍ່ຮູ້ ເຫມືອນກັນ ວ່າມັນຈະເປັນ ຢ່າງໃດ ເພາະຢູ່ນີ້ ມັນເປັນເຣື້ອງ ທາງການ ເຂົາເວົ້າຫລາຍ ກໍບໍ່ໄດ້".
ທ່ານ ຄຳພູວັນ ໄຊຍະຣາດ ເຈົ້າເມືອງໆ ຍົມມະຣາດ ຍອມຮັບວ່າ ມີບັນຫາ ຄວາມຂັດແຍ່ງ ທາງດ້ານທີີີດິນ ຣະຫວ່າງ ຊາວບ້ານ ກັບ ເຈົ້າຫນ້າທີ່ີຣັຖ ແທ້ ເພາະ ຊາວບ້ານ ບໍ່ພໍໃຈ ໃນຄ່າຊົດເຊີຍ ທີ່ຣັຖບານ ຈ່າຍໃຫ້ ແຕ່ເລົາ ບໍ່ໄດ້ໃຫ້ ຣາຍຣະອຽດ ກ່ຽວກັບ ນາງສີວັນໄຊ ພໍເທົ່າໃດ.
